Bütün bunlardan sonra belə qənaətə gəldik ki, qəzetimizin elektron poçtuna göndərilən məktub, hansısa qərəzli qruplaşmanın düzüb-qoşduğu məktub olmaqla bərabər, heç də həqiqəti əks etdirməyən açıqlama imiş

Sentyabr ayının birinci ongünlüyündə qəzetimizin elektron poçtuna, Sabunçu Telefon Qovşağında işləyən bir qrup xanımlar adından şikayət məktubu daxil olmuşdu. Düzdür, ilk öncə daxil olan məktubu diqqətlə oxuduq və bir xeyli də fikirləşdik. Çünki, göndərilmiş açıqlamanın məzmununa diqqət yetirdikdə o da məlum olurdu ki, məqaləni göndərən şəxs qovşağın rəisi Nəriman Salmanova qarşı olduqca qərəzli mövqe tutmuş və onunla bir növ düşmənçilik etdiyi yanaşmanı da ortaya qoymuşdu. Belə bir səbəb üzündən də, məqalənin dərci məsələsi müzakirə mövzusuna çevrildi. Son anda belə bir nəticəyə gəldik ki, açıqlamanın işıq üzü görməsindən sonra, sadalanan faktlarla bağlı ətraflı araşdırmalarımızı davam etdirək. Bu belə də oldu və son anda müəyyən edə bildik ki, Nəriman Salmanov haqda yazılanlar həqiqətdən çox uzaq xülyalar imiş.

Bir məqamı da xüsusilə qeyd etmək istəyirik ki, “Gündəm Xəbər” qəzeti olaraq gündəlik çoxsaylı oxucularımızdan məktublar alırıq. Ünvanlanan hər bir məktubda, daha çox sosial problemlərin varlığından, məmur özbaşınalıqlarından, ədalətsiz məhkəmə qərarlarından, süründürməçilik amillərinin tüğyan etməsindən və digər olaylardan bəhs olunur. Düzdür, bir mətbu orqan olaraq oxucularımızın hər bir problemini ictimailəşdirə bilməsək də, əksəriyyətinin ictimailəşdirilməsinə nail ola bilirik. Məqsədimiz, “Gündəm Xəbər” qəzeti ilə çoxsaylı oxucu auditoriyası arasında əlaqələri qoruyub saxlamaq olur. Çünki, tam əksəriyyət təsdiq edə bilər ki, bugünkü gündə “Gündəm Xəbər” qəzeti də, qəzet bazarına daxil olan və oxucuları tərəfindən oxunan qəzetlərdən biridir.

Sabunçu Telefon Qovşağının rəisi Nəriman Salmanov haqda göndərilən açıqlama da, bu səpkili məktublardan biri idi. Elə ki, qəzetimizin 11-17 sentyabr 2015-ci il tarixli sayında “Telefon qovşağının rəisi haqqında şok iddialar” başlıqlı məqalə işıq üzü gördü, çox keçmədi ki, daxil olan məlumatlar əsasında müxtəlif yollarla araşdırmalar aparmağa başladıq və lazimi məlumatları da əldə edə bildik. Son olaraq Sabunçu Telefon Qovşağında olmağımız isə, bütün qaranlıq məsələlərə tam aydınlıq gətirməyə imkan verdi. Çünki qovşağın təqribən 29 nəfər qadın işçisi ilə söhbətimiz zamanı, onların hər biri işıq üzü görən məqaləyə qəti etiraz etdiklərini bildirdilər. Hətta, onu da vurğuladılar ki, “biz neçə illərdir bu qovşaqda işləyirik və Nəriman müəllim də bizə rəhbərlik edir. Ötən illər ərzində biz ondan hansısa pislik görməmişik, nalayiq söz danışdığını belə eşitməmişik. Arzu edərdik ki, hər bir vəzifə sahibi Nəriman

müəllim kimi insani xarakterə, yüksək əxlaqi dəyərə malik bir şəxs olsunlar. Çünki, biz ondan hər zaman nümunəvi davranış, əxlaqımıza uyğun yanaşma görmüşük. Bu belə olduğu halda, işıq üzü görən məqalədəki açıqlamaları olduqca pisləyirik, onu qərəzli, əsası olmayan açıqlama hesab edirik” dedikdə, o halda əksər mətləblərdən agah olduq.

Hətta, bu yöndə apardığımız araşdırmalar azmış kimi, bəzi KİV nümayəndələrinin də Nəriman müəllimin hansı xarakterə, hansı düşüncə tərzinə malik vəzifə sahibi olması haqda danışdıqlarını dinlədikcə, məqalənin dərcinə sözün həqiqi mənasında, redaksiya rəhbərliyi olaraq biz də təəssüfləndik. Bütün bunlardan sonra belə qənaətə gəldik ki, qəzetimizin elektron poçtuna göndərilən məktub, hansısa qərəzli qruplaşmanın düzüb-qoşduğu məktub olmaqla bərabər, heç də həqiqəti əks etdirməyən açıqlama imiş. Çünki, sadalanan faktlar aparılan araşdırmalar zamanı, heç vəhclə öz təsdiqini tapmadı.

Onu da qeyd edək ki, Nəriman Salmanov haqda dərc olunan açıqlama, həmin gün redaksiya rəhbərliyinin Bakı şəhərindən kənarda keçirilən tədbirdə iştirakı və verilən tapşırıqlara redaksiya əməkdaşının səhlənkar yanaşması səbəbindən işıq üzü görmüşdü.

“Gündəm Xəbər”