Hakimiyyət istəmir ki, seçkilər zamanı edəcəyi saxtakarlıq
bu təşkilatlar vasitəsilə bütün dünyaya çatdırılsın”

Son günlər Azərbaycan iqtidarı Milli Demokratiya İnstitutu və bir sıra digər beynəlxalq təşkilatılara qarşı açıq hücuma keçərək, bu təşkilatları ölkəmizdə hakimiyyət çevrilişinə cəhddə ittiham edir. Odur ki, prezident seçkilərinə bir neçə ay qalmış hakimiyyətin beynəlxalq təşkilatlara qarşı belə bir savaş elan etməsi ictimai-siyasi çevrələrdə fərqli mülahizələrə yol açıb. Belə ki, bəzi siyasilərin fikrincə, Milli Demokratiya İnstitutuna qarşı Prezident Administrasiyası və Baş Prokuroluq səviyyəsində etiraz rəsmi Bakının Qərbə meydan sulaması kimi qiymətləndirilməlidir. Onların qənaətinə görə, rəsmi Bakı Qərbə məxsus təşkilatları ciddi şəkildə sıxışdırmaqla qarşı tərəfə kifayət qədər güclü olduğunu “isbatlamağa”, onu Azərbaycan daxilində proseslərə müdaxilədən çəkindirməyə çalışır. Həmçinin, Qərbə qarşı əzələ nümayiş etdirən hakimiyyət bu təşkilatlara prezident seçkilərinə müdaxilə etməməyi “məsləhət görür”.
Bəzi ekspertlər isə hesab edir ki, baş verənlərin arxasında hakimiyyətdəki Rusiyameylli qüvvələr dayanır. Yəni Qərbin Azərbaycandakı aparıcı təşkilatlarının fəaliyyətini zəiflətməkdə maraqlı olan Rusiyameylli qüvvələr bu cür hücumlarla bütövlükdə Qərbi oyundankənar vəziyyətdə qoymağa çalışır. Hansı ki, bu da daha çox Rusiyanın maraqlarına cavab verir. Odur ki, bu qəbildən olan siyasilər Qərb institutlarının məhz Rusiyanın xeyir-duası ilə vurulması qənaətindədir.
İlk versiyaya görə baş verənləri nə hakimiyyətin Qərbə meydan oxuması kimi qiymətləndirmək, nə də hakimiyyətdəki Rusiyameylli qüvvələrlə əlaqələndirmək doğru deyil. Baş verənləri Azərbaycan hakimiyyətinin Qərbə meydan oxuması kimi dəyərləndirmək doğru deyil. Reallıq bundan ibarətdir ki, Qərblə Azərbaycan arasında geniş əməkdaşlıq layihəsi var və Qərb bu əməkdaşlıqda maraqlıdır. Bugünün özündə də Qərb Azərbaycanla dəyəri milyardlarla ölçüləcək əməkdaşlıq layihələri həyata keçirir və bu gəlirdən 100-200 min manat vəsaiti vətəndaş cəmiyyətlərinə verir. Belə bir yardımda məqsəd söz azadlığı, demokratik seçki və s. kimi proseslərə dəstək verməkdən ibarətdir. Hakimiyyət isə Qərbə bildirir ki, Azərbaycanla əməkdaşlıqdan milyardlarla gəlir əldə edirsiniz, biz Azərbaycanın ağası olaraq sizə bu imkanı yaratmışıq, siz isə bizi hakimiyyətdən hüquqi, konstitusion yolla uzaqlaşdırmağa çalışan ictimai- siyasi təşkilatlara dəstək verirsiniz.
Hakimiyyət Azərbaycanda demokratik dəyişiklərə nail olmağa çalışan qüvvələrin maddi təminatını zəiflətməyə, onların maddi baxımdan güclənməsinə imkan verməməyə çalışır və iqtidarın Qərb qarşısında qoyduğu başlıca tələb də məhz bundan ibarətdir. Hakimiyyət Qərbin məlum mövqeyi ilə razılaşmadığını iddia edir və Qərbdən tələb edir ki, hakimiyyətə itaət etməyən, hakimiyyətin oğru, xəyanətkar siyasətinə etiraz edən vətəndaşlara bir qəpik belə verməsin. Azərbaycan hakimiyyətinin mövqeyi bundan ibarətdir. Bu, qarşıdurma və ya Qərbə meydan oxumaq deyil. Bu, sadəcə olaraq öz mövqeyini açıq-aşkar surətdə nümayiş etdirməkdir. Buna görə də prosesləri kənar qüvvələrlə əlaqələndirmək düzgün deyil.
Əgər Azərbaycan Qərblə ciddi qarşıdurmada maraqlı olsaydı, o zaman daha təsirli addımlar atardı. Lakin rəsmi Bakının Qərbdə böyük narazılığa səbəb olacaq bu cür addımlardan çəkinməsi Qərblə uzunmüddətli savaşın hakimiyyətin özü üçün də sərfəli olmadığını göstərir. Qərb də öz növbəsində anlayır ki, əgər Azərbaycan hakimiyyəti onunla nəhəng əməkdaşlığa gedirsə, bu əməkdaşlığı davam etdirirsə, deməli heç də ona meydan sulamır. Əgər Azərbaycan hakimiyyəti sözün həqiqi mənasında Qərbə meydan sulasaydı, o zaman daha ciddi addımlar atardı. Məsələn, dollardan manata və ya qızıl valyutaya keçərdi. Lakin biz neftimizi dollarla satırıq, Qərbin ümumi şərti yerinə yetirilir. Pullarımızı Qərb banklarında saxlayırıq. Bu pullar orada qiymətdən düşür, məzənnəsi itir və prinsip etibarilə Qərb iqtisadiyyatının maliyyələşməsinə sərf olunur. Bütün bunların hamısı Qərbin diktəsi ilə edilir. Bu isə onu göstərir ki, hakimiyyətin Qərbə savaş elan etməsi ilə bağlı səslənən fikirlərin heç bir əsası yoxdur.
Azərbaycan hakimiyyəti kifayət qədər itaətkardır və bu gün rəsmi Bakı ilə Qərb arasında yaşanan anlaşılmazlıq ciddi qarşıdurma kimi xarakterizə edilməməlidir. Bizdə lazımınca sözəbaxan hökumət var. Sadəcə hökumət istəmir ki, o cibini doldurduğu, ölkəni qarət etdiyi bir vaxtda kimsə gəlib vətəndaşlara dəstək versin və onların hakimiyyətə müqavimət göstərməsinə şərait yaratsın. Baş verənlərin mahiyyəti bundan ibarətdir. Bunun xaricində hər hansı bir qarşıdurma və ya meydan sulama halı yoxdur.
Bütün hallarda isə son günlər hakimiyyətin Milli Demokratiya İnstitutu və digər beynəlxalq təşkilatlara qarşı siyasi hücumlar təşkil etməsi qarşıdakı prezident seçkiləri ilə bağlıdır. Seçkilərin nəticəsini saxtalaşdırmağa çalışan hakimiyyət bu saxtakarlığa mane olacaq əsas qüvvələri – sözügedən beynəlxalq təşkilatları Azərbaycandan çıxartmaqla öz niyyətinə çatmaq üçün əlverişli zəmin formalaşdırmağa çalışır. Son bir neçə gündür ki, hakimiyyətin təşvişə düşməsi əbəs deyil. Hakimiyyət istəyir ki, Qərbin Azərbaycanda fəaliyyət göstərən və seçki ilə məşğul olan, seçkiləri müşahidə edən təşkilatlarla münasibətləri pozsun və onları ölkədən çıxartsın. Məhz bundan sonra, yəni prezident seçkiləri zamanı seçkiləri saxtalaşdırsın və həmin təşkilatlar üçün bu prosesə müdaxilə əlçatmaz olsun. Qərb institutlartının Azərbaycanda saıxışdırılması siyasətinin arxasında bu niyyət dayanır.

“Siyasət şöbəsi”