Mitinq Komitəsinin sədri Asəf Quliyev bildirib ki, ona çatan məlumatlara görə şəhərdən Bayıl istiqamətində hərəkət edən bütün avtobusların qarşısı alınıb.

Avtobusların işləməməsi aksiyaya qoşulmaq istəyən adamlara ciddi problem yaradır. A.Quliyev aksiyanın buna görə bir qədər də uzanacağını deyib.

***

Əli Kərimli bu dəqiqələrdə güclü mühafizə altında aksiyaya gəlib.

* * *

Mitinqə axın davam edir. Amma polis əməkdaşları 18 yaşdan aşağı olan şəxsləri aksiyaya buraxmırlar.

Onların sənədləri yoxlanır. Yaşı 18-dən az olanlar geri qaytarılır.

Amma yaşı az olduğu üçün geri qaytarılan bir gənc cibindən YAP üzvü olduğunu bildirən vəsiqəni çıxarıb polislərə təqdim edəndən sonra mitinq iştirakçılarına qoşulmağa nail olub.

◀▶
* * *

Əməkdaşımız aksiya məkanından bildirir ki, mitinq artıq 10 dəqiqədir davam etsə də aparıcı müxalifət partiyalarının Müsavatla AXCP-nin sədrləri hələ aksiyaya gəlməyiblər.

Nə İsa Qəmbər, nə də Əli Kərimli mitinqdə deyillər.

Partiya sədrlərindən yalnız KXCP sədri M.Mirəlioğlu və ACP sədri Sülhəddin Əkbər aksiyada iştirak edirlər.

Eldar Namazov isə mitinqə 10-12 dəqiqəlik gecikmə ilə bu dəqiqələrdə qatılıb.

* * *

Əməkdaşımızın mitinq məkanından verdiyi ən son xəbərə görə, Mitinq Komitəsi aksiya iştırakçılarına xəbərdarlıq etdi.

Bildirdi ki, mitinqin öz şüarları olduğu üçün əlavə məzmunda heç bir şüar səsləndirmək və plakat qaldırmaq olmaz.

◀▶
* * *

Hüquq-mühafizə orqanları əməkdaşlarının mitinqdə video və fotoçəkiliş aparmağa başlaması aksiya təşkilatçılarının narazılığı ilə qarşılanıb.

Mitinq Komitəsi üzvlərinin etirazından sonra çəkilişlər dayandırılıb.

◀▶
* * *

Əməkdaşımız bildirir ki, mitinq meydanına gələn ilk partiya sədri KXCP sədri Mirmahmud Mirəlioğlu oldu.

KXCP üzvləri bu dəqiqələrdə meydana kolon şəklində gəldilər. Sayları 200 nəfər olar.

* * *

Mitinqçilər üzərində “Azadlıq”, “Azad seçki” sözləri yazılmış plakatlar qaldıran kimi polis əməkdaşları həmin palakatları onların əlindən zorla alaraq cırdılar.

* * *

Əməkdaşımız bildirir ki, mitinqçilərin toplaşması hazırda davam edir.

Meydanda ən çox Müsavat və AXCP bayraqlarının gözə dəyməsi bu aksiyanın əsas iştirakçıları həmin partiyaların üzvləri və tərəfdarlarıdır.

◀▶
* * *

Polis mitinqə gələnlərin üstünü yoxlayarkən onlardan birinin cibindən boş giliz (patron) və yivaçan (“otvertka”) tapıb.

Əməkdaşımızın verdiyi məlumata görə, polis həmin şəxsi saxlayıb və mitinq keçirilən əraziyə buraxmayıb. Sonradan həmin şəxs bu əşyaları polisə təhvil verərək mitinq sahəsinə keçib.

◀▶
* * *

Polis əllərində əsgərlikdə ölmüş oğlanlarının şəkillərini tutan üç qadının şüarlar qışqırmasına mane olmağa çalışıb.

Qadınların hakimiyyətin ünvanına sərt sözlər deməsi polisin onlara hücumu ilə nəticələnib. Polis əməkdaşları bu üç əsgər anasını tutaraq zorla sürüyə-sürüyə ərazidən uzaqlaşdırıblar.


◀▶
* * *

Mitinqdə müxalifət liderlərinin çıxışı üçün səhnə düzəldilir.

Səsgücləndiricilərin işləməsi üçün elektrik xətti lazımdır.

Amma görünən budur ki, müxalifətə işıq verilməyəcək. Bunun üçün artıq ehtiyat tədbir görülüb.

Əraziyə generator gətirilməsinə qərar verilib.

* * *

Bu gün saat 17:00-da Milli Şuranın mitinqi başlayacaq. Artıq müxalifət üzvləri yavaş-yavaş mitinqin keçiriləcəyi "20-ci sahə"yə toplaşmağa başlayır.

Virtualaz.org-un hazırda "20-ci sahə"də olan əməkdaşları bildirir ki, mitinqin keçiriləcəyi ərazi və həndəvəri polis nəzarətinə götürülüb. Sürücülük məktəbinin həyətində keçiriləcək mitinqə gələnlərin sayı hələlik az olsa da axın davam edir. Polis əməkdaşlarının sayı isə göründüyü qədəri ilə 500-600 nəfərə yaxındır. Mitinqə gələnlərin əksəriyyəti Müsavat Partiyasının üzvləridir. Meydana Müsavat Partiyasının rayon təşkilatlarının bayraqları gətirilib. Polisin ciddi nəzarəti şəklində mitinqdə iştirak etmək istəyənlər də, media nümayəndələri də üzərləri yoxlanıldıqdan sonra Sürücülük məktəbinin həyətinə buraxılır.