İsa Qəmbərin müşavirini şərləyib tutdular

Yadigar Sadıqova Qarabağ əlilini döymək ittihamı ilə cinayət işi açıldı; özü isə bunu siyasi sifariş sayır

Hakimiyyət seçki ilində sağa-sola hücumlarını kəskinləşdirib. İqtidar repressiyaları şiddətləndirmək hesabına cəmiyyətin və müxalifətçilərin müqavimət aktivliyini passivləşdirə biləcəyi qənaətindədir. Odur ki, bir tərəfdən vaxtilə öz bətnindən çıxmış Hüseyn Abdullayevin bu gün “Susma” çağırış etməsinə beynəlxalq axtarış elan etməklə cavab verirsə, digər tərəfdən əzəli rəqibi olan müxalifətçilərlə döyüşləri davam etdirir.
İyunun 27-də Lənkəranda Müsavat başqanının müşavirini şərləyib həbs etdilər. II qrup Qarabağ əlili Rəşid Fərman oğlu Kərimovun şikayəti əsasında Y.Sadıqova Cinayət Məcəlləsinin 221.3 (xuliqanlıq) maddəsi ilə cinayət işi açılıb.
Şikayətçi Cavanşir küçəsində yerləşən çayxananın qarşısından keçərkən Müsavat başqanının müşaviri və daha 2 nəfər məsləkdaşı tərəfindən küçə söyüşləri ilə təhqir olunduğunu, daha sonra döyüldüyünü iddia edib. Qarabağ əlili deyib ki, onun sifətinə yumruqla vuraraq al qana boyayıblar və ürəkləri bununla soyumayıb əynindəki paltarları da cırıb qopardıblar.
Y. Sadıqov hadisə ilə bağlı “facebook”da yazıb ki, çayxanada Comerd Qaya adlı tanışı ilə çay içdiyi yerdə bir narkoman gəlib stola oturub. Hansısa müxalifətçinin ondan pul alıb qaytarmadığını əsas gətirərək müxalifəti söyməyə, Y.Sadıqovu təxribata çəkməyə başlayıb. Müsavat yetkilisi yaxın günlərdə belə hadisələrin baş verəcəyi haqda əvvəlcədən siqnal aldığını söyləyib.
Y.Sadıqov iyunun 27-də, həbsdən az öncə musavat.com-a deyib ki, bu yerli hakimiyyətin təşəbbüsüdür: “Yuxarının göstərişi olsaydı, artıq həbs olunardım. Yerli hakimiyyətin çoxdan ürəyindən keçir məni şərləmək. Ola bilsin, Bakıdan razılıq ala bilməyiblər. Və bu hadisəni törətməklə Bakını fakt qarşısında qoymaq istəyirlər. Həmin Qarabağ əlilini isə bu məsələyə qədər heç vaxt tanımamışam. Açıq-aşkar şər-böhtandır”.
Ancaq az sonra Y.Sadıqov polisə aparılıb və həbs edilib. Daxili İşlər Nazirliyi Müsavat başqanının müşaviri ilə bağlı açıqlama verib. Nazirliyin mətbuat xidmətinin şöbə rəisi Orxan Mansurzadə “Qafqazinfo”ya deyib ki, araşdırmalar nəticəsində hadisənin Y.Sadıqov tərəfindən törədilməsi müəyyən edilib. Bununla əlaqədar istintaq hərəkətləri çərçivəsində şahid ifadələri və Rəşid Kərimovun ifadələri alınıb. Bir sıra zəruri istintaq hərəkətləri aparılıb və bu şəxsin özü də məhkəmə tibbi ekspertizasına göndərilib”.
O.Mansurzadə deyib ki, bununla əlaqədar istintaq hərəkətləri davam etdirilir. Onun sözlərinə görə, müəyyən şəxslər tərəfindən məlumatlarda məsələni siyasiləşdirməyə cəhd edirlər: “Və bunu guya hardasa Sadıqovun siyasi fəaliyyəti ilə əlaqələndirirlər. Belə ittihamların heç birinin hüquqi əsası yoxdur. Söhbət konkret bir şəxsin müraciəti əsasında aparılan və həmin fakt üzrə qaldırılan cinayət işinin istintaqından gedir”.
Hüquq müdafiəçisi Leyla Yunus Y.Sadıqovla bağlı daxili işlər naziri Ramil Usubova müraciət edib. Müraciətdə deyilir: “Ərizəni hakimiyyət KİV-ləri və AzərTAc dövlət agentliyinin yayması da sübut edir ki, söhbət öncədən hazırlanmış təxribatdan gedir. Yadigar Sadıqovun evini polislərin müşahidə altına alınması da təxribat versiyasını bir daha təsdiq edir. Seçki ilində həbs edilmiş müxaliflərin sayı 30 nəfəri keçib. Baş verən təxribatlar Sizin başçılıq etdiyiniz nazirliyə, eləcə də onun sağlam məntiqinə və qanuna riayət etməsinə etimadı sarsıdır. Lütfən seçkiqabağı mühiti müxalifət partiyalarının fəallarının yeni həbsləri ilə daha da mürəkkəbləşdirməyin”.
Son xəbərə görə, Y.Sadıqov Lənkəran Rayon Polis Şöbəsində (RPİ) saxlanılır. Onun sabah məhkəməyə aparılacağı gözlənilir. Bu gün məhkəmə olacağı bilinmir. Bundan əlavə, daha iki müsavatçının polisə çağırıldığı xəbəri yayılıb. Müsavat Partiyası Lənkəran şəhər təşkilatının sədri İman Əliyev və onun müavini Fikrət Əmirov polis idarəsinə çağırılıb.

Aslan