Yerli sakinlərlə etdiyimiz söz-söhbətlər zamanı onlar onu da vurğuladılar ki, “bölmə rəisinin sahibkara qarşı qərəzli mövqeyi və bunun nəticəsi olaraq sakinlərin susuz qalmaları düşünülmüş təxribatdır

Sumqayıt şəhəri Yaşma bağları adlanan ərazidə sahibkarlıq fəaliyyəti ilə məşğul olan Elgün Abdullayev tərəfindən, 30 iyun 2015-ci il tarixdə “Gündəm Xəbər” qəzetinin redaksiyasına ünvanladığı müraciəti daxil olmuşdur. O, yazdığı müraciətində bildirir ki, “Yaşma bağlarında sahiblik etdiyim obyektin qarşısında, Sumqayıt şəhər Polis İdarəsi 2-ci polis bölməsinin rəisi Ramiz müəllimin göstərişi əsasında dağıntı işləri aparıldı. Aparılan dağıntı işlərinə bölmə rəisinin verdiyi tapşırıq əsasında, əraziyə cavabdehlik daşıyan sahə müvəkkili, polis mayoru Azər müəllim rəhbərlik etdi. Buna səbəb, sahə müvəkkilinin məndən 500 manat rüşvət istəməsi və onun bölmə rəisinə çatmalı olduğunu deməsi oldu. İstənilən rüşvəti verməkdən imtina etdim və bildirdim ki, mənim rəisə veriləsi pulum yoxdur”.
Elgün Abdullayevin “Gündəm Xəbər”ə ünvanladığı müraciətdən sonra, biz hadisə yerində olduq. Məqsədimiz baş verən olayın əmələ gəlmə səbəblərini bir qədər araşdırmaq və ümumi mənzərənin varlığını öz gözlərimizlə görmək idi.
Şahidi olduğumuz mənzərəni gördükcə sanki dəhşətə gəldik və öz gözlərimizə belə inana bilmədik. Hətta ümumi mənzərəyə təəccüb qaldığımızdan, öz-özümüzə sual da etdik ki, görəsən bura Azərbaycandır? Buna səbəb, ərazinin tamamilə darmadağın edilməsi idi. Çünk eşidib bildiyimiz bir həqiqət var ki, Azərbaycan polisi qanunlarımızın keşiyində durur, vətəndaş təhlükəsizliyinə təminat verir, vətəndaş polis münasibətlərini tənzimləyir və digər ümumilli maraqlarımıza uyğun addımlar atır. Bu belə olduğu halda, 2-ci polis bölməsi rəisinin atdığı addıma görəsən nə ad vermək olar? Axı, polis nə vaxtdan ərazidə dağıntı işləri aparan qurumun səlahiyyətlərinə sahib olub.
Bölmə rəisinin sahibkara məxsus obyektin qarşısında dağıntı işlərini aparmaq yönündə verdiyi tapşırıq icra olunduqdan sonra, Elgün Abdullayev DİN-nin 102 xidmətinə baş verən olayla bağlı məlumat verir. Çox keçmir ki, 2-ci polis bölməsinin rəisi ilə bərabər, sahə müvəkkili də törətdikləri cinayətin, eyni zamanda polis adıyla uzlaşmayan hərəkətin ört-basdır olunmasına çalışırlar. Bu məqsədlə ilk öncə onlar sahibkara hədə-qorxu gələrək bildirirlər ki, “sən 102 xidmətinə məlumat ver ki, mən əsəbi olaraq zəng etmişəm və bölmə rəisi məndən 500 manat rüşvət tələb etməyib”.
Sahibkar isə bizimlə söhbətində billdirdi ki, “mən belə bir vandalizmə göz yumub geri çəkilmək fikrində deyiləm. Əslində bu hadisədə təkcə mənim deyil, hətta yerli sakinlərin də hüquqları tapdalanıb. Çünki, obyektimin qarşısından keçən su turbası torpağın altından çıxarılmış və belə bir səbəb üzündən də əhalinin su ilə təminatı tamamilə kəsilib. İsti hava şəraitində əhalinin susuz qalması, görün nə deməkdir? Artıq su üzünə həsrət qalan sakinlər, sanki Bakı-Quba yolunu bağlamaq həddfinə belə gəliblər”.
Ərazidə araşdırma apararkən belə bir məlumat da əldə etdik ki, 2-ci bölmənin rəisi vəzifəsini daşıyan Ramiz müəllim, Yaşma bağlarında torpaq alqı-satqısı ilə də məşğul olur. Yəni, “makler” funksiyasını da yerinə yetirir. Hətta bu azmış kimi onun “Vəhabi” dini təriqətlərinə bağlı olması haqda xəbərlər də, sızdırılan məlumatlar sırasındadır. Düzdür, bu haqda dəqiq bir söz deyə bilməsək də, müəyyən çevrədə belə bir söz-söhbət dolaşmaqdadır. Adlarının çəkilməsini istəməyən sakinlər onu da bildirdilər ki, “ ərazidə “Vəhabi” dini təriqətinə xidmət edənlərin sayı günü-gündən çoxalmaqdadır”. Belə bir məlumatın MTN-nin əməkdaşları tərəfindən diqqətdə saxlanılması və araşdırılması, yəqin ki, daha məqsədəuyğun hal ola bilər.





Yerli sakinlərlə etdiyimiz söz-söhbətlər zamanı onlar onu da vurğuladılar ki, “bölmə rəisinin sahibkara qarşı qərəzli mövqeyi və bunun nəticəsi olaraq sakinlərin susuz qalmaları düşünülmüş təxribatdır. Belə bir halın varlığı da, əslində çoxsaylı sakinlərin Sumqayıt şəhər rəhbərliyindən incik düşmələrinə, kütləvi narazılıq hissinin baş qaldırmasına səbəb olan amillərdir”. Belə bir vəziyyətdə, cənab Eldar Əzizovun hadisələrin ümumi gedişinə diqqət yetirməsi, yəqin ki, gələcəkdə baş verə biləcək olayların qarşısını vaxtında imkan verəcək.