Həmin şəxslərdən hansılarsa iqtidardakı bir sıra məmurlara qarşı gizli dosyeləri ölkə xaricinə daşıyıb

Sabiq millət vəkili Gülər Əhmədovanın həbsinə səbəb olan “mandat alveri” qalmaqalı üzrə sensasion fraqment məlum olub. ABU-nun sabiq rektoru, hazırda Fransada mühacirətdə yaşayan Elşad Abdullayevin yaydığı videolarda sabiq deputat Gülər Əhmədovanın yaxın rəfiqəsi kimi adı keçən və dekabrın 26-da İstanbulda müəmmalı şəkildə dünyasını dəyişən Sevinc Babayevanın cinayət dosyesində indiyədək gizli qalan bir məqam varmış.

Bu haqda “Yeni Müsavat”a istintaqa yaxın mənbədən xəbər daxil olub. Qaynağımız bildirib ki, müəmmalı ölüm işindən dolayı başlanmış cinayət dosyesində Sevinc Babayeva ilə eyni gündə Bakı hava limanından müxtəlif istiqamətlərə uçan daha 9 şəxs barədə yarımçıq qalmış araşdırma yer almaqdadır. Orada göstərilir ki, Gülər Əhmədova rəfiqəsi Sevinc Babayeva ilə eyni gündə (25 sentyabr gecəsi) daha 9 nəfəri ölkə xaricinə göndərib. İstintaq həmin şəxslərin yalnız birinin izinə düşə bilib. Həmin şəxs də hazırda başqa bir iş adı ilə həbsdə saxlanılır.

İstintaqın versiyasına görə, sabiq rektor Elşad Abdullayev məlum videonu yayan kimi Gülər Əhmədova əlindəki kompromatları, digər sənəd və əhəmiyyətli dosyeləri bir neçə hissəyə bölərək, onları bir-birini tanımayan adamları vasitəsilə ölkədən çıxarıb. Sevinc Babayeva ilə bir yerdə 10 nəfər olan həmin qrupun heç də hamısında gerçək kompromatlar, gizli bəlgələr olmayıb. Məqsəd, izə düşülərsə, müvafiq orqanları çaşdırmaq olub.
Qeyd edək ki, bundan əvvəl də yazdığımız kimi, Sevinc Babayevanın öldüyü İstanbul şəhərinə ezam olunan Azərbaycan istintaqçıları orada israrla Gülər Əhmədovanın ölkədən çıxartdığı gizli dosyeləri axtarıb. Türkiyə hüquq-mühafizə orqanlarının da yaxından dəstəyi ilə Sevinc Babayeva ilə təması olan hər bir şəxsin, hətta onların bütün qohumlarının mənzilləri axtarılıb. Lakin bu istiqamətdən hələlik heç bir nəticə hasil olmayıb.

Buna baxmayaraq, istintaq aramaları davam etdirir. Bakı hava limanından Sevinc Babayevanın çıxdığı günə aid bütün videogörüntülər istintaqda var. Orada Sevinc Babayevaya, Gülər Əhmədovaya yaxın ola biləcək simaların, personaların olub-olmaması, özünü şübhəli aparan insanların görüntüləri günlərlə araşdırılıb. Yuxarıda da qeyd etdiyimiz kimi, bu araşdırma nəticəsində həmin gün ölkədən çıxan, az müddət sonra geri dönən bir nəfər saxlanılıb. Hazırda onun xüsusi nəzarət altında istintaqı aparılır.
Mənbələrimiz iddia edir ki, Gülər Əhmədovanın ölkədən çıxartdığı ehtiml olunan 9+1 nəfərin əksəriyyəti, bəzi versiyalara görə isə 8-i qadın olub.
Belə ehtimallar var ki, həmin xanımlar G.Əhmədovanın Respublika Uşaq Təşkilatı ilə bu və ya digər şəkildə əlaqəli olublar. Bir az da konkretləşdirsək, onlar həmin təşkilatın şirması altında ictimaiyyətdən gizli fəaliyyətlə məşğul olublar. Bunun nəticəsində də bir sıra önəmli məmurlar barədə Gülər Əhmədovanın əlində video və başqa qəbildən kompromatlar toplanıb.

Aldığımız məlumatla bağlı Baş Prokurorluğun mətbuat xidmətinə sorğu ilə müraciət etdik. Sorğuda Sevinc Babayeva ilə bərabər həmin saatlarda ölkədən daha 8 (+1) qadının getməsi haqda məsələyə aydınlıq gətirilməsini xahiş etdik. Xidmət rəhbəri Eldar Sultanov sorğumuzu belə cavablandırdı: “Hazırda qeyd edilən cinayət işi üzrə zəruri istintaq hərəkətləri aparılır və nəticəsi barədə ictimaiyyətə əlavə məlumat veriləcək”.
Xatırladaq ki, 2012-ci il sentyabrın 25-də E.Abdullayev deputat Gülər Əhmədova və Sabir adına kitabxananın direktoru olmuş Sevinc Babayevanın iştirak etdiyi videomaterial yayıb. Videomaterialda deputatla sabiq rektor və vasitəçi kimi təqdim olunan S.Babayeva arasında E.Abdullayevin Milli Məclisin üzvü seçilməsi üçün yüksək məbləğdə rüşvət verməsi, ondan əlavə məbləğ istənilməsi barədə dialoq əksini tapıb. Dialoqda yüksək vəzifəli şəxslərin də adı çəkilirdı. Bu məlumatlar yayılandan sonra S.Babayeva gizli şəkildə ölkədən çıxarıldı, Türkiyədə Məryəm Solmaz adı altında yaşadığı zaman Azərbaycan hüquq-mühafizə orqanları tərəfindən beynəlxalq axtarışa verildi. 2012-ci il dekabrın 26-da, beynəlxalq axtarışa verilən gün orada müəmmalı şəkildə dünyasını dəyişdi. Ekspertiza S.Babayevanın “ürək xəstəliyi”ndən dünyasını dəyişməsi haqda rəy verib.