Ölkə paytaxtına birbaşa nəzarət də Paşayevlərə keçir; “Azəravtoyolservis”in rəhbərinin bu posta gətirilməsi planı başqa klanların BŞİH rəhbəri vəzifəsini ələ keçirmək niyyətini gözündə qoydu
Hakimiyyət nəhayət ki, Bakı Şəhər İcra Hakimiyyətinin başçısı postunda Hacıbala Abutalıbovu əvəzləyəcək şəxsin kimliyini müəyyənləşdirib. Son illərdə bu vəzifəyə bir sıra şəxslərin namizədliyi irəli sürülsə və ən müxtəlif adlar nəzərdən keçirilsə də, sonda müəyyən səbəblərdən qəti qərar verilmirdi. Bu post uğrunda hakimiyyət daxilində çox ciddi mübarizə olub və bu mübarizə son aylara qədər davam edib.
H.Abutalıbovun indiyədək əvəzlənməməsi isə təkcə hakimiyyətin onun yerinə özü üçün ən uğurlu saydığı kadrı müəyyənləşdirə bilməməsi ilə bağlı olmayıb. Paytaxtda aparılan və tez-tez meri hədəfə çıxaran işlərin böyük hissəsinin H.Abutalıbovun zamanında görülməsi məqsədəuyğun sayılıb. Yəni Bakıdakı əksər qara və qanunsuz işlərin məsuliyyəti H.Abutalıbovun ayağına yazılır və indiki mer vəzifədən alınarkən bu günahları da özü ilə aparır. Bu səbəbdən də H.Abutalıbovun vəzifədən alınması prosesi bir qədər uzanıb.
Qeyd edək ki, hazırda Bakıda söküntü prosesinin yeni dalğası başlayıb və mərhələnin ilin sonuna kimi yekunlaşması nəzərdə tutulur.
“Yeni Müsavat”a daxil olan məlumata görə, prezident seçkilərindən təxminən ay yarım sonra H.Abutalıbov yola salınacaq. Bu posta gətiriləcək şəxs isə indiyədək mer vəzifəsinə iddialılar və mümkün namizədlər sırasında adı çəkilməyən “Azəravtoyolservis”in rəhbəri, deputat Cavid Qurbanovdu.
Son vaxtlarda hakimiyyət daxilində mövqeləri kifayət qədər möhkəmlənən və önə çıxan C.Qurbanov yuxarılarda indiyədək adı mer postuna namizəd kimi gündəmə gələn məmurlardan daha uğurlu variant hesab edilib. Bu məsələ barədə kifayət qədər məlumatlı olan şəxsin dediyinə görə, artıq C.Qurbanovun Bakı Şəhər İcra Hakimiyyətinin başçısı vəzifəsinə gətirilməsinə razılıq verilib. C.Qurbanov özü də bu posta gətiriləcəyindən məmnundu və ölkə rəhbərliyinə ona göstərilən etimadı doğruldacağına söz verib.
Bakı meri postuna çoxsaylı və iddialı namizədlər arasından C.Qurbanovun seçilməsi və ona etimad göstərilməsinin bir neçə səbəbi var.
Əvvəla, hakimiyyətdəki müxtəlif qruplaşmalar bu post uğrunda illərdi ciddi mübarizə aparırlar və hər kəs öz adamını ora yerləşdirməyə çalışır. Hakimiyyətin ən üst qatında hesab edirlər ki, indiki şərtlər altında onlar öz iqtidarlarını daha beş il müddətinə qoruyub saxlaya biləcəklər. Buna görə də seçki hazırlıqları və planları ilə yanaşı, seçki sonrası hədəflər də müəyyənləşdirilir. Buna görə də hakimiyyətin qorunub saxlanacağı təqdirdə mer postuna uzun illərdi bu vəzifə uğrunda savaşan qruplaşmaların hər hansı birinin təmsilçisinin gətirilməsi məqsədəuyğun sayılmır. Bu halda hakimiyyətdaxili qruplaşmalar arasında münasibətlərin daha da gərginləşəcəyi gözlənilir. Bu isə ümumilikdə iqtidara sərf etmir. Buna görə də indiyədək mer postu uğrunda mübarizə aparan qruplarda təmsil olunmayan, hazırda isə çox güclü klanın üzvü kimi önə çıxan C.Qurbanovun üzərində dayanılıb. Həm də C.Qurbanovun mənsub olduğu Paşayevlər klanı Bakı meri vəzifəsini başqa qrupa vermək istəmir. Bu klana bağlı şəxsin mer postuna namizədliyinin gündəmə gəlməsi isə başqa qrupların bununla bağlı mübarizəsinə nöqtə qoya bilər.
Eyni zamanda Paşayevlərlə qohumluq əlaqələri olan C.Qurbanov hakimiyyətin ona etibar etdiyi bir sıra layihələri iqtidarın baxış bucağından uğurla başa çatdırıb. Onun mer postuna ən uğurlu namizəd sayılmasında bu amil də rol oynayıb.