İcra başçısının fəaliyyəti barəsində şikayətlər rekord həddə çoxalıb

Ölkədə dəfələrlə korrupsiyaya və rüşvətxorluğa qarşı mübarizə tədbirləri görülməsinə baxmayaraq, bu sahədə əsaslı problemlər hələ də qalmaqdadır. Bir çox məmurların fəaliyyətinə nəzər saldıqda korrupsiyanın sanki onların gündəlik iş prinsipi olduğunu düşünmək olar. Məhz belə məmurların “iş prinsipinin” nəticəsidir ki, yerlərdə narazılıq dalğası formalaşır, dövlət orqanlarına qarşı inamsızlıq yaranır. Dövlət başçısının dəfələrlə sərt xəbərdarlıqlarına baxmayaraq, həyata keçirilən böyük layihələri şəxsi maraqlarına qurban verən məmurlar hələ ki, öz bildiyini etməkdədir. Lakin, bu ilin bir çoxları üçün “kürsüdə son il olacağı” haqqında artıq ilk siqnallar verilib.

Füzuli rayonu cəbhə xəttində yerləşən həssas bölgələrdən biridir. Son illər rayonun strateji əhəmiyyətini nəzərə alaraq, burada abadlıq-quruculuq işlərinin aparılması, infrostrukturun yenilənməsi üçün dövlət büdcəsindən xeyli vəsait ayrılıb. Lakin, rayondan daxil olan şikayətlərə, mediyada davamlı olaraq gedən tənqidi materiallara nəzər salmaq kifayətdir ki, burada real vəziyyət haqqında aydın təəssürat yaransın.

Rayon icra hakimiyyətinin başçısı Alı Alıyev bu vəzifəyə 25 fevral 2011-ci ildə təyin olunub. Aradan keçən 4 il müddətində Füzuli haqqında ən çox şikayətlər daxil olan, tənqid hədəfində olan rayonlar siyahısında ilk pillələrdə qərarlaşıb. Qeyd etdiyimiz kimi, bu illər ərzində rayonun inkişafı məqsədilə yetərincə büdcə ayrılmaları baş verib. Amma, “xərcləmələrlə” nəticə arasında olan dərin uçurumu heç nəylə doldurmaq mümkün deyil. Nəzərə alsaq ki, rayonun abadlığı məqsədilə ayrılan vəsaitlərin həcmi 10 milyonlarla manat məbləğindədir onda mənzərə tam aydın olar.

Verilən məlumatlara əsasən, 2011-ci ildə Füzuli rayonunun Əhmədbəyli-Alxanlı-Zobuçuq kəndlərarası yolların təmiri və çəkilməsi üçün 7 milyon manat vəsait ayırıb. Həmin yol Bakı-Füzuli-Ağdam magistral yolu olduğu üçün ancaq yolun üzərinin asfalt örtüyü üzündən təmir edilib. Ayrılmış vəsaitin isə hara xərclənməsi məlum olmayıb.

Horadiz şəhərinin abadlığı üçün 2011-ci ildə Heydər Əliyev Fondundan 2 milyon, Neft Fondundan 2 milyon və bununla bərabər əhalidən yığılan pullarla, ümumilikdə 8 milyon manatı guya bu yollara və rayondakı abadlıq işlərinə xərclənib.

28 min nəfər əhalinin yaşadığı 13 yaşayış məntəqəsini birləşdirən Qarabağ-Böyük Bəhmənli-Arayatlı-Mirzənağılı avtomobil yolunun tikintisi məqsədi ilə Azərbaycan Respublikasının 2013-cü il dövlət büdcəsinin dövlət əsaslı vəsait qoyuluşu xərclərinin bölgüsündə kəndlərarası avtomobil yollarının tikintisi və yenidən qurulması üçün nəzərdə tutulmuş vəsaitin ilkin olaraq 3 milyon manatı Füzuli Rayon İcra Hakimiyyətinə ayrılıb. Bunadək isə müxtəlif vaxtlarda Füzuli Rayon İcra Hakimiyyətinə yol tikintisi ilə bağlı müxtəlif həcmdə dövlət vəsaitləri ayrılıb; amma sonradan həmin vəsaitlərin necə xərcləndiyi yönündə KİV-də müxtəlif iddialar yer alıb.

Bundan başqa, Alı Alıyevin Fuzuli rayonuna rəhbərliyi dövründə Horadiz qəsəbəsinin yenidən qurulması və abadlaşdırılması məqsədi ilə ayrılan təxminən 15 milyon manata yaxın vəsaitin önəmli bir hissəsi də yol tikintisi üçün sərf edilib. Amma bu işlərin də keyfiyyətli görüldüyü və xərclənən vəsaitlərin şəffaflığı məsələsində ciddi şübhələr hökm sürməkdədir.

Ümumiyyətlə, Füzulidə yolların tikilməsi və abadlıq işləri məqsədilə son illərdə bu rayona dövlət büdcəsindən və digər qaynaqlardan ayrılan vəsait10 milyon manatdan çox olsa da, həmin pulların xərclənməsi ilə bağlı şəffaflıq sahəsində ciddi problemlər var və elə buna görə də icra başçısı Alı Alıyev KİV tərəfindən ciddi şəkildə tənqid edilir. Bəzi məlumatlarda bildirilir ki, rayonda yeni yolların çəkilməsi və müxtəlif yolların yenidən qurulması ilə bağlı ayrılan

vəsaitlərin bir hissəsinin əvvəlcədən mənimsənildiyi və yaranmış boşluğun sahibkarlardan toplanan pullar hesabına doldurulduğu yönündə də iddialar səslənməkdədir.

Alı Alıyevin başqa məqsədlərə yönəltdiyi milyonların əsas hissəsi təmir-tikinti üçün ayrılmış pullardan ibarət olub. Rayonun Horadiz qəsəbəsində evlərin əsaslı təmiri üçün son illərdə 6 milyon manatdan artıq pul ayrılıb. Həmin pulun 2,1 milyon manatı şəhərdəki 88 yaşayış evinin bərpa edilməsinə sərf olunduğu sənədlərdə göstərilir. "Perlit" MMC tərəfindən həyata keçirilən bu işlərin hansı səviyyədə reallaşdığı isə göz qabağındadır. Bu vəsaitin heç yarısı təmir-tikinti işlərinə sərf olunmayıb. Həmin büdcə vəsaitlərinin böyük qisminin mənimsənildiyi bildirilir. Həmçinin Horadiz şəhərində daha 50 evin bərpa işləri adı altında ayrılmış və "Namiq" firması tərəfindən həyata keçirilən işlər üçün 1,25 milyon manatın da aqibəti məlum deyil. Büdcədən həmin işlər üçün 2,65 milyon manat pul ayrılıb ki, onun da yenə mənimsənildiyi iddia edilir. Deyilir ki, "Kapital Tikinti" MMC tərəfindən həyata keçirildiyi sənədlərdə göstərilən bu işlər əslində, razılaşdırılmış şəkildə olub.

Rayonda kənd təsərrüfatının “inkişafına xüsusi qayğı” göstərilir. Kənd təsərrüfatının intensiv inkişafını təmin etmək məqsədilə ayrılan subsidiyaların verilməsində ciddi korrupsiya faktları aşkar olunub. Bir müddət əvvəl rayon fermerlərinin mediya vasitəsilə ölkə başçısına ünvanladığı müraciətdə dəhşətli faktlar öz əksini tapmışdı. Müraciətdə bildirilirdi ki, bir çox adamlara subsidiyalar yazılıb və həmin adamlar pulları bankomatdan almayıblar. Fermerlər vəsaiti “Kapital Bank”ın Füzuli rayon filialından post-terminal vasitəsilə 50%-ni alıblar. Qalan 50%-i isə yığılaraq icra başçısı Alı Alıyevə verilib. Onlar müraciətlərində qeyd ediblər ki, Kənd Təsərrüfatı Nazirliyi subsidiyaları internet şəbəkəsində yerləşdirdiyi üçün saxtakarlıq aydın görünür.

Müraciət müəllifləri bildirirlər ki, göstərilənlərdən aydın olur ki, rayon üzrə 18134.01 hektar buğda sahəsi üçün ayrılan subsidiyanın 2402 hektarı arpa, yonca və boş sahə təşkil edir: “Bu da 96080.00 manat dövlət vəsaitinin talanmasıdır.

Rayonda yaranan dözülməz şərait iş adamlarının, sahibkarların fəaliyyətini iflic vəziyyətinə salıb. Vaxtaşırı müxtəlif adlar altında toplanan qanunsuz vəsaitlər onları müflis olmaq təhlükəsi ilə üz-üzə qoyub. Artıq verilən məlumatlara görə, Füzulidən prezident aparatına ünvanlanan şikayət müraciətləri rekord həddə çoxalıb. Cəbhə bölgəsində yerləşən bir ərazidə bu qədər total qanunsuzluqların, özbaşınalıqların hökm sürməsi sakinləri cana doyurub. Onlar tezliklə bütün bunlara son qoyulmasını tələb edirlər.

Artıq Alı Alıyevin fəaliyyətinin ciddi təftiş olunduğu barəsində informasiyalar yayılıb. Bu isə daha ciddi faktların ortaya çıxmasına səbəb olub. Yaxın müddətdə onun görəvdən alınacağı da istisna olunmur. Bu isə füzulilərin çoxdankı arzusunun reallaşması demək olardı.

Mərdan