Bir ailənin faciəsi

1998-ci ildə xalqımızın ulu öndəri mərhum prezidentimiz Heydər Əliyev tərəfindən, Azərbaycanda bütün kazino və qumarxanaların fəaliyyətinin qadağan olunması haqda verdiyi qərar, cəmiyyətdə yaxşı mənada rezonans da doğurmuşdu

Bir neçə gün bundan əvvəl, Abşeron rayon sakini tərəfindən (müəyyən səbəblər üzündən hələlik adını çəkmirik) “Gündəm Xəbər” qəzetinin redaksiyasına, ölkə rəhbəri cənab İlham Əliyevin ünvanına və bir çox KİV nümayəndələrinə ünvanlanmış olduğu şikayət məktubu daxil olmuşdur. Daxil olan şikayət məktubunun mahiyyətinə diqqət yetirdikdə, o da məlum olur ki, bu gün istər paytaxt Bakı şəhərində, istərsə də digər şəhər və rayonlarımızda qanunsuz fəaliyyət göstərən qumarxanalar, kazinolar, mərc oyunları keçirilən ünvanlar, yenə də fəaliyyət göstərməkdədirlər. Baxmayaraq ki, 1998-ci ildə xalqımızın ulu öndəri mərhum prezidentimiz Heydər Əliyev tərəfindən, Azərbaycanda bütün kazino və qumarxanaların fəaliyyətinin qadağan olunması haqda verdiyi qərar, cəmiyyətdə yaxşı mənada rezonans da doğurmuşdu.



Düzdür, qərarın verildiyi tarixə bir anlığa olsa belə ekskurs etsək, onu da müəyyən etmək olar ki, həmin illərdə hüquq-mühafizə orqanı əməkdaşları və digər vəzifə sahibləri, verilmiş tapşırıqlara uyğun lazımi addımlarını da atdılar. Müxtəlif ünvanlarda fəaliyyət göstərən qumarxanaların, kazinoların və.s fəaliyyətlərini, verilmiş qərara əsasən birdəfəlik qadağan da etdilər.

Bu gün ölkəmizdə qumarxanaların fəaliyyəti rəsmən qadağan olunsa da, daha çox Bakı şəhərində belə gizli oyun mərkəzləri yenə də fəaliyyət göstərməkdədirlər. Baxmayaraq ki, qərarın verildiyi tarixdə tam əksəriyyət belə bir düşüncəyə sahib idilər ki, Azərbaycanda bu tip oyun növlərinin fəaliyyətinə bir daha qayıdılmayacaq. Hətta, bəzi ekspertlər məsələyə münasibətdə özünəməxsus yanaşma da ortaya qoydular ki, kazinoların bərpa edilməsi ölkə iqtisadiyyatının inkişafına da təsir edə bilər. Onların fikrincə qumarxanaların fəaliyyəti, qumar oynamaq istəyənlərin xaricə getmələrinin qarşısını ala bilər. Yəni, kazino həvəskarlarının pulları xaricə daşınmaz. Amma, ortada bir həqiqət var ki, həmin ünvanların fəaliyyət göstərmələri düz 17 ildir ki, qadağan olunub və mövcud qanunvericiliyimizə görə belə bir fəaliyyət növü ilə məşğul olmaq cinayət sayılsa da, deyəsən bu gün buna məhəl qoyan yoxdur.



Bütün bunlara baxmayaraq, redaksiyamıza paytaxt Bakı ilə bərabər, digər şəhər və rayonlarımızda qeyri-leqal fəaliyyət göstərən qumarxanaların fəaliyyət göstərmələri haqda, silsilə məlumatlar yenə də daxil olmaqdadır. Verilən məlumatlarda o da bildirilir ki, həmin obyektlərdə elə hallar olur ki, bir gecə ərzində100 min manat pul uduzanlar da olur. Hətta, bu azmış kimi ailəsini dağıdanlar, intihar edənlər, ölkəni tərk edənlər, məcburiyyət qarşısında qalıb oğurluq edənlər də olur ki, bu da ümumilikdə cəmiyyətimizin faciəsi deməkdir.

Redaksiyamıza daxil olan şikayət ərizəsində, konkret olaraq bir ailənin faciəsindən bəhs olunur. Çünki, həmin ailənin üzvü minbir yollarla qumar oyunlarına cəlb olunur. Və çox keçmir ki, ailənin üzvü şəhərimizin 6-cı mkr-n ərazisində qeyri-qanuni fəaliyyət göstərən qumarxanada 45 min, Nizami metrosunun yaxınlığındakı qumarxanada 50 min manatdan çox, 20 Yanvar dairəsi adlanan əraziyə yaxın yerdəki qumarxanada isə, 20 min manat pul uduzduğu (uduzdurulduğu) bildirilir. Rəqəmlərə bir anlığa olsa da diqqət yetirək. Bu zaman bilib başa düşmək olur ki, bu cür ünvanların fəaliyyət göstərmələri, nəinki bir ailənin, bəlkə də yüzlərlə ailənin faciəsi ilə nəticələnir. Məqalənin dərci zamanı belə qərara gəldik ki, qeyd olunan ünvan sahiblərinin adları hələlik açıqlanmasın və bu yöndə apardığımız araşdırmalardan sonra, əldə edəcəyimiz ətraflı məlumatlardan sonra onların adlarını, kimliyini geniş ictimaiyyətin diqqətinə çatdıraq.

Onu da vurğulamaq istərdik ki, fəaliyyəti qanunla qadağan olunmuş ünvanlarda külli miqdarda pul uduzan şəxs, son anda elə bir vəziyyətə düşür ki, ailəsi ilə yaşadığı mənzili də satmaq məcburiyyətində qalır. Hal-hazırda iki azyaşlı övladı ilə küçələrdə qalan şəxsin bugünkü həyatı, sözün həqiqi mənasında bir ailənin faciəsidir.

Daxil olan şikayət ərizəsindən sonra tərəfimizdən jurnalist araşdırmaları aparmağa başladıq ki, ümumi vəziyyətin necəliyi haqda müəyyən məlumatları əldə edə bilək. Elə ki, qeyd olunan

ünvanlara baş çəkdik, bu zaman üzləşdiyimiz mənzərə bizi lap dəhşətə gətirdi. Çünki, qeyd olunan ünvanların dörd tərfi qara, görünməni məhdudlaşdıran şüşələrlə, kabinələr isə qara pərdələrlə əhatə olunduğundan, kabinələrdə nələrin yaşanmasını, kənar şəxslər müəyyən edə bilmirlər.

Təəssüf doğuran hal odur ki, bu gün bu cür ünvanların fəaliyyət göstərmələrinə, aidiyyəti üzrə cavabdehlik daşıyan hüquq-mühafizə orqanı əməkdaşları da göz yumurlar. Bu da ümumi bəlalarımızın sayca çoxalmasına, gənclərimizin mənəvi-əxlaqi əxlaqi cəhətdən pozulmalarına və digər xoşagəlməz amillərin əmələ gəlməsinə səbəb olur. Daha faciəli hal odur ki, hansısa mətbu orqan qeyd olunan ünvanların qanunsuzluğa söykənən fəaliyyətindən bəhs edərkən, çox keçmir ki, məbuatda “yengə rolunu” oynayan “yazarlar”, yüyülməmiş çömçə kimi ortaya atılırlar. Və həmin ünvanların müdafiəçisi rolunda da, çıxış edirlər.

Hörmətli oxucular! Bu gün belə bir olayların yaşanması nəinki faciəmiz, hətta deyərdik ki, ən böyük bəlalarımızdan biridir. Bir mətbu orqan olaraq çalışacağıq ki, fəaliyyəti qanunla qadağan edilən belə bir ünvanların qanunsuzluğa söykənən fəaliyyətləri haqda, bundan sonra da araşdırmalarımızı davam etdirək. Çünki, bu bizim həm vətəndaş borcumuz, həm də ki, ümumi vəziyyəti görüb bu cür reallıqla barışmadığımız yanaşmamızın varlığıdır.

P.S Növbəti sayımızda daha geniş açıqlamalarla, xüsusilə də şəhərimizin müxtəlif ünvanlarında qeyri-qanuni fəaliyyət göstərən obyektlərdə yaşanan olaylardan, qol qoyulan qanunsuzluq əməllərindən, eyni zamanda həmkarımızı ölümlə və fiziki güclə hədələyən şəxslərin əməllərindən bəhs etməyə çalışacağıq. Qeyd olunan ünvanlarda yaşananlarla bağlı video görüntülərə, GündemXeber.az saytında izləyə bilərsiniz.

gundemxeber.az