Diaspor siyasətimizin qüsurları

gundemxeber.az Rusiyada yaşayan azərbaycanlı olqarxların yaratdığı təşkilatın siyasi hakimiyyətə qarşı yaradıldığı iddia edilirdi. Bu ehtimalın ortaya çıxmasına şərait yaradan əsaslar və arqumentlər də yox deyildi. Əsas arqumentlərdən biri Azərbaycan siyasi həyatında həlledici mövqeyə sahib olan prezident ailəsinin təşkilatın yaranmasına göstərdiyi münasibətdir. Mətbuat orqanlarının bildirdiyinə görə məlum ailə bu hadisəsini xüsusi əsəb gərginliyi ilə qarşılamış və RATİ-nı öz səltənətinə qarşı yaradıldığından şübhələnib.
Maraqlıdır ki, bu informasiyanı təşkilatın təsisçiləri də açıq şəkildə etiraf edirlər. RATİ-nin İdarə Heyətinin ən fəal üzvü Söyün Sadıqovun «Azadlıq» radiosuna verdiyi müsahibə bunun ən bariz örnəyidir. Həmin açıqlamasında o, təsis etdikləri qurumun ailə tərəfindən aqresiya ilə qarşılandığını olduqca aydın bir dillə ifadə etmişdi.
Düzdür, RATİ-nin mövcud hakimiyyətə qarşı təsis olunduğu həm təsisçilər, həm də mövcud iqtidar nümayəndələri tərəfindən bütün çılpaqlığıyla etiraf olunmasa da hələ ki, dilə gətirilən bəzi həqiqətlər və bütün dünya miqyasında baş verən bir çox hadisələr Azərbaycan iqtidarının ən azı lobbiçilik siyasətinin tənəzzülə uğradığından xəbər verir. Haqqında söhbət açdığımız təşkilatın rəhbərlərinin tamamilə yeni srtukturda bir araya gəlmələrinin zərurəti barədə dedikləri də əslində bu həqiqətdən xəbər verir. Belə ki, onlar yaratdıqları yeni təşkilatın param-parça olan diaspor təşkilatlarını bir araya toplamaq məqsədiylə yola çıxdığını bildirir və Rusiyada fəaliyyət göstərən Azərbaycan diaspor qurumları arasında rəqabətin az qala düşmənçilik səviyyəsində olduğuna diqqət çəkirlər.
Azərbaycan hakimiyyəti isə diasporumuzun ən güclü həlqəsi hesab olunan Rusiyada belə bu cür xoşagəlməz vəziyyətin cövlan etdiyini görmək istəmir, nəyin bahasına olursa-olsun mövcud diaspor siaysətini indiki vəziyyətdə qorumağa çalışır. Bunun üçün bütün inzibati üsullara əl atır, RATİ-nin təsisçilərini cəzalandırır, Rusiyada fəaliyyət göstərən digər Azərbaycan təşkilatlarını onun üzərinə hücuma keçməsinə səy göstərir. Hətta bu məsələdə ailəyə çox yaxın əlaqələriylə seçilən adamlara belə güzəştə gedilmir.
Söyün Sadıqovun təbirincə desək, yeni keyfiyyətdə formalaşmaq istəyən diaspor təşkilatına qarşı hakim ailənin bu aqresiyası davam etdiyi bir zamanda dünyanın bəzi ölkələrində Azərbaycan xalqının əleyhinə müəyyən addımların atıldığının şahidi oluruq. Artıq bəzi ölkələrin aşağı səviyyəli seçkili orqanlarında olsa belə Qarabağın bir erməni torpağı olaraq tanınmasına başlanılıb. Avstraliyanın bəzi ştatlarını bu tendensiyanın ilkin «qaranquşları» hesab etmək olar. Yaxın gələcəkdə bu «qaranquşları» təqib edənlərin sayı xeyli arta və nəticədə illərboyu üzərimizə çökən qəflətin ağır fəlakətlərini yaşaya bilərik.
Qəribədir ki, hər dəfə beynəlxalq aləmdə xoşagəlməz vəziyyət yarananda mövcud hakimiyyət bunu ermənipərəstlərin təxribatı adlandıraraq özünə və xalqa təskinlik verməyə çalışır. Halbuki bu məntiqə obyektiv nəzər salanda görə bilərik ki, onun altında belə öz siyasi səbatsızlıqlarının etirafı yatır. Ermənipərəst deyiləndə nə nəzərdə tutulur? Erməni lobbisinin fəaliyyəti nəticəsində dünyanı onların haqlı olduğuna inandırılmasımı əcəba? Bəyəm, erməni lobbisi bizim xeyrimizəmi çalışmalıydı ki, bu vəzifələrini, xalqımız qarşısında götürdükləri öhdəliyi yerinə yetirmədiklərinə görə onları qınayırıq? Bəs, Azərbaycan xalqının milyonları hesabına fəaliyyət göstərən diaspor təşkilatlarımız hara baxırlar? Əgər ermənipərəst adlandırdığımız dairələr bizi qabaqlayıbsa, Azərbaycan xalqının əleyhinə hər hansı bir hadisə baş veribsə, bunun günahını başqalarında yox, öz diaspora siyasətimizdə axtarmalıyıq. Deməli, biz hardasa səhvə yol vermişik ki, beynəlxalq müstəvidə oynanılan oyunda nəticə ermənilərin xeyrinə tamamlanıb.
Kimisə qınamaq və ya boş- boş özümüzə təskinlik verməkdənsə, siyasətimizi dəyişməliyik. Əgər öz milyarderlərimiz, qardaş ölkənin böyük holdinqləri bizim əleyhimizə yönəlibsə, bunun səbəbi üzərində fikirləşməliyik. Bəlkə onlara ölkəmizdə öz iş həyatlarını qurmalarına imkan vermədiyimizə görə bu cür təzyiqlərlə üzləşirik? Elədirsə, deməli, səhv onlarda deyil, cənablar.
Etiraf edilməlidir ki, diaspor siyasətimizin səbatsızlığı yalnız Rusiyada deyil, bütün dünya ölkələrində özünü büruzə verir. Bu gün Azərbaycan diasporu fəaliyyət göstərdiyi hər yerdə milyonlarla dollar rüşvətin, yardımın hesabına heykəl dikməklə məşğuldur və dikdikləri heykəl də bütün dünyanın xoş baxmadığı diktatorluğun bütündən başqa bir şey deyilsə, ermənilər isə bizdə diktaturanın mövcudluğunu sübut etməyə çalışır və arqument olaraq həmin heykəlləri göstərirsə günahı kimdə axtarmalıyıq-ermənilərdə, yoxsa bizdə?

Pərviz