Nazir olmaq istəyən sabiq səfirə «hələlik bu da bəsindir» mesajı verilib

gundemxeber.az BŞBPİ-nin keçmiş rəisi, Tacikistandakı keçmiş səfirimiz Məhərrəm Əliyevin Prezident Adminstrasiyasında Hərbi məsələlər şöbəsinə rəhbər gətirilməsi ərəfəsində yaşanan olaylarla bağlı redaksiyamıza maraqlı məlumatlar daxil olub. Həmin informasiyalara görə, daxili işlər naziri Ramil Usubovla yola getməyən və bu üzdən də həmin mübarizədən məğlub ayrılaraq səfir göndərilən Məhərrəm Əliyev həmin illər ərzində Bakıya-yüksək vəzifəyə gəlmək istəsə də məqsədinə çatmayıb. Nəhayət, məqsədinə bu günlərdə çatan M.Əliyev əslində indiki postuna təyinatdan heç də məmnun qalmayıb.
Məlumat üçün bildirək ki, onun yeni təyinat alması gözlənilən olsa da, bu qədər aşağı bir posta gətiriləcəyi gözlənilmirdi. Həmişə nazir postuna iddialı olan birinin şöbə müdiri təyin edilməsi isə heç də səbəbsiz olmayıb.
Redaksiyamıza verilən məlumata görə, Məhərrəm Əliyevin bu şəkildə «mükafatlandırılması» siyasi məqsəd güdüb. Belə ki, generalın hakimiyyətiçi qruplaşmalarda aktiv mövqe tutması və DİN başçısı Ramil Usubovla yola getməməsi, habelə əsas fiqur kimi kənarda qalmasının zərərli ola biləcəyi hakimiyyət dairələri bu addımı atmağa vadar edib. Üstəlik, qarşıdan gələn seçkilərdə hakimiyyətiçi qruplaşmalar arasında proporsiyanın qorunub saxlanılması məsələsində də bu addım işə yaraya bilər.
Bəzi bilgilərə görə, Məhərrəm Əliyev şöbə müdiri vəzifəsinə gətiriləcəyindən xəbərdar olduqdan sonra bununla razılaşmayıb. Qəzetimizə danışan mənbələr iddia edirlər ki, keçmiş polis rəisi daha yüksək vəzifəyə layiq olduğunu qeyd edib. Amma onunla danışıqlara gəlmiş şəxslər qeyd ediblər ki, bu daha böyük postlara təyinat alması üçün tramplin rolunu oynayır və seçkilərdən sonra mümkündür ki, nazir təyinatı alsın. Amma bu təyinatın DİN başçısı və ya bir başqa vəzifə olacağı naməlum olaraq qalıb.
Bəzi iddialara görə, Məhərrəm Əliyevin DİN başçısı olmaq ehtimalı çox azdır. Çünki bu posta hakimiyyətin konkret bir neçə namizədi var. Amma mümkündür ki, o, gələcəkdə başqa bir nazirliyə rəhbərlik etsin. Amma unutmaq olmaz ki, bunlar yalnız nəzəri ehtimallardır və onların reallaşmaması da mümkündür. Bununla belə siyasi cəhətdən «vurulduqdan» sonra yenidən vəzifəyə qayıda bilməsinin özü M.Əliyevin uğuru kimi dəyərləndirilə bilər. Bu uğur onun özünə kiçik görünsə də hər halda uğurdur.
Natiq