2013 seçkilərinə əngəl ola biləcək güclərə qarşı alternativ konsey
yaradılır; generallar və həbsdə olan sabiqlər bir araya gətirilir

“Milyarderlər ittifaqı”nın yaradılması, Rusiya və Qərbin hakimiyyətlə açıq konfliktə getməsi və bütün bunların fonunda daxili narazılıqların pik həddə matması Azərbaycan hakimiyyətini təxirəsalınmaz tədbirlər planı həyata keçirməyə vadar edir. Günü-gündən dərinləşən hakimiyyət böhranı isə seytnot təhlükəsindən xəbər verir. Baş verənlər siyasi hakimiyyəti komandasını dəyişməyə sövq edir. Lakin necə deyərlər, “atları döngələrdə dəyişmirlər”. Belə bir addım bönranı daha da dərinləşdirə bilərdi. Vəziyyəti ağırlaşdıran əsas amillərdən biri də “ehtiyat skamyası”nda “güclü hücumçular”ın yoxluğudur.
Alternativ hakimiyyət təsiri bağışlayan və hakim komandanı parçalayacaq qədər güclü görünən “Milyarderlər ittifaqı”na qarşı mübarizədə ciddi komandaya ehtiyac duyulur. Belə komanda hakim elitanı parçalanmaqdan qorumaq iqtidarında olmalıdır. Bu baxımdan, son zamanlar prezident İlham Əliyevin Heydər Əliyev iqtidarının güclü generallarını Bakıya yığması təsadüfə bənzəmir. Prezident Namiq Abbasovun Azərbaycanın Özbəkistan Respublikasında fövqəladə və səlahiyyətli səfiri vəzifəsindən geri çağırılması barədə sərəncam verib. Xatırladq ki, Namiq Abbasov 2004-cü ildə Milli Təhlükəsizlik naziri vəzifəsindən getdikdən sonra Özbəkistana səfir göndərilmişdi. Keçmiş MTN şefi bildirir ki, bundan sonra vaxtını ailəsinə, nəvələrinə həsr etmək arzusundadır. Lakin tezliklə general Abbasovun əsas missiyasının başlayacağını ehtimal etmək olar. Bundan başqa isə İlham Əliyev Tacikistan Respublikasında fövqəladə və səlahiyyətli səfir olan, paytaxt polisinin keçmiş rəisi general Məhərrəm Əliyevi də geri çağırıb və onu yüksək vəzifəyə təyin etmişdi.
Azərbaycan siyasi elitasında kifayət qədər nüfuza malik olan və hazırkı “əldəqayırma generallardan” fərqli olaraq “Naxçıvan klanı”nda real təsirləri olan bu iki şəxsin Bakıya qaytarılması hansısa ssenarilərin işə düşməsindən xəbər verir. Real güc və nüfuz sahibi olan iki ünlü simanın Bakıya qayıdışı mövqeləri zəifləməkdə olan “Naxçıvan qruplaşması”nda canfəşanlıqla qarşılanıb. Digər tərəfdən, Araz Ağalarov, Rüstəm İbrahimbəyov, Vahid Ələkbərov kimi güclü rəqibə qarşı keçmiş qarmon çalanlarla çıxmaq imkansız görünür. Bu baxımdan, döyüşə generalların göndərilməsi hakimiyyət daxilində müəyyən ümidlər yarada bilər. Lakin adıçəkilən şəxslərin real təsir dairələri olması üçün onların hakimiyyətdə təmsil olunmaları tələb olunur. Bu baxımdan, hər iki şəxsin yaxınlarda mühüm vəzifələrə gətiriləcəyi ehtimal edilir.
Vurğulayaq ki, vaxtilə istər ölkə daxilində, istərsə də xaricində Namiq Abbasovun adı Heydər Əliyevin siyasi varisi kimi hallandırılırdı. Müxalifətlə dialoq tərəfdarı olması, hakim klana mənsubluğu hakimiyyətin ağrısız ötürülməsini aktual edirdi. Məhz bu səbəbdən N.Abbasovun Qərb ölkələrinə səfərləri mütəmadi hal almışdı. Lakin “varis planı” dəyişdikdən sonra nüfuzlu, əlində “kompromat çantası” olan nazirin 2004-cü ildə ölkədən Özbəkistana “mədəni sürgünü” baş verdi. Artıq N.Abbasov Bakıya dönüb. Qərbin vaxtilə ümidlə baxdığı bu şəxs hazırkı siyasi elitaya öz xidmətlərini təklif edə bilər. Keçmiş MTN şefinin hansı simada hakimiyyəti təmsil edəcəyi barədə hələ dəqiq nəsə demək mümkün deyil. Lakin nüfuz və əlaqələri ona siyasi karyerasını indilərdə başa vurmağa imkan vermir.
Daha önəmli simalardan biri olan Məhərrəm Əliyevin güc nazirliklərinin birində rəhbər vəzifəyə gətirilə bilmək ehtimalı çoxdur. Xatırladaq ki, M.Əliyev 2005-ci ilin oktyabrından sonra hakimiyyətin “qara siyahısına” düşmüşdü. Lakin “siyasətdə daimi dost və düşmənlərin olmadığını, daimi maraqların olduğunu” nəzərə alsaq, M.Əliyevə yüksək post verilə biləcəyini ehtimal edə bilərik. Paytaxt polisinin sabiq rəisinin mühüm postla təmin olunması daha bir perspektivdən xəbər verə bilər. Xatırladaq kİ, M.Əliyev 2005-ci ilin oktyabrında həbs edilən sabiq səhiyyə naziri Əli İnsanovla qudadır. Bu amil 2007-ci ildən “diplomatik sürgün” həyatı yaşayan, “Naxçıvan klanı”nın nümayəndəsinə “yaşıl işıq” yandırır. Qeyd edək ki, Məhərrəm Əliyev keçmiş səhiyyə naziri Əli İnsanovun barəsində məhkəmə prosesi qurulan ərəfədə mətbuata verdiyi açıqlamasında da qudasını müdafiə etdiyini, onun dövlət çevrilişinə cəhd etdiyinə inanmadığını və onunla qohumluq əlaqələrini qoruduğunu bildirmişdi. M.Əliyevin indi Bakıya qaytarılması hakimiyyətin yeni kombinasiyalarından xəbər verir. M.Əliyevin zəmanəti ilə gələcək planda Ə.İnsanov həbsdən azad oluna və bunun müqabilində hazırkı iqtidarı dəstəkləyə bilər.
Burada daha bir məqama diqqət yetirmək lazım gəlir. “Milyarderlər ittifaqı”na yeni, güclü fiqurların qoşula biləcəyini nəzərə alan iqtidar oyuna daha bir güclü hücumçunu qoşa bilər. Bu, ölkənin keçmiş baş prokuroru, səfir Eldar Həsənovdur. Ölkədə xeyli dərəcədə nüfuzu olan, H.Əliyev hakimiyyətinin ən önəmli simalarından biri olan E. Həsənovun da yaxınlarda Bakıya çağırılacağı və mühüm dövlət postu ilə təmin olunacağı da gözlənilir. Daha mühüm addımlardan biri kimi keçmiş iqtisadi inkişaf naziri, “Amerikanın dostu” Fərhad Əliyevin həbsdən azad olunacağı və bunun müqabilində hakimiyyəti dəstəkləyəcəyi ehtimalıdır. Ehtimal etmək olar ki, istər “Milyarderlər ittifaqı”, istərsə də köhnə komanda üzvlərindən ibarət olacaq “Veteranlar Birliyi” müxalifətlə də əməkdaşlıqda maraqlı olacaq. Ən azı, ilkin mərhələdə belə bir əməkdaşlıq zəruri görünür. Heç olmasa, müxalifətin bir qanadı ilə belə bir əməkdaşlıq mümkündür.
Göründüyü kimi, ölkədə siyasi gedişlər get-gedə daha maraqlı qambitlərin qurulacağından xəbər verir. Bu isə siyasi qüvvələrdən çeviklik tələb edir. Sadə olmayan vəziyyətdə isə gedişlər etmək siyasətçilərdən müdriklik tələb edir. Azərbaycan siyasətində isə intellekt problemi yaşanmaqdadır

Azər Talıbov