Ramiz Mehdiyevin gücdən salınması onun kadrlarının da sıradan çıxarılması ilə nəticələnir

gundemxeber.az Son zamanlar Prezident Adminstrasiyasının rəhbəri Ramiz Mehdiyevə qarşı apırılan hücum kampaniyası artıq öz müsbət nəticələrini verməkdədir. Uzun müddətdir ki, hakimiyyətin bir nömrəli problemi olan Mehdiyev artıq zərərsizləşdirilmək üzrədir, hər halda PA rəhbərinin əleyhinə göstərilən məqsədli fəaliyyətlə bağlı heç bir reaksiya nümayiş etdirməməsi belə düşünməyə əsas verir. İndi isə R.Mehdiyevin komandasının başlıca simalarının sıradan çıxarılmasına start verilib. Bu sırada isə PA-nın ictimai-siyasi şöbəsinin rəhbəri Əli Həsənovun əlində cəmləşdirdiyi səlahiyyətlərin alınması diqqəti daha çox cəlb edir.
«Gündəm-xəbər»i məlumatlandıran mənbənin sözlərinə görə, Əli Həsənovun əlində cəmləşdirdiyi mətbuat şəbəkəsinə qarşı hücum kampaniyası başlayıb və bu şəbəkənin bütövlükdə sıradan çıxarılması nəzərdə tutulub. Əli Həsənovun son müsahibəsində işlətdiyi fikirlər də bunun təsdiqi kimi çıxış edə bilər. Məlumat üçün bildirək ki, Əli Həsənov sözügedən müsahibəsində heç lüzüm olmadan özünün mərhum dövlət başçısının yaxın ətrafına aid olduğunu gözə soxmağa cəhd edib: «1990-cı ildə Heydər Əliyev Azərbaycana gələndə onu müşaiyyət edən üç nəfərdən biri mən idim». Maraqlıdır, Əli Həsənov heç zaman belə sentemental açıqlamalara ehtiyac duymayıb, bəs indi onu belə bir addım atmağa vadar edən səbəblər nə qədər ciddidir?
Bununla bağlı əldə etdiyimiz məlumatlarda bildirilir ki, artıq Əli Həsənovun özünə qarşı da hücumlar başlayıb və elə bu səbəbdən də onun özünü müdafiə etmək ehtiyacı yaranıb. Pa-nın şöbə müdirinə qarşı hücumların məqsədi isə onun nəzarəti altında olan mətbu şəbəkəni zərərsizləşdirməkdir. Azad Azərbaycan Televiziyasının (ATV) Mehdiyevçilər komandasınının üzvü Nazim İbrahimovlardan alınması isə sözügedən prosesin tərkib hissəsi sayılmalıdır. Qeyd edək ki, həmin proses elə ustalıqla qurulmuşdu ki, hətta qarşı tərəf müqavimət göstərməyə belə macal tapmadı. «Azad Azərbaycan» Teleradio Şirkətinin təsisçiləri mənim ailə üzvlərimdir» deyən komitə sədri əvvəlcə kanalın rəhbərliyinin başqa şəxsə verilməsini kadr dəyişikliyi kimi təqdim etməyə cəhd etdi. Bunun səbəbini isə, «telekanalın təsisçiləri ilə orada çalışan komanda arasında» televiziya yayımçılığına dair uzun müddətdir, davam edən müəyyən fikir ayrılığı (?-müəl.) ilə bağlamışdı: «Sonda təsisçilər tərəfindən komandanın yenilənməsi ilə bağlı qərar qəbul olundu. Hesab edirəm ki, yeni komanda Azərbaycan tamaşaçısının zövqünə uyğun, daha keyfiyyətli kanal quracaq. Bu dəyişiklik telekanalın inkişafına xidmət edəcək».
Ancaq N. İbrahimov bu açıqlamasında özü-özünü təkib edib. Bir tərəfdən deyir ki, kanalın təsisçiləri onun ailə üzvləridir, digər tərəfdən də təsisçilərlə kanalda çalışanlar arasında fikir ayrılığının olduğunu vurğulayır. Ancaq, nədənsə «unudur» ki, kanaldan gedənlərin başında elə ictimaiyyətə ATV-nin təsisçiləri sırasında təqdim olunan insan dayanır. Digər tərəfdən, baş verənlər göstərir ki, komandada heç bir yenilik aparılmayıb. Sadəcə telekanaldan Nazim İbrahimovun ailə üzvləri və onların yaxınları uzaqlaşdırılıb.
Qeyd edək ki, telekanalın rəhbərliyi tam şəkildə dəyişdirilib. Belə ki, Nazim İbrahimovun qardaşı Tağı İbrahimov ATV-nin prezidentliyindən uzaqlaşdırılıb, bu vəzifəyə əks düşərgənin adamı kimi tanınan Vüqar Qaradağlı təyin edilib. Bundan başqa, N.İbrahimovun digər qardaşı, ATV-nin vitse-prezidenti Natiq İbrahimov və digər vitse-prezident Həsən Abdullayev də vəzifələrindən azad ediliblər. Təcrübə göstərir ki, Azərbaycanda belə dəyişiklik o zaman aparılır ki, mülkiyyətin sahibi dəyişir. İndiki halda da bu təcrübəni istisna etmək üçün ortada heç bir tutarlı arqument mövcud deyil.
Bunun səbəblərinə toxunmazdan öncə qeyd edək ki, Nazim İbrahimovun belə dolaşıq açıqlama verməsi kanalın əllərindən alınması barədə qərarın onlar üçün nə qədər gözlənilməz olmasından xəbər verirdi. Redaksiyamıza daxil olan məlumata görə, qərar ən yüksək səviyyədə verilib və dərhal icra olunması taşırılıb. Mənbənin ehtimalına görə, qərarın icrası prezident tərəfindən məhz Nazim İbrahimova tapşırılıb. Məsələylə bağlı kanalın təsisçisi və prezidenti Tağı İbrahimovun deyil, Nazim İbrahimovun danışması da bununla bağlı idi. O da bildirilir ki, qərarın o qədər təcili yerinə yetirilməsi tapşırılıb ki, İbrahimov qardaşları rəhbərliyə kimin gətirilməsindən belə xəbərsiz olublar. Təsadüfi deyil ki, İbrahimov qardaşları kollektivlə vidalaşarkən, Natiq İbrahimov belə deyib: «Bilmirəm kim gəlir, amma biz getdik...».
İndi isə qayıdaq ATV-dəki fövqəladə dəyişikliyin səbəbinə. Son dövrlər baş verən bir sıra hadisələr kimi, bu dəyişikliyin də arxasında hakimiyyətdaxili mübarizə dayanırdı. Daha dəqiqi, Paşayevlərlə Prezident Administrasiyasının (PA) rəhbəri Ramiz Mehdiyevin başçılıq etdiyi «Naxçıvan klanı» arasında gedən mübarizə artıq ikincinin daha güclü olduğu media sektorunda da özünü göstərməyə başladı.
ATV ətrafında baş verənlərə bu qədər yer ayırmağımızın səbəbi isə prosesin məhz bu nöqtədən start götürməsidir. Məsələ ondadır ki, digər telekanallardan fərqli olaraq, ATV telekanalı birbaşa «Naxçıvan klanı»nın inhisarında idi. Bu kanalın faktiki təsisçisi kimi təqdim olunan Nazim İbrahimov «Naxçıvan klanı»nın üzdə olan təmsilçilərindən biridir. Mənbənin sözlərinə görə, aparılan dəyişikliklərdə də məqsəd, məhz kanalı Ramiz Mehdiyevin təsir dairəsindən çıxarmaq idi. Elə ATV-yə Vüqar Qaradağlının rəhbər gətirilməsi faktını qeyd etmək bu kanalın da Paşayevlərin nəzarətinə keçdiyini iddia etmək üçün yetərlidir. Xatırladaq ki, Vüqar Qaradağlı əvvəllər «Bizim əsr» və «Naş vek» qəzetlərinin baş redaktoru olub. «Radio Lider»in, «Lider» televiziyasının daxil olduqları «Media-Holdinq»in baş direktoru işləyib. «Lider» televiziyası və radiosunun təsisçilərinin içərisində isə prezidentin ailə üzvlərinin, o cümlədən ölkənin birinci xanımının olduğu bildirilir. Bütün bunları xatırlatmaqda məqsədimiz isə odur ki, ATV-nin rəhbərliyindən «Naxçıvan klanı»nın təmsilçiləri uzaqlaşdırılaraq, yerinə Paşayevlərin etibarlı adamı gətirilib.
Qeyd olunanlar baş verən dəyişikliyin prezident seçkisi öncəsi hakimiyyətdaxili qruplar arasında ziddiyyətlərin kəskinləşdiyini bir daha göstərir. Bu mübarizədə Paşayevlər rəqib düşərgəyə - Mehdiyevçilər qruplaşmasına daha bir zərbə vurmaqla, onları ən güclü olduqları sektordan belə sıxışdırmağa başlayıblar. Mötəbər mənbədən əldə ediyimiz məlumatlara görə, bu prosesin davamı da gələcək. Yaxın aylarda «Naxçıvan klanı»nı media sektorunda küncə sıxışdıracaq çox ciddi addımlar atılacaq. Elə Əli Həsənova qarşı başladılan təzyiq kampaniyasının arxasında da bu məqam dayanıb. Heç kimə sirr deyil ki, Mehdiyev komandasının «mətbu artileriyası» məhz Əli Həsənovun əlində cəmləşib.
Orxan