Sədd çəkmək, heç də lazımi tədbirlərin görülməsi demək deyiı. Bu gün evin qarşısında sədd çəkilirsə, əslində ailə, uşaq qorxuya salınır

Son aylar cəbhə bölgələrində əmələ gələn durum və yaşanan olayların varlığı, DQ müharibəsində iştirak edib, onun odu-alovu içərisindən keçənlərin də daha çox diqqətini cəlb edir. Çünki, həmin şəxslər nə qədər yaşa dolsalar da, səhhətlərində müəyyən problemlər əmələ gəlsə də, yenə Vətən sevgisi, xalqına bağlılıq hissi onları rahat buraxmır. Belə şəxslərdən biri də, DQ müharibəsinin ağrılı-acılı günlərində silaha sarılan, doğma torpaqlarımızın müdafiəsində iştirak etməklə, yaxın tariximizdə silinməz izlər buraxan, Tərtər rayon Ərazi Müdafiə Komitəsinin sədri və sabiq icra başçısı olmuş Sərdar Həmidovdur. Onun dünən redaksiyamıza üz tutmasına səbəb, 02 iyul 2015-ci il tarixdə “Yeni Müsavat” qəzetində, Tərtərin bəzi kəndlərində sakinləri erməni güllələrindən qorumaq məqsədilə inşa olunan səddlərlə bağlı idi. O, ilk öncə bildirdi ki, məqaləni oxuduqdan sonra “Yeni Müsavat” qəzetinin redaksiyasına bir neçə dəfə telefon zəngi açdım ki, inşa olunan səddlərlə bağlı münasibətimi bildirimək istədim. Etdiyim telefon zənglərinə bir kimsə cavab vermədiyindən, “Gündəm Xəbər”in redaksiyasına üz tutmağa qərar verdim”.

Söhbət əsnasında Sərdar Həmidov vurğuladı ki, “Tərtərin DQ həmsərhəd zolağında yerləşən Qapanlı, Aşağı Qaradağlı, Qəzyan kəndləri sərhəddə yaxın kəndlərdir. Adlarını çəkdiyimiz kəndlərdə, evlərin qarşısında səddlər tikilib ki, atılan erməni güllələrini dəf etmək mümkün olsun. Amma, o anı nəzərə almayıblar ki, dinc əhali üçün sədd yox, əslində səngər tikilməlidir. 1992-1993-cü illərdə həmin istiqamətdə ermənilərin çox güclü hücumları olurdu. O illərdə Qapanlı kəndində bir evi qərargah etmişdim və qərərgaha briqada komandiri Nəcməddin Sadıqovla bərabər, qərərgah rəisi Vasyakı da cəlb etmişdim. Həmin ətrafda Tərtər botalyonu, komandir olduğum 5-motoatıcı taqım, 777-ci botalyon, 772-ci botalyon, (komandirlərin adlarını əzbər bildiyim üçün çəkmirəm) təqribən bir aya yaxın müddət ərzində, güclü döyüşlərdən sonra düşmən qüvvələrini 25 km-dən çox geri çəkilməyə məcbur etdik. Yəni, DQ içinə və vaxtilə ermənilər tərəfindən ələ keçirilmiş Ağdamın Şotlanlı kəndinə qədər

geri otuzdura bildik. Ona görə 25 km deyirəm ki, erməni artileriyası, yəni topu, qradı, ən çox 18-20 km məsafəni vururdu. Ona görə də onlar geri otuzdurulmuş ərazidən, nəzarətimizdə olan yerləri vurmaq imkanında deyildilər. Onu da qeyd edim ki, DQ ətraf ərazilərinin bir çoxu erməni qəsbkarları tərəfindən ələ keçirilsə də, Tərtərin bir qarış torpağı belə verilmədi. Baxmayaraq ki, bu rayonda da, saysız-hesabsız ölüm-itim halları baş verdi.

O, onu da vurğulayır ki, bir yerdə ki, qadağan olunmuş silıahlardan istifadə olunur, yəni reaktivni qrad-1, qrad-2, D-20, D-30 toplarından, eləcə də qranatomyotdan və.s, o halda sədd çəkməyin nə kimi əhəmiyyəti var. Çünki, həmin silahlar çəkilmiş sədləri darmadağın etməyə qabil gücə malikdirlər. 1992-1993–cü illərdə erməni artilleriyası Tərtəri də vura bilirdi. 1992-ci ilin axırlarında erməni artilleriyası ərazidən uzaqlaşdırıldıqdan sonra, Tərtərdə hətta məktəblər belə fəaliyyətlərini davam etdirdilər. Həmin illərdə Tərtərdə icra başçısı işləmişəm və bütün proseslərin də iştirakçısı olmuşam. Bunu müharibədə iştirak edən hər kəs təsdiq edə bilər.

Ümumiyyətlə, bu gün evin qarşısında sədd tikmək, əslində uşağı, ailəni qorxuya salmaq deməkdir. Belə bir addımı atmaq əvəzinə daha yaxşı olar ki, ağır artilleriya ilə təminat tam ödənilsin, ermənilər atanda bizimkilər onlara daha da yaxşı formada cavab verə bilsinlər. DQ ərazisinə kifayət qədər bələd olduğumdan və əraziləri yaxşı tanıdığımdan, elə bu günün özündə təcili tədbirlər görməklə, Ağdamın Əhmədli, Papravənd, Şotlanlı kəndlərini və rayonun Daş karyeri adlanan ərazisini ermənilərdən təmizləmək mümkündür.

Sədd çəkmək, heç də lazımi tədbirin görülməsi demək deyil. Topun, tankın qarşısında sədd heç vaxt duruş gətirə bilməz. Adicə Kalaşnikov avtomatı AK-7 dəmiryolu relsini deşə bilir. Sədd topun, qradın qarşısında necə duruş gətirə bilər? Müdafiə üçün zəruri addımlar atmaq gərəkdir.

Mətləb Balakişiyev