Moskvadan yenə “şimal küləyi” əsdiAbbas Abbasov ölkə jurnalistlərini təbrik etdi; Söyün Sadıqov Bibiheybət qəsəbəsində jurnalistlərə ev tikəcəyini açıqladı, Əflatun Amaşov Rusiyada yaşayan iş adamının bu niyyətini təxribat adlandırdı
İyulun 22-də Azərbaycan jurnalistlərinə sensasion bayram təbrikini ünvanlayan Rusiya prezidenti Vladimir Putinin səlahiyyətli nümayəndəsi, “Milyarderlər İttifaqı”nın üzvü Söyün Sadıqov Azərbaycan jurnalistləri üçün Bakıda, Bibiheybət qəsəbəsində yaşayış binası tikəcəyini bəyan edib. Bu sensasion məlumatı azpolitika.info-ya S.Sadıqovun özü verib. O deyib ki, hazırda binanın tikintisi üçün yerin müəyyənləşdirilməsi və sənədləşmə işlərinin başlanmasına hazırlıq gedir. “Milyarderlər İttifaqı”nın üzvü əlavə edib ki, şəxsi vəsaiti hesabına tikəcəyi evləri jurnalistlərə pulsuz paylayacaq. Namizədlər 10 ildən artıq mətbuatda işləyən evsiz jurnalistlər arasından seçiləcək. Bölgü şəxsən S.Sadıqovun nəzarəti altında açıq püşkatma yolu ilə aparılacaq.
Qeyd edək ki, elə bu gün Azərbaycan prezidentinin sərəncamı əsasında Bibiheybət qəsəbəsində jurnalistlər üçün tikilən yaşayış binasının açılışı olub. Tədbirdə prezident İlham Əliyev də iştirak edib, həmçinin yeni binanın da təməli qoyulub.
“Lakin Mətbuat Şurasının təşkilatçılığı ilə aparılan ev bölgüsü böyük narazılıq yaradıb. Belə ki, illərdir kirayələrdə qalan jurnalistlər bölgüdən kanarda qalıb, əvəzində Bakıda bir neçə evi, bahalı avtomobilləri olan baş redaktorlar ev alıb. S.Sadıqovun 22 iyul - ”Milli Mətbuat Günü"ndə Azərbaycanın evsiz jurnalistləri üçün ev tikəcəyini elan etməsi müəyyən qədər prezidentin sərəncamı əsasında tikilən evlərin bölgüsü zamanı yol verilən ədalətsizliyə etiraz da sayıla bilər" - deyə, saytın məlumatında bildirilir. Düzdür, S.Sadıqovun indiki münasibətlər çərçivəsində Azərbaycan hakimiyyəti ilə anlaşaraq torpaq sahəsi alacağı və orada iqtidara xeyli divident qazandıran bir prosesə sahiblənərək jurnalistlər üçün mənzil tikəcəyi o qədər də real görünmür. Ancaq hər halda belə bir ideya ilə çıxış etməsi maraqlı mətləblərdən xəbər verir.
Qeyd edək ki, bir gün öncə S.Sadıqovun Milli Mətbuat Günü münasibətilə Azərbaycan jurnalistlərinə ünvanladığı təbriki birmənalı qarşılanmamışdı. Xüsusilə də onun “Təsadüfi deyil ki, mətbuatın demokratik idarəetmə mexanizmində oynadığı bu mühüm rola görə onu hakimiyyətin dördüncü qolu adlandırırlar... Əlbəttə ki, bu, demokratik rejimlərdə belədir. Antidemokratik, totalitar və yarı-totalitar rejimlərdə isə media hakimiyyətin digər qanadlarından asılı vəziyyətdə olduğundan öz həqiqi funksiyasını yerinə yetirə bilmir, əksinə, despotik hakimiyyətlərin xalqlar üzərində təzyiq vasitəsi kimi çıxış edir” kimi fikirləri fərqli yozumlara səbəb olub və sensasiya kimi qarşılanıb.
Modern.az-ın xəbərinə görə, Rusiya Azərbaycan Təşkilatları İttifaqının rəhbəri, Rusiya Azərbaycanlılarının Federal Milli-Mədəni Muxtariyyətinin (AzərRos) Ağsaqqallar Şurasının sədri Abbas Abbasov 22 iyul Milli Mətbuat günü münasibətilə Azərbaycan jurnalistlərini təbrik edib. Təbrik müraciətində bildirilir ki, 138 il öncə - 22 iyul 1875-ci ildə görkəmli maarifçi Həsən bəy Zərdabinin nəşr etdirdiyi “Əkinçi” qəzetilə milli mətbuatın əsası qoyulub və bu gün Azərbaycan jurnalistləri tərəfindən həmin tarix qürurla qeyd olunur. “Sizi peşə bayramınız - Milli Mətbuat günü münasibətilə ürəkdən təbrik edirəm!”-deyə A.Abbasovun Azərbaycan jurnalistlərinə müraciətində vurğulanıb. Bununla yanaşı, “AzərRos” Ağsaqqallar Şurasının sədri informasiya texnologiyalarının inkişaf etdiyi müasir dövrdə KİV nümayəndələrindən daha dinamiklik, operativlik tələb olunduğunu, bunların isə eyni zamanda jurnalistləri öz peşəkarlıq və ustalıq səviyyələrini artırmağa məcbur etdiyini xatırladıb.
Onun sözlərinə görə, bu gün jurnalistlərin hər biri geniş dünyagörüşünə malik olmalı, aldıqları informasiyaya adekvat yanaşaraq, onu ictimaiyyətə doğru-düzgün çatdırmalıdırlar. Siz ölkənizin müasir həyatındakı nəbzini tutub ictimai rəy formalaşdırmaqla yanaşı, insanlara təkcə informasiya vermirsiniz, həm də onlara nə baş verdiyini dərk etməyi anladırsınız" - deyə, təbrikdə bildirilib. A.Abbasov onu da xatırladıb ki, hər bir KİV nümayəndəsi jurnalist sözü qarşısındakı məsuliyyətini hiss etməli və anlamalıdır ki, dəqiqləşdirilməmiş məlumatlar yaymaqla hansısa insanın və ya çalışdığı təşkilatın imicinə xələl gətirə bilər: “Sizə məqalə və xəbərlərinizin həmişə etibarlı və yüksək keyfiyyətli olmağını, ölkə vətəndaşlarının və tarixi yurdlarından kənarda yaşayan bütün soydaşlarımızın maraqlarına xidmət edən hər şey haqqında oxuculara obyektiv və informativ məlumat çatdırmağınızı arzulayıram”.
Sonda A.Abbasov Azərbaycan jurnalistlərinə möhkəm cansağlığı, bütün fəaliyyətlərində uğurlar, hörmət və oxucu sevgisi arzuladığını da qeyd edib.
Azərbaycan Mətbuat Şurasının sədri Əflatun Amaşov “Yeni Müsavat”a açıqlamasında S.Sadıqovun Azərbaycan vətəndaşı olmadığını xatırlatdı: “Onun Bakıda ev tikib jurnalistlərə paylaması mümkün görünmür. Əgər o desəydi ki, Moskvada ev tikib Rusiyadakı jurnalistlərə paylayacağam, bu, başadüşülən idi. Bu məsələ mənimçün tamamilə anlaşılmazdır ki, Rusiya vətəndaşı Azərbaycanda ev tikib jurnalistlərə paylayır. Bu, daha çox siyasi çıxışa oxşayır, nəinki jurnalistlərin sosial problemlərinin həll olunması niyyətinə. Odur ki, bu məsələdə mənimçün qaranlıq məqamlar var”. MŞ sədri S.Sadıqovun, həmçinin A.Abbasovun Azərbaycan jurnalistlərini təbrik etməsində qeyri-adi bir şey görmədiyini vurğuladı: “Onlar Azərbaycan və Rusiyadakı jurnalistləri təbrik edə bilər, bu, normaldır. Hər bir azərbaycanlı Azərbaycanda yaşayıb-yaşamamağından asılı olmayaraq bizim mətbuat nümayəndələrini təbrik edə bilər. Burada qeyri-adi bir məqam görmürəm. Ancaq Söyün Sadıqovun Bakıda jurnalistlərə ev tikmək istəməsi mənimçün tamamilə qarışıq bir məsələdir. Ölkə başçısı jurnalistlərə bina tikilməsi ilə bağlı sərəncam verir, bu məsələ onun səlahiyyətindədir. Ancaq Rusiyada yaşayan iş adamının Azərbaycan jurnalistlərinə ev tikmək niyyəti daha çox təxribat xarakteri daşıyır. Burda məram-məqsəd nədir, deyə bilmərəm”. Ola bilərmi ki, S.Sadıqov mənzil bölgüsündən narazı qalan jurnalistlərlə bağlı belə mövqedən çıxış edib? Ə.Amaşov: “Narazı jurnalistlər deyəndə ki, Azərbaycan mətbuatında kifayət qədər önəmli xidmətləri olan insanlar mənzil alıb. Xidməti və ehtiyacı olan digər jurnalistlər üçün də növbəti binanın tikilməsi nəzərdə tutulur. Kimsə kiminsə narazılığından istifadə edib müəyyən yozumlar yozmaq, kiminsə narazılığından istifadə edib öz məqsədlərini reallaşdırmağa çalışmaq düzgün deyil. Bu məsələnin ciddiliklə heç bir əlaqəsi yoxdur”.
Ə.Amaşov özü də Borçalıdan olmağına baxmayaraq, S.Sadıqovu şəxsən tanımadığını da vurğuladı.