Azər Bayramovun, Nadir Qarayevin və Namiq Məmmədovun işbirliyi, dövlət büdcəsinin çökdürülməsində xüsusi rol oynayır
Respublikamızın qərb zonasında yerləşən rayonlardan biri olan Gədəbəyin adı, artıq uzun illərdir ki, dillər əzbəridir. Amma, bu gün bu rayonun dərdi uzun, yaraları isə sağalmazdır desək, yəqin ki, yanılmarıq. Buna səbəb, rayonda yaşanan ab-havanın varlığı, həyata keçirilən idarəçiliyin mahiyyəti, ən əsası təmiz havası, sərin suları ilə sayılıb seçilən Gədəbəyin sanki “girovluq”da saxlanmasıdır. Bəlkə də, səslənən fikrin bu cür ifadə olunmasını oxuyan hər kəs, ilk anda təəccüb içində də qalar. Amma heç də təəccüblənməyə dəyməz. Çünki, hal-hazırda Gədəbəydə elə bir maxinasiyalara, elə bir qanunsuzluqlara, elə bir müdhiş əməllərə və.s qol qoyulur ki, baş verənləri eşidib bilən hər kəs, sanki baş götürüb qaçmağa ünvan da axtarır.
Bir məqamı xüsusi qeyd etmək yerinə düşər ki, hal-hazırda Gədəbəydə vəzifə sahibi olanlar içərisində, rayonun maliyyə idarəsinə rəhbərlik edən Namiq Məmmədovun müstəsna çəkisi, baş verən proseslərə təsir edə biləcək imkanları olduqca genişdir. Buna səbəb, onun uzun müddətdən bəri gəlirli bir sahəyə rəhbərlik etməsi və külli miqdarda var-dövlətə də sahib olmasıdır. Məsələn, bu gün o, rayonun rəhbəri olmasa da, əslində icra başçısına bərabər söz sahibidir. Belə bir səbəblər üzündəndir ki, rayonda kimin hansı vəzifəni daşımasında, kimin daşıdığı vəzifəsinə “əlvida” deməsində Namiq Məmmədovun sözü, sözün həqiqi mənasında keçərli olur.
Bundan əlavə, “maliyyə şefi”nin yuxarı dairələrdə vəzifə sahibi olanlarla sıx bağlılığının olması da, ona geniş “əl-qol açmağa” imkanlar açır. Məsələn, bu haqda məlumatları “Gündəm Xəbər”ə çatdıran mənbə bildirir ki, Maliyyə Nazirliyinin Dövlət Xəzinədarlığı Agentliyinin 1 saylı Xəzinədarlıq İdarəsinin rəisi Nadir Qarayev, nazir müavini Azər Bayramovun ən yaxın adamlarından biri hesab olunur və o, Bakı şəhərində olan maliyyə maxinasiyalarının hamısını, məhz Azər Bayramovun vasitəsilə həyata keçirir. Bundan əlavə Namiq Məmmədov da, Azər Bayramovun ən yaxın adamı və həmyerlisi olan vəzifə sahibidir. Məhz, belə bir bağlılığın nəticəsidir ki, onun qol qoyduğu qanunsuzluqlar heç bir halda bitib tükənmir. Buna Gədəbəydə qol qoyulan maliyyə maxinasiyalarını misal çəkə bilərik.
Ümumiyyətlə, Namiq müəllimin arxa-dayağı hesab olunan Azər Bayramov faktoru olduqca güclü faktor hesab olunur və o, bu gün özünü bir növ Ramiz Yediyarovun yerində də hiss edir. Yəqin ki, bu heç də elə-belə məsələ deyil. Əgər bu yöndə rayon sakinləri arasında müəyyən sorğular keçirilərsə, yaxud da lazımi araşdırmalar aparılsa, o halda söylədiklərimiz yəqin ki, yüz faiz təsdiqini də tapar.
Onu da qeyd edək ki, nazir müavininin yaxın dostu və həmyerlisi olan bu şəxs, həyata keçirdiyi maliyyə maxinasiyalarını əksər hallarda Azər Bayramova arxayın olaraq, çox rahatlıqla da həyata keçirə bilir. Yəni, keçirilən tender əməliyyatlarında milyon manatlarla vəsaitlər, çox zaman onlara yaxın MMC-ə köçürülür və çox keçmədən də mənimsənilir.
Bir məqamı da vurğulayaq ki, Azər Bayramova arxayın olan Namiq Məmmədov, Gədəbəyin kənd və qəsəbələrində adı olub özü olmayan mədəniyyət evlərinə, kitabxanalara və bir çox tibb məntəqələrinə büdcədən hər ay külli miqdarda maliyyə vəsaiti ayırır və həmin vəsaitləri də çox keçmir ki, şəxsi büdcəsinə “yönəldir”. Bu yöndə apardığımız müəyyən araşdırmalar zamanı o da bəlli oldu ki, rayonun kənd və qəsəbələrində elə mədəniyyət evləri, kitabxanalar, tibb məntəqələri var ki, onlar ümumiyyətlə fəaliyyət göstərmirlər.
Diqqəti o hal da cəlb edir ki, adı çəkilən qurum rəhbərlərinin çoxu, Namiq Məmmədova bu və ya digər yollarla bağlı olan şəxslərdirlər. Məsələn, buna misal olaraq Gədəbəy rayon mədəniyyət evinin rəhbəri Ramiz Məmmədovun, Namiq Məmmədovla əmioğlu olduğunu deyə bilərik. Belə bir səbəblər üzündəndir ki, bu gün də Namiq Məmmədov dövlət büdcəsindən adı olub özü olmayan qurumlara çox rahatlıqla maliyyə vəsaitlərini ayırmaqdan heç də çəkinmir. Yəqin ki, ona arxa-dayaq olan Azər Bayramov faktoru olmasa, yəqin ki, o, bu cür addımlarını heç cür ata bilməz.
“Gündəm Xəbər”ə verilən məlumatlarda o da bildirilir ki, Azər müəllim Namiq Məmmədova elə bir imkan da verib ki, o bir kimsədən ehtiyat etmədən, çəkinmədən dövlət büdcəsindəki pulları çox asanlıqla silə bilir. Onun bu cür addımları atmaqla külli miqdarda var-dövlətə sahib olması, yəqin ki, Namiq müəllimin özünü yaxın gələcəkdə icra başçısı vəzifəsinə hazırlamasıdır. Sözsüz ki, bütün bunların fonunda əksər gədəbəylilər iddia edirlər ki, Gədəbəydə yaşanan faciələrin əsas günahkarı, məhz Namiq Məmmədov faktorunun varlığıdır.
Gədəbəydə gədəbəyli sahibkarlara divan tutulur
Ümumiyyətlə, son illər bu rayonda yaşananlar daha geniş ictimai müzakirəyə səbəb olan mövzulardan birinə də çevrilib. Daha dəhşətli hal isə, əslən Gədəbəydən olan sahibkarların minbir müsibətlərlə üz-üzə qalmalarıdır ki, yaşanan problemlər də, hələ ki, sahibkarları Gədəbəylə Prezident Administrasiyası arasında qoyub. Bu haqda məlumatları “Gündəm Xəbər” çatdıran rayon sakinləri, o cümlədən Əliyeva Aybəniz Ramazan qızı da bildirir ki, “bir-iki il bundan əvvəl rayonda aparılan abadlıq işləri adı altında neçə-neçə sahibkarlara məxsus obyektlər darmadağın edildi. Müəyyən ərazilərdə təmir-bərpa işləri görülsə də, əslində atılan addımlar yeni-yeni problemlərin əmələ gəlməsi ilə də nəticələndi. Yəni, sahibkarlara məxsus obyektlər viran edildikdən sonra, onlara sahib olduqları əmlaklarının müqabilində nə obyekt verdilər, nə də ki, ödəyəcəkləri kompensasiyanı ödədilər”.
Rayon rəhbərliyinin yarıtmaz idarəçiliyindən zinhara gələn və hələ də haqqına qovuşa bilməyənlərdən biri də, yuxarıda adını qeyd etdiyimiz Əliyeva Aybəniz Ramazan qızıgilin ailəsidir. Məsələn, bir-iki gün bundan öncə o, “Gündəm Xəbər” qəzetinin redaksiyasına ünvanladığı müraciətində yazır ki, “biz bu gün ailəlikcə baş götürüb qaçmağa sanki ünvan axtarırıq. Çünki, Gədəbəydə haqq-ədalət “qeybə çəkilb”. Yəni, onu qeyd edim ki, Gədəbəy rayon İcra Hakimiyyəti başçısının 16 iyun 1998-ci il tarixli 143 saylı sərəncamı ilə həyat yoldaşım Səfərov Vaqif Qara oğluna 26 sot torpaq sahəsi verilmişdi. Həmin torpaq sahəsindən yüz maşın zibil daşıtdırıb, ətrafına 1m 70 sm hündürlüyündə hasar da çəkdirmişdik. Ərazinin içərisində 150kvm-lik obyekt də tikdirmişdik ki, həmin obyektdən də 8 ailə çörəkpulu qazanırdı. 2013-cü ildə bizə xəbər gəldi ki, icra başçısı və onun əlaltıları qanuni sənəd-sübutla sahib olduğumuz torpaq sahəsini ələ keçirmək və həmin ərazidə özlərinə yeni ticarət mərkəzi inşa etdirmək niyyətinə düşüblər. Çox keçmədi ki, sahib olduğumuz 26 sot torpaq sahəsi əlimizdən alındı və inşa etdirdiyimiz obyektimiz içərisindəki avadanlıqlarla birlikdə darmadağın da edildi. Bəhanə də onu gətirdilər ki, ərazidən yüksək gərginlikli elektrik xətləri keçir.
Təəssüf doğuran hal odur ki, rayon rəhbərliyinin qol qoyduğu qanunsuzluq əməllərindən aidiyyəti orqanlara dəfələrlə məktub və teleqrammalar vursaq da, bir kimsə üzləşdiyimiz problemin həlli ilə maraqlanmadı. Əksinə, ailəmizə olan hədələr, təhdidlər daha da çoxaldı. Vəziyyət o həddə gəlib çatdı ki, hətta oğlumuzu rayondan çıxartmağa da məcbur olduq.

Vəzifə sahibi olanlar nə Allah-Təaladan, nə də ki, qanunu aliliyindən qorxdular
Növbəti hədəf isə, şəhər 1 saylı tam orta məktəbdə təsərrüfat işləri üzrə direktor müavini işləyən və dörd uşaq anası olan gəlnimin işindən uzaqlaşdırılması oldu. Övladlarından biri həqiqi hərbi xidmətdə olan, başqa birisi ödənişli ali təhsil ocağında ali təhsil alan, digər ikisi isə azyaşlı və əkiz olan gəlnimin 180 manat maaşına qənim kəsilənlər, nə Allah-Təaladan, nə də ki, qanunun aliliyindən qorxdular.
Yəni, azyaşlı övladlarından biri 29 mart 2015-cil tarixdən 30 aprel 2015-ci il tarixə qədər xəstəxanada müalicə olunan gəlinim, 13 may 2015-ci il tarixdə işindən uzaqlaşdırıldı. Baxmayaraq ki, o, xəstəxanadan məktəb direktoruna lazımi arayış təqdim etsə də, icra başçısının verdiyi tapşırıq təqdim olunan arayışın əhəmiyyətini heçə endirir və gəlnim daşıdığı vəzifəsindən uzaqlaşdırılır.
Faciəli hal odur ki, gəlnimin təqdim etdiyi arayışı məktəb direktoru saxta hesab edir, arayışı təsdiq edən həkim isə, onun qanuni olduğunu isbata yetirir. Son anda o da bəlli oldu ki, təsdiq olunan bülleten saxta deyil, sadəcə olaraq belə bir yanaşma rayon rəhbərliyinin verdiyi sifarişdir”.
Bəli, bütün bunlar ucqar bir dağlıq rayonunda yaşananlardır ki, bunlar da icra başçısının həyata keçirdiyi idarəçilik nəticəsində hələ ki, yaşadılmaqdadır. Yəni, bu rayonda yalan ayaq tutub yeriyir, nahaqq haqqa qalib gəlir, vəzifə və söz sahibi olanlar imkansızları, arxa-dayağı olmayan sahibkarları gözümçıxdıya salıb minbir iztiraba təhrik edirlər. Əslində bu cür idarəçilik xalqına, dövlətinə qənim kəsilməkdən başqa bir şey deyil.
Araşdırmamız davam edəcək.

Akif Quliyev
“Gündəm Xəbər”