Qəbiristanlığı dağıdanın atası çəbhəçi kimi təqdim
olunsa da YAP-çı imiş, “Rayon İcra Hakimiyyəti
onu «Heydər parkı»na bağban kimi işə götürüb”

Baş verənlərin PA ictimai-siyasi şöbəsinin müdirinin qohumu olan polis rəisi ilə bağlı olduğu deyilir

Saatlı rayonunda 81 qəbir daşını aşırıb dağıdan şəxslərdən biri haqda maraqlı məlumat almışıq. Rayondakı mənbələrdən daxil olan məlumatda deyilir ki, qəbir daşlarını dağıdanlardan Nəsimi Əliyevin atası Arif Əliyev Rayon İcra Hakimiyyətinin önündəki bağın bağbanıdır və 2003-cü ildən YAP-ın üzvüdür.
Xatırladaq ki, fevralın 23-dən 24-nə keçən gecə rayonun Musalı kənd qəbiristanlığında başdaşıları dağıdılıb, sonradan bunu edənlərin kənd sakinləri, 1987-ci il təvəllüdlü işsiz Əliyev Nəsimi Arif oğlu və 1989-cu il təvəllüdlü Məmmədov Ədalət Səxavət oğlu olduğu müəyyən edilib və onlar şübhəli şəxs qismində saxlanılıblar. Onlar hadisəni sərxoş halda törətdiklərini etiraf ediblər. Faktla bağlı cinayət işi açılıb və hazırda istintaq aparılır. Bunun ardınca hökumətyönlü “Trend” agentliyi hadisəni AXCP-nin üzərinə ataraq məlumat yayıb ki, guya hadisəni törədənlər AXCP rəhbərliyi tərəfindən “rayonda sabitliyi pozmaq, rayon sakinləri arasında süni narazılıq yaratmaq məqsədilə” bu işə cəlb edilib. Agentlik hadisəni törədənlərdən Nəsimi Əliyevin atası Arif Əliyevin “rayonda daim vəzifəli şəxsləri şantaj etməklə mənfəət əldə etməyə çalışan” adam kimi tanındığını da əlavə edib. Agentliyin bu xəbəri telekanallarda da yayılıb. Bundan başqa, N.Əliyevin atası A.Əliyevin əvvəllər AXCP üzvü olduğu vurğulanıb.
Bizi bilgiləndirən mənbənin sözlərinə görə baş verənlər əvvəlcədən və xüsusi şəkildə təşkil olunub. Mənbəmizin iddiasına görə hadisədən məhz rayon polis şöbəsinin rəhbərliyinin birbaşa müdaxiləsi və təşəbbüsü ilə AXCP əleyhinə istifadə olunub. Bu məlumatda ən diqqət çəkən məqam Saatlı Rayon Polis Şöbəsinin rəisi ilə bağlı məqamdır. Beləki, rayonun polis rəisi Cəbrayıl Vəliyev əvvəllər Binəqədi rayon Polis İdarəsinin 5-ci Polis Bölməsinin rəisi vəzifəsində çalışıb və ötən ilin yayında Saatlıya təyinat alıb. Cəbrayıl Vəliyev Prezident Adminstrasiyası ictimai-siyasi şöbəsinin müdiri Əli Həsənovun qaynıdır. Nəticə etibarı ilə AXCP və onun rəhbəri Əli Kərimliyə qarşı yönləndirən bu olayın arxasından Əli Həsənovun adının çıxması müəyyən şübhələr yaradır.
Xatırladaq ki, bundan əvvəl Ə.Kərimliyə qarşı digər qara piar kompaniyalarında da PA işçisinin adı hallanmışdı. Mənbəmiz bildirir ki, PA rəhbəri Ramiz Mehdiyevin tövsiyyəsi ilə hərəkətə keçən və Əli Həsənovun baş rolda oynadığı bu oyunun əsas məqsədi isə prezident İlham Əliyevə bəzi mətləbləri çatdırmaqdır. İlk növbədə prezidentə məhz onu çatdırmaq istəyirlər ki, Ramiz Mehdiyev çox böyük gücdür və istənilən halda onunla hesablaşmaq lazımdır. Xatırladaq ki, son günlər PA rəhbərinin sıxışdırılması yönündə ardıcıl tədbirlər həyata keçirilir və indi Elçibəyin qardaşıoğlunun hakimiyyətin işinə çox yarayan açıqlamasının alınması onun zəifləyən mövqelərini kifayət qədər möhkəmləndirə bilər. Ramiz Mehdiyevin «vurulacağı» halda isə Əli Həsənov bunu öz aktivinə yazmaqla Paşayevlər qruplaşmasında yer alması üçün istifadə etməyə çalışacaq. Göründüyü kimi əslində çox qeyri ciddi görünən bu gedişlərin arxasında böyük oyunun epizodları gizlənib və təəssüfləndirici haldır ki, kimlərsə bu epizodların baş rolunda oynamaq üçün növbə gözləyirlər.

Elçin