“Biz də istəyirik ki, Gülər Əhmədova barəsində cinayət işinin hər iki maddəsi üzrə istintaq obyektiv aparılsın”

Hazırda həbsdə olan sabiq millət vəkili Gülər Əhmədovanın azad olunması üçün bu gün prezidentə müraciət ünvanlanacaq. Bu barədə Modern.az-a onun vəkili Əfsər Talıbov bildirib.
Həbsdə olan sabiq deputat Gülər Əhmədovanın vəkili Əfsər Talıbov baş prokuror Zakir Qaralov, Prezident Administrasiyasının hüquq-mühafizə orqanları ilə iş üzrə şöbənin rəhbəri Fuad Ələsgərov, daxili işlər, ədliyyə nazirlərinə, Bakı şəhər prokuroru Əziz Seyidova, ombudsman Elmira Süleymanovaya, Heydər Əliyev Fonduna, Milli Məclisin sədri Oqtay Əsədova müraciət edib. Bu barədə məlumat verən Ə. Talıbov bildirib ki, müraciətdə G. Əhmədovanın əsassız olaraq həbsdə saxlanılması və istintaq orqanı tərəfindən hər hansı bir istintaq hərəkətinin aparılmaması qeyd olunub.
Ə. Talıbov eyni zamanda F. Ələsgərova, baş prokuror Zakir Qaralova və Bakı şəhər prokuroru Əziz Seyidova müraciət edərək, onu qəbul etmələrini xahiş etdiyini də bildirib: “Hər üç şəxsə teleqrama vurmuşam. Xahiş etmişəm ki, məni qəbul etsinlər, şikayətlərimizi dinləsinlər”. Vəkilin sözlərinə görə, Gülər Əhmədovanın əməli Cinayət Məcəlləsinin 178.3.2 və 307.2 maddələri ilkə tövsif oluna bilməz. “Biz, vəkillərin ümumi qənaətinə görə, Gülər Əhmədovanın əməlində cinayət yoxdur. Ölkə prezidenti də çıxışlarının birində cinayət işinin obyektiv aparılması ilə bağlı fikir səsləndirdi. Biz də istəyirik ki, Gülər Əhmədova barəsində cinayət işinin hər iki maddəsi üzrə istintaq obyektiv aparılsın”.
Əfsər Talıbov onu da bildirib ki, bu günə kimi istintaq işində heç bir irəliləyiş olmayıb. Onun sözlərinə görə, Gülər Əhmədova cəmi bir dəfə, üstəlik şahid qismində dindirilib: “Sonradan Gülər Əhmədova barəsində təqsirləndirilən şəxs qismində cəlb edəndə onu sadəcə qərarla tanış ediblər. Müvəkkilimə bildiriblər ki, “sizi bu iki maddə ilə həbs edirik”. Baş prokuror çıxışında bildirib ki, Gülər Əhmədovanın işi ilə əlaqədar Elşad Abdullayev Bakıya gəlməlidir, sübutlar təqdim etməlidir və Gülər Əhmədova ilə üzləşdirilməlidir. Hətta Baş prokuror qeyd eləyib ki, niyə məhz Elşad Abdullayev 7 ildən sonra bu video görüntüləri yayıb...”.
Sabah Gülər Əhmədova ilə görüşəcəyini də qeyd edən Əfsər Talıbov onu da bildirib ki, eks-deputatın səhhəti ağır durumda olduğundan onun ürəyinin EXO-kardioqram olunması üçün istintaq təcridxanasının rəisinə müraciət edib.

“Xəbər xidməti”