Məhərrəm Əliyevlə Mədət Quliyev
arasındakı qarşıdurmanın pərdəarxası

Bakı şəhər baş polis idarəsinin sabiq rəisi Məhərrəm Əliyevin Prezident Administrasiyasında yeni vəzifəyə təyin olunması bir neçə rütbə sahibləri arasında konflikt yaradıb. Bu sırada xüsusilə daxili işlər naziri Ramil Usubov və onun yaxın ətrafının adı çəkilir. Iddia olunur ki, Məhərrəm Əliyevin əzəli rəqibi olan daxili işlər naziri bu təyinatı Bakı polisinin sabiq rəisinin onun yerinə hazırlanması kimi dəyərləndirir. Ramil Usubov düşünür ki, bir müddət keçdikdən sonra Məhərrəm Əliyevdən ona qarşı istifadə ediləcək və o istefaya göndəriləcək. Məhərrəm Əliyev onun postuna təyin edildikdən sonra məsələ daha da dramatikləşmə bilər. Daxili işlər nazirinin yaxın ətrafını da ən çox narahat edən məqam budur. Çünki Məhərrəm Əliyevin DIN rəhbərliyinə gələcəyi təqdirdə, heç şübhəsiz Ramil Usubovun kadrları ilə işləməyəcək.
Bu arada başqa bir məlumata görə penitensiar xidmətin rəisi, general Mədət Quliyev vəzifəsini böyütmək üçün ciddi fəaliyyətə keçib. Mənbənin iddiasına görə, xidmət rəisi hakimiyyət qarşısında indiyədək göstərdiyi xidmətin müqabilində daha yüksək posta irəli çəkilməsini istəyir. Buna görə də onun indidən ciddi fəaliyyətə keçdiyi deyilir. Bəs generalın gözaltı etdiyi, hədəflədiyi vəzifə hansıdır? O, bundan da böyük hansı posta getmək istəyir? Məlumatı verən mənbənin bildirdiyinə görə, M. Quliyev daxili işlər naziri olmaq istəyir. Deyilənə görə, bu istəyi haqda o, siyasi hakimiyyətdəki himayəçilərinə də müəyyən mesajlar verib. Ona müəyyən müddət gözləmək tövsiyə olunub. Mənbəmizin iddiasına görə, Misir Mərdanovun işdən çıxarılmasından sonra M. Quliyevin nazir olmaq həvəsi daha da artıb. Çünki M.Mərdanov hakimiyyətdəki “qocaları” təmsil edirdi. Görünür, M.Quliyev düşünür ki, “köhnələrin” yarpaq tökümü başlayıb və bu dalğada hazırkı daxili işlər naziri Ramil Usubov da vəzifədən çıxarıla bilər. Bu zaman isə həmin posta onun aparılması şansı yaranar. Mənbəmiz iddia edir ki, M. Quliyev nazir olmaq üçün çox şaxəli fəaliyyət göstərir. Generalın media orqanı təsis etməsi (təbii ki, başqasının adına), sayt, hətta qəzet yaratması istiqamətində işə başladığı da söylənilir. O, bununla həm rəqiblərinə indidən zərbələr endirib onları zərərsizləşdirmək istəyir, həm də əlindəki media vasitəsilə yeri gələndə müxalifəti hədəfə alıb siyasi hakimiyyətin rəğbətini qazanmağa, diqqətini çəkməyə çalışır. Xatırladaq ki, Mədət Quliyev uzun illər Daxili İşlər Nazirliyi sistemində yüksək vəzifələr tutub. Hazırkı posta da DİN sistemindən gətirilib.
Bu iki xəbərin inandırıcılıq əmsalını artıran başqa bir fakt Məhərrəm Əliyevlə Mədət Quliyev arasında ilk baxışda diqqəti çəkməyən, əslində isə pik nöqtədə olan gərginlikdi. Sadəcə görünən tərəflərdən biri M.Əliyev yox onun deputat qardaşıdır.
Artıq bir neçə aydır ki, mətbuatda Ədliyyə Nazirliyi Pentensiar Xidmətinin rəisi Mədət Quliyevə qarşı hücumlar təşkil olunur. Mədət Quliyev Pentensiar Xidmətə rəis təyin edildikdən sonra çəzaçəkmə müəssisələrinə “girən” əllər qırılmağa başladıqca bu hücumlar daha da fəllaşmağa başladı. Bu haqda məlumat verən mənbə iddia edir ki, Mədət Quliyevə qarşı kampaniya açılıb və bu kampaniyada maraqlı tərəflərdən biri də Milli Məclisin üzvü Adil Əliyevdir.

Fariz