Eldar Əzizov heç kimə güzəştə getmək fikrində deyil; Gələn aydan «daş bazarı»ndakı obyektlərin söküntüsünə start veriləcək


Qəzetimizin ötən saylarında Sumqayıtda «daş bazarı» kimi tanınan ərazidə yerləşən obyektlərin söküləcəyi ilə bağlı xəbər vermişdik. Dünən əldə etdiyimiz bilgilərə görə, Sumqayıt Şəhər İcra Hakimiyyətinin (ŞİH) rəhbərliyi tərəfindən sökülmə əmri çıxarılan obyektlər arasında komitə sədrlərindən birinin qardaşının da böyük obyekti var. Mənbənin sözlərindən aydın olur ki, Sumqayıtın cənub girişinin bir neçə metrliyində yerləşən bu obyekt hazırda fəaliyyətini davam etdirsə də, ŞİH nümayəndələri buranı işlədən şəxslərə bir ay vaxt veriblər:
«Hazırda daş bazarındakı obyektlərin heç birinə mal gəlmir. İcra başçısı Eldar Əzizov sahibkarlara vaxt verib ki, əllərində olan malları satıb qurtarsınlar. Ancaq heç bir obyekt sahibi burdan getmək istəmir. Çünki onlar neçə ildir burda işləyirlər, yaxşı xeyir götürürlər və indiyə kimi özlərinə çoxlu sayda müştəri qazana biliblər. Yeni tikilən bazar əlverişsiz və gözdən-könüldən uzaq yerdə olduğundan heç kim ora getmək istəmir. Ancaq şəhər rəhbərinin qəti göstərişi var və vaxt tamam olan kimi burdakı bütün obyektlər dağıdılacaq. Həmin obyektlərin bir neçəsi isə vəzifəli şəxslərə məxsusdur. Bildiyimə görə, bazardakı ən böyük obyektin sahibi komitə sədrinin qardaşıdır. İki mərtəbədən ibarət olan tikinti materiallarının satışı mərkəzi bu yaxınlarda təmir edilib. Təxminən 300 min manata yaxın pul gedib. Sökülmə xəbərinin ortaya çıxması isə icra hakimi ilə komitə sədrini üz-üzə qoyub. Qardaşının obyektini qorumaq istəyən sədr şəhər rəhbərinə buranı sökməmək üçün müraciət etsə də, istədiyi cavabı almayıb. İcra başçısı bildirib ki, şəhərin cənub girişinin abadlaşması planına görə, ərazidə yerləşən bütün obyektlər sökülməlidir». Mənbə deyir ki, sentyabr ayından etibarən bazarın sökülməsinə başlanacaq: «Sahibkarlar istəsə də, istəməsə də obyektlərini itirməli olacaqlar. Artıq layihə hazırdır və buna uyğun olaraq mərhələli şəkildə işlər həyata keçiriləcək. Burdakı iş adamları təklif edilən yeni bazarla razılaşmaq məcburiyyətindədirlər. Əgər komitə sədri belə bu məsələdə nəyəsə nail ola bilməyibsə, adi sahibkarlar heç nə edə bilməyəcəklər. Hələ deyilənə görə, Saray qəsəbəsi ilə Sumqayıtı birləşdirən körpünün alt hissəsində fəaliyyət göstərən tikinti materiallarının satışı bazarı da ləğv oluna bilər. Təmir-tikinti işləri bu sahəyə də aid edilsə, o zaman həmin bazarı da sökəcəklər». Məlumatlı şəxs onu da qeyd edir ki, bu, komitə sədrinin şəhər rəhbərinə ikinci məğlubiyyətidir. Bundan əvvəl, daha doğrusu, icra hakimi Sumqayıta gəldiyi ilk vaxtlarda komitə sədri ilə başqa problem yaşamış və bu məsələdə də istədiyi sonluğu əldə edə bilməmişdi. Ən son məlumatlara görə, bazarı tərk etmək fikrində olmayan bir qrup sahibkar dünən günorta saatlarında Sumqayıt ŞİH-in binası önündə öz etirazlarını bildiriblər. Ancaq polisin müdaxiləsi ilə əraziyə toplaşan 10-a yaxın sahibkar burdan uzaqlaşdırılıb. Məsələ ilə bağlı ŞİH-lə əlaqə yaratmaq istəsək də, bütün cəhdlərimiz uğursuz alındı. Buna baxmayaraq, qarşı tərəfin də mövqeyini öyrənməyə hazırıq.

Elgün