İcra başçısı bələdiyyə sədrinin obyektlərini yerlə-yeksan etdirəcək; Tərəflər arasındakı münaqişə bundan sonra daha da gərginləşə bilər

Eldar Əzizov Sumqayıt şəhərinə icra başçısı təyin olunandan sonra bəzi tədbirlərə imza atdı. Gəncənin keçmiş rəhbəri "gənclər şəhəri"ndə işə başladığı ilk günlərdə birinci növbədə qanunsuz tikililəri hədəf seçdi. Onun əmri ilə şəhər ərazisində nə qədər sənədsiz obyekt var idisə, hamısı buldozerlərin qabağına verilərək yerlə-yeksan edildi. Sökülən obyektlər arasında şəhərdə fəaliyyət göstərən dövlət məmurlarının və iş adamlarının da yerləri var idi. Lakin icra hakimi onların heç birinə güzəştə getmək barədə fikirləşmədi və prezidentin göstərişlərini yerinə yetirdiyini açıqlayaraq neçə-neçə məmura maddi və mənəvi zərbə vurdu.
E.Əzizov həm də vəzifəyə keçəndən sonra Sumqayıt Şəhər İcra Hakimiyyətində (ŞİH), eləcə də şəhərin digər dövlət orqanlarında işləyən yetkili şəxsləri vəzifədən çıxararaq cəzalandırdı. Belə görünürdü ki, icra başçısı şəhər məmurlarına müharibə elan edib və müharibədə onun qarşısını almaq mümkün deyil. Amma bir müddət sonra “Əzizov məğlubedilməzliyi” mifi qırıldı. Yeni icra başçısının qalib gələ bilmədiyi, dəqiq ifadə etsək vəzifədən ala bilmədiyi məmur şəhər bələdiyyəsinin sədri Əbülfəz Babayev oldu. Ötən saylarımızda icra başçısı ilə Sumqayıt bələdiyyəsinin sədri Əbülfəz Babayev arasında yaranan soyuq münasibətdən və bunun sonralar şəxsi prinsipə çevrilməsindən bəhs etmişdik. Vurğulamışdıq ki, bələdiyyə sədrinin fəaliyyəti başçını qane etmir və icra hakimi şəhər səviyyəli tədbirlərdə bu məmuru hər dəfə tənqid edir, Bələdiyyə rəhbərini səlahiyyətində olan işləri lazımınca yerinə yetirməməkdə suçlayır. Hətta bir müddət öncə Əzizovun Yaşmada apardığı söküntü əməliyyatı zamanı bələdiyyə sədrini hamının gözü qarşısında təhqir etdiyi deyilir. Ancaq bələdiyyələr seçkili orqan olduğu üçün icra başçısı sədri vəzifədən çıxarmaq hüququna malik deyil.
Sumqayıt şəhər bələdiyyəsinin üzvləri indiyədək bir neçə dəfə sədr Əbülfəz Babayevin istefası ilə bağlı məsələ qaldırsalar da, buna nail ola bilməyiblər. Sədrin toxunulmaz qalmasının əsas səbəbi isə onun hakimiyyətin yuxarı dairələrində ciddi müdafiə olunmasıdır. Əbülfəz Babayevi himayə edənlər arasında indiyədək Naxçıvan Muxtar Respublikası Ali Məclisinin sədri Vasif Talıbovun adı çəkilirdi. Bələdiyyə üzvləri sədrin artıq Prezident Administrasiyasının rəhbəri Ramiz Mehdiyevin qardaşı tərəfindən müdafiə olunduğunu bildirirlər.
Qeyd edək ki, Eldar Əzizov Sumqayıta icra başçısı gələndən bəri Əbülfəz Babayevə qarşı xüsusi təqib və təzyiq kampaniyası başlatsa da, onun öhdəsindən gələ bilmir. Mətbuatda dəfələrlə yazıldığı kimi, başçı bələdiyyə sədrinin külli miqdarda maliyyə israfçılığına yol verdiyi, müxtəlif vəzifələrə təyin etdiyi qohum-əqrabası vasitəsilə saysız-hesabsız qanunsuzluq edildiyindən xəbərdardır. İcra başçısı hətta vətəndaşlardan külli miqdarda pul alınması hesabına verilən qanunsuz torpaq sahələrinin geri alınması prosesinə şəxsən rəhbərlik edir. Amma Əbülfəz Babayev bu günədək yeni başçıya, necə deyərlər, meydan oxuyur. Əslində Babayevin fəaliyyəti Eldar Əzizov Sumqayıta gəlməmişdən əvvəl də bələdiyyə üzvlərinin bir hissəsini qane etmirdi. Bu səbəbdən ümumi yığıncaqlarda bir neçə dəfə onun istefası məsələsi gündəmə gətirilmişdi. Amma Babayev yenə də öz kreslosunda əyləşib. Bizə çatan məlumatlara görə, şəhər rəhbəri bələdiyyə sədrinin qanunsuz əməllərinin qarşısını qanuni yollarla ala bilmədiyi üçün alternativ vasitələrdən istifadə etmək qərarına gəlib. Belə ki, Sumqayıtda yol infrastrukturunun yenidən qurulması ilə bağlı olaraq layihələr hazırlanıb.
Bu layihələrdə nəzərdə tutulub ki, yolların genişləndirilməsi məqsədilə plana düşən bütün obyektlər sökülsün. Ən maraqlısı isə odur ki, sökülməsi planlaşdırılan yerlər arasında bələdiyyə sədrinin də bir neçə obyekti var. Sədr icra başçısının göstərişlərinə qarşı çıxıb, obyektlərini qorumağı fikirləşsə də, ona bildirilib ki, çox narazılıq etməsin. Yoxsa şəhərin birinci şəxsi onun haqqında lazımi instansiyalara müraciət edər və gerisi heç də yaxşı olmaz. Yalnız bu xəbərdarlıqdan sonra bir qədər sakitləşən sədr başqa çıxış yolunun olmadığını görüb icra hakiminin qərarı ilə barışmalı olub.
Buna baxmayaraq, gizli şəkildə öz niyyətlərini də həyata keçirməyi unutmayıb. Əldə etdiyimiz bilgilərdə söylənir ki, bələdiyyə sədri sahibi olduğu obyektləri təcili surətdə satışa çıxarıb. Deyilənlərə görə, 17-ci mikrorayonda "Elmar market"in yaxınlığındakı obyektinə artıq müştəri çıxıb və alqı-satqı işləri həyata keçirilib. Sədrin cəld tərpənməsi, obyektlərini satışa çıxarmasından xəbər tutan Eldar Əzizov isə müvafiq şəxslərə göstəriş verib ki, ən qısa zaman ərzində onun yerlərini söküb-dağıtsınlar. Ümumilikdə, bu hadisələr yekunda o mənaya gəlir ki, Sumqayıtın başçısı əvvəllər onunla hesablaşmayan bələdiyyə sədrini yerində oturda bildi. Və şəhərə gələndən bəri zərərsizləşdirdiyi məmurların sayını bir nəfər də artırdı. Yəqin ki, bundan sonra icra başçısı ilə bələdiyyə sədri arasındakı mübahisələr daha da şiddətlənəcək.