Müxalif partiya ölkənin xilasını yalnız bu iqtidarın
siyasi səhnəni tərk etməsində gördüyünü bildirir

Müsavat Partiyasının Məclisi son zamanlar ölkədəki həbslər və “offşor bank hesabları” kimi iki aktual məsələyə münasibətini ifadə edən bəyanat qəbul edib. Sənəddə son zamanlar ölkədə müxtəlif təbəqələrin etiraz aksiyası təşkil etmələri iqitidarın ozbaşınalığı ilə əlaqələndirilir. Bununla bağlı iqtidarın kütləvi repressiyalara əl atması xalq önündə qorxusunun nəticəsi adlandırılır. “Əsgər ölümlərinə son” silsilə etiraz aksiyalarında iştirakçılara yüksək cərimələrin tətbiq olunması, bu iştirakçıların ailələrinə məxsus əşyaların müsadirə edilməsi faktlarının artdğı nəzərə çatdırılır. “Binə” Ticarət Mərkəzində, İsmayıllıda baş verən hadisələrə görə həbslər günahsız insanların həbsi sayılır. Ölkədə fəaliyyət göstərən beynəlxalq qurumların işinə rəsmi Bakının müdaxiləsi “seçki ilində iqtidarın beynəlxalq qurumlara güc nümayişi” kimi dəyərləndirilir. “NİDA” gənclər hərəkatının 7 üzvünün, dini nümayəndələrin həbsi ölkədə siyasi fəallaşmanın qarşısının alınması hesab edilir.
Müsavat Partiyası son zamanlar demokratik düşərgənin təmsilçilərinə artan fiziki zorkılıqları iqtidarın kütləvi etiraz aksiyalarının qarşısını almaq, xalqı qorxu içində saxlamaq göstəricisi kimi qiymətləndirir. Sənəddə bu həbslərin siyasi xarakterli olduğu vurğulanır. Müəllfilər iqtidardan belə həbslərə son qoymağı, həbs edilənlərin dərhal azadlığa buraxılmasını tələb edirlər.
“Offşor bank hesabları” ilə bağlı bəyanatda deyilir ki, belə gizli hesablarda Azərbaycanin dövlət başçısının özü və ailə üzvləri haqqında ciddi faktlar yer alıb. Hakim ailəyə məxsus bu vəsaitləri Azərbaycanda fəaliyyət göstərən “Azərsun Holdinq”in başçısının qardaşı Hasan Gözəl idarə edir. Həm də “Azərsun Holdinq”in ailəyə məxsus olması haqda sənədlər yayılıb.
Müəlliflər Azərbaycanın dövlət başçısı və ailə üzvlərinin adlarının belə beynəlxalq qalmaqallarda hallanmasının ilk dəfə olmamasına diqqət çəkir. Bir neçə il öncə dövlət başçısının qızlarının və azyaşlı oğlunun adına Dubayda ümumi dəyəri 75 milyon dollar olan villa alınması haqda “Vaşinqton Post” qəzetində dərc edilən məqalə xatırladılır. Amma həmin vaxt cəmiyyətin tələb etməsinə baxmayaraq bu məsələyə aydınlıq gətirilmədi.
Müəlliflər bu gün ölkəni hər sahədə bürümüş dərin böhranın ən birinci səbəbi kimi korrupsiyanı göstərirlər. Ölkə içində və xaricində iqtidardan uzun illərdir ki, korrupsiya ilə ciddi mübarizə aparmaq tələb olunsa da bu tələblərə məhəl qoyulmur. Buna görə də 20 ildən çoxdur ki, ölkə idarəçiliyinin başında oturan şəxslər islahat barədə düşünmək belə istəmirlər.
Son olaraq müəlliflər ölkənin xilasını yalnız bu iqtidarın siyasi səhnəni tərk etməsində gördüyünü bildirir və bu iqtidarın istefaya getməsini tələb edirlər.