Səbayel Rayon Prokurorluğunda işləyən Vüsal Kazımovun maşın kolleksiyası tirajlandı, Baş Prokurorluq işə qarışdı; atası Xaqani Kazımovun da şok biznesi açıqlandı

Məmurların və övladlarının dəbdəbəli həyat tərzini əks etdirən daha bir fakt ifşa olundu. Bu dəfə Səbayel Rayon Prokurorluğunda işləyən Vüsal Kazımovun fotoları yayılan maşın kolleksiyası elektron mediada yayımlandı.

SOCAR-ın məmuru Qiymət Mehdiyevin xanımının adına 16 villanın olduğu sənədlərin ictimailəşməsinin ardınca V.Kazımov gündəmə bomba kimi düşdü. “Gündəm-xəbər”in məlumatına görə, V.Kazımov Azəryolservis ASC-nin 71 saylı Yol İstismarı İdarəsinin sabiq rəisi Xaqani Kazımovun oğludur.

X.Kazımov hazırda Azəryolservis ASC-də mühüm post tutur. O, 2013-cü ilə qədər nəqliyyat naziri Ziya Məmmədova yaxınlığı ilə seçilib. Son illərdə isə Cavid Qurbanovun klanında yer aldığı iddia olunur. Onun prokurorluqda işləyən oğlu isə aldığı “maaş” hesabına qiyməti milyonlarla ölçülən maşın kolleksiyasına sahiblənib.

Prezidentin məmurlara “Naz Lifan” sürməyi tövsiyə etdiyi bir vaxtda məmurun məmur oğlunun fantastik qiymətdə olan maşınlarının şəkilləri saytlarda tirajlanır. Bu da dövlət başçısının tapşırıqlarına, xəbərdarlıqlarına məhəl qoymayan Kazımovların təkcə daşınan mülkləridir.

Bahalı kolleksiyada Dubay şəhərinin seriya nömrəsi olan avtomobil də var. V.Kazımovun 2012-ci il sentyabrın 27-də Dubayda olduğunu təsdiqləyən vizasının şəkli də yayılıb.

Avtomobil kolleksiyasında diqqət çəkən nüans bütün maşınların seriyasının “EF” hərfləri ilə başlamasıdır. V.Kazımovun Dubay nömrə nişanlı avtomobilində də “F” seriyası var. Onun maşın həvəskarı olduğu və kolleksiyasını hər il yenilədiyi qeyd olunur.

Vüsal Kazımov haqda yayılan xəbərlərlə bağlı rəsmi açıqlama veriləcək. Bunu Baş Prokurorluğun mətbuat xidmətinin rəhbəri Eldar Sultanov deyib. Əldə etdiyimiz məlumata görə, X.Kazımovun "Kavkaz-L” MMC firması var.

Şirkət yol təmiri işləri görür. Bu şirkətin adı əvvəllər "Kəpəz-V” MMC adlanırdı və sədri Xaqani Kazımovun qardaşı İsmət Cabbarov idi. 2011-2012 ci illərdə yoxlamalar nəticəsində böyük yeyinti aşkarlandı və 2013-cü ildə "Kavkaz-L” MMC adı ilə yenidən fəaliyyətə başladı.

Sədr isə İlqar Süleymanov oldu. Xaqani Kazımovun Gəncədə, Mingəçevirdə, Tərtərdə və İsmayıllıda qum-çınqıl karxanaları, asfalt zavodu var. Sumqayıtda isə şəxsi yol istismar idarəsi var.

Məlumatda qeyd olunur ki, Xaqanı Kazımov “Azəryolservis” ASC-nin rəhbəri Cavid Qurbanova ən yaxın şəxslərdən biridir və Cavid Qurbanovun Nəqliyyat Naziri ilə problemlərinin başlanğıcı da məhz Xaqani Kazımovun sayəsində yaranıb.

Belə ki, Dərnəgüldəki ən böyük asfalt zavodunun direktoru olan Xaqani Kazımov Cavid Qurbanovla dostluq münasibətlərindən yararlanaraq ölkənin əsas yollarının çəkilməsində asfaltın onun zavodundan alınmasını təmin edə bilib.

Ölkənin əsas yol çəkilişlərini bir qayda olaraq Cavid Qurbanovla Xaqani Kazımov həyata keçirir. Yolların tez sıradan çıxmasının səbəbi isə asfaltın keyfiyyətsiz olmasıdır və bu məsələ Ziya Məmmədovla Cavid Qurbanovun arasında problemin yaranmasına səbəb olub.

Ziya Məmmədov Cavid Qurbanovdan Xaqani Kazımovla işləməkdən imtina etməyi istəsə də, “Azəryolservis” ASC-nin şefi bundan imtina edib. Əvəzində isə Ziya Məmmədov Xaqani Kazımovun asfalt zavodunu başqa yerə köçürülməsi adı altında sökdürüb.

Qeyd edək ki, Azərbaycan Prezidenti İlham Əliyevin Naxçıvanda istehsal edilən “Naz Lifan” maşınları ilə bağlı verdiyi açıqlama hələ də gündəmin müzakirə mövzularındandır.

"Bizim Naxçıvanda avtomobil zavodumuz var, dövlət qurumları oradan alsınlar. Yaxşı da maşınlardır. Heç xarici maşından o qədər də fərqlənmir", - deyən prezidentin çağırışına bəzi məmurların qulaq asdığı deyilir.

Rafiq Qara

gundemxeber.az