İcra başçısı üsyan rayonunda yeni etiraz ocağı yaradır: yerli məmurlar töycü altında, seçki adıyla yığılan pullar və Söyün Sadıqov faktoru
Mübariz Ağayevin Mingəçevir Şəhər İcra Hakimiyyətinin başçısı vəzifəsindən azad olunaraq Quba Rayon İcra Hakimiyyətinin başçısı təyin edilməsindən artıq bir ildən artıq müddət keçib. Biz artıq ötən yazılarımızda da qeyd etmişdik ki, bu dəyişiklik ilk günlər Quba sakinləri tərəfindən böyük ümidlərlə qarşılanmışdı.
Mingəçevirdən başlayan ənənə
Lakin, artıq çox az müddət sonra bu ümidlərin doğrulacağına dair ciddi şübhələr yaranmağa başladı. Bu şübhələrə isə ilk növbədə yeni başçının qəbuluna düşmək problemi və onun vətəndaşlarla münasibətdə etinasızlıq nümayiş etdirməsi, kəskin davranış tərzinə üstünlük verməsi yol açmış oldu. Qeyd etmək lazımdır ki, Mübariz Ağayevin hələ Mingəçevir Şəhər İcra Hakimiyyətinin başçısı vəzifəsində çalışıdığı zaman onun fəaliyyətinə dair mətbuat səhifələrində təqdim olunan faktlar isə heç də ürəkaçan deyildi. Xüsusən də Mingəçevirli təhsil işçilərinin və özəl sektorda fəaliyyət göstərən iş adamlarının kütləvi informasiya vasitələrinə ünvanladıqları şikayət məktublarında icra başçısının yol verdiyi korrupsiya hallarına dair çeşidli məlumatlar öz əksini tapırdı. Bu məlumatlarda bildirilirdi ki, M.Ağayevin bilavasitə göstərişi ilə Mingəçevirdə istər dövlət qurumlarda müxtəlif vəzifələrdə çalışanlardan, istərsə də özəl sektor təmsilçilərindən mütəmadi olaraq aylıq haqq yığılır. Bundan başqa məlumatlarda müxtəlif əlamətdar günlər münasibətilə şəhərdə təşkil olunan dövlət tədbirlərinin, şənlik və konsertlərin keçirilməsi üçün tələb olunan vəsaitlərin də həmin "qaynaqlardan" əldə olunduğu iddia olunurdu. Şəhərdə aparılan abadlıq və quruculuq işləri isə Mingəçevirlilərin şəxsi büdcələri üçün əsil talançılıq hesabına başa gəlirdi. Müxtəlif mənbələr təsdiq edirlər ki, bu məqsədlər üçün ayrılan dövlət vəsaitlərini mənimsəyən icra başçısı hətta şəhər üzrə toplanan pulların da bir hissəsini qənaət edərək cibinə qoymağı bacarırdı.
Mübariz Ağayev Mingəçevirdəki təcrübəsini Qubada da tətbiq etmək niyyətində qərarlı olması aşkara çıxıb. Bu xüsusda ölkə mətbuatında müzakirəyə çıxarılan ilk mməlumatlar da Qubada yerləşən Heydər Əliyev adına mədəniyyət və istirahət parkının yenidən qurulması üçün tələb olunan vəsaitin yerli sakinlərdən yığılmasına dair xəbərlər oldu. Maraqlıdır ki, "maliyyə mənbəyi" kimi yenə də idarə və məktəb müdirləri, iş adamları seçilmişdilər. Həm də yığılan vəsaitlərin yenə də görüləcək işlərin həyata keçirilməsi üçün tələb olunan məbləğdən xeyli artıq olduğu göstərilirdi. Amma təbii ki, Qubada görüləcək "abadlıq və quruculuq işləri" təkcə Heydər Əliyev parkının yenidən qurulması ilə məhdudlaşmayacaq. Məsəl var, deyərlər bal tutan, barmaq yalayar. Təbii ki, çəkilən asfalt yolun hər kilometri, fasadı rənglənən və ya üzlənən hər bina qazanc gətirdikcə bu "quruculuq" işlərinin də sonu olmayacaq.
Vəzifə paylanışı
Mübariz Ağayevin vəzifə özəllikləri bununla bitmir. Bir il öncə mart hadisələrindən sonra işdən çıxarılan bəzilərinin yeri boş qaldığından həyata keçirilən yeni proses isə olduqca maraqlıdır. Verilən məlumata görə, rayonda hazırda vəzifələr «barter» üsulu ilə «satışa» çıxarılıb. Məlumatda deyilir ki, Mübariz Ağayev bir həftə bundan əvvəl Ruslan Hacıyevi özünə iqtisadi məsələlər üzrə müavin gətirib. Hacıyevin bu vaxta kimi, Quba Şəhər İcra Nümayəndəliyinin rəhbəri olaraq fəaliyyət göstərdiyi deyilir. Bildirilir ki, mart hadisələri zamanı özünü birtəhər qoruyan Hacıyevin güvəndiyi əsas şəxs isə atasıdır. Halbuki onun da adının məlum hadisələrə qarışdığı deyilir. Sadəcə atasının hesabına vəziyyətdən çıxarılıb.
Məlumatda deyilir ki, Ruslan Hacıyevin atası Xaçmaz Asfalt Zavodunun direktoru İsgəndər Hacıyevdir. Elə ata Hacıyevin bu imkana sahib olması, onun oğlu üçün Qubada yaşıl işıqların yanmasını şərtləndirib.
Təbii ki, Mübariz Ağayev Ruslan Hacıyevdən «şirinliyi»ni alıb. Amma bunu natural formada həyata keçirib. Mənbələrin bildirdiyinə görə, o, Quba rayon İcra Hakimiyyəti başçısının iqtisadi məsələlər üzrə müavini təyin olunmasının müqabilində rayonun yollarını asfaltlaşdırmalıdır. Hacıyevin bu prosesi atasının hesabına reallaşdıracağını yaxşı bilən M.Ağayev, həm də bəzi tenderlərdə bərabər şəkildə hərəkət edəcəklərini hədəfləyib. Yəni, yeni yolların çəkilməsində böyük pullar qazanmaq üçün şərikli addımlar atmağı düşünür.
Seçkidən sui istifadə

Onu da bildirək ki, Mübariz Ağayevin adı yenidən mətbuatda səslənməyə başlayıb. Deyilənlərdən aydın olur ki, icra başçısının oğlu törətdiyi qəza nəticəsində bir nəfərin ölümünə nədən olsa da, bu hadisə Mübariz Ağayevin «səyi» nəticəsində ört-basdır edilib. Amma məsələ bu deyil.
Rayondakı qaynaqların verdiyi informasiyalardan aydın olur ki, Mübariz Ağayev bir müddət əvvəl qarşıdan gələn prezident seçkilərilə əlaqədar rayonun idarə müdirlərinin iştirakı ilə toplantı keçirib: «Toplantıda prezident seçkiləri əsas müzakirə mövzusu olsa da, Mübariz Ağayevin bir hədəfinin olduğu net şəkildə hiss olunurdu». Mənbəmiz iddia edir ki, Mübariz Ağayev açıq şəkildə idarə müdirlərinin qarşısında seçkilərlə bağlı pul yığımı tələbini də qoyub: «İcra başçısı hətta bunun «yuxarıdan» sifariş edildiyini də iddia edib. Başçı bildirib ki, «onda seçkiləri idarə etmək, yola vermək üçün yetərincə pul yoxdur. Buna görə də «yuxarılar» idarə müdirlərindən və sahibkarlardan pul yığmağa göz yumulacağını deyib»».
Mənbənin sözlərinə görə, icra başçısının adından toplantıdan sonra bütün idarə müdirlərinə tələb olunan məbləğ barədə informasiya verilib: «Məsələn, yerli idarə müdirlərindən biri (onun adı redaksiyamıza məlumdur -red.) ondan 6 min manatın tələb olunduğunu bildirib. Eyni qaydada digər idarə müdirlərindən və sahibkarlardan da fərqli-fərqli məbləğlər istənilib».
Onu da xatırladaq ki, Mübariz Ağayevin toplantısının bu günlərdə Prezident Administrasiyasında icra başçıları ilə keçirilən toplantının ardından baş tutduğu da söylənilir. Bu isə o deməkdir ki, pul yığımı istər-istəməz “yuxarılar”ın adı ilə bağlanır.
“Milyarderlər İttifaqı” ilə iş birliyi?

Bu günlərdə isə Quba rayonundakı mənbələrdən bizə verilən xəbərdən aydın olur ki, Rusiya Azərbaycanlılarının Federal Milli-Mədəni Muxtariyyətinin (RAFMMM) fəxri prezidenti, Rusiya Azərbaycan Təşkilatları İttifaqının (RATİ) yaradıcılarından biri, Rusiya Prezidenti Vladimir Putinin səlahiyyətli nümayəndəsi Söyün Sadıxov sözügedən rayonda böyük toplantıya hazırlaşır.
Xatırladaq ki, Söyün Sadıxovun Azərbaycana gəlmə niyyətiylə bağlı məlumat vermişdik. İndi isə aydın olur ki, o, Qubada görüş planlayır. Mənbə iddia edir ki, quru yolu ilə Azərbaycana gələcəyi gözlənilən RATİ-nin qurucusu Qubada «Aynur» şadlıq sarayında yerli sakinlərlə və Bakıdan, həmçinin ayrı-ayrı rayonlardan gedəcək tərəfdaşları ilə görüşə hazırlaşır.
Maraqlıdır ki, «Aynur» şadlıq sarayı Qubadakı 1 mart hadisələri zamanı əsas təşkilatçılardan biri kimi həbs olunan bələdiyyə sədri Elxan Əliyevə məxsusdur. Bu isə məlum Quba olaylarında Rusiya izinin olduğunu iddia edənləri bir növ haqlı çıxaran faktor rolunu oynamaqdadır.
Taleh Səlimov, Quba-Bakı