Sabiq nazirin onu müdafiə edəni yox, həbs etdirəni seçməsinə dair musavat.com-un şərhi
Öncə sabiq nazir F. Əliyevin 24 avqustda yayılan qəribə müraciəti ilə tanış olaq:

"Bu gün mənə məlum oldu ki, professor Cəmil Həsənli qarşıdan gələn prezident seçkisində Milli Şuranın namizədi olub. Cəmil Həsənli mənim həmyerlim, uzaq qohumumdur və eyni zamanda hüquqlarımı müdafiə komitəsinin sədridir. Cəmil Həsənliyə çox böyük hörmətim var, mənim üçün çəkdiyi əziyyətlərinə görə ona minnətdaram.

Bununla belə, Azərbaycan Respublikası prezidenti seçkisində yaxından tanıdığım, uzun illər birgə çalışdığım, səriştəsinə, bilik və bacarığına yaxından bələd olduğum, Azərbaycanın iqtisadi dirçəlişini təmin edən, dünyaya tanıdan, uzaqgörən siyasəti ilə beynəlxalq nüfuza malik olan cənab İlham Əliyevə inanıram və onu dəstəkləyirəm. Bu səbəblərə görə də prezident seçkisində cənab İlham Əliyevə səs verəcəyəm. Yaxınlarımın da mənimlə eyni mövqedə durduğuna inanıram".
****
Burada ilk diqqəti çəkən cəhət müraciətin bu qədər opertiv, tələm-tələsik, həm də istirahət günündə mediaya ötürülməsidir. Həbsdə yatanlar bilirlər- adətən şənbə və bazar günləri vəkillər öz müvəkkilləri ilə görüşə getmirlər. Ya da bu, nadirən olur. Xüsusi ilə də istintaq altında olmayan, cəzaçəkmə müssisələrində uzun zaman dustaq həyatı yaşayanlar vəkillə gündəlik təmasa ehtiyac duymurlar. Nəzərə alsaq ki, sabiq nazirin vəkili də ölkənin ən yaxşı vəkillərindəndir; işi həddindən artıq çoxdur; Elton Quliyev də durduq yerdə heç bir müvəkkilinin yanına istirahət günlərində ziyarətə getmir. Birinci nəticə budur- vəkil F. Əliyevin təşəbbüsü ilə, məhz xüsusi xahiş əsasında həbsxanaya gedib. Fərhad Əliyevə bu müraciəti dərhal, Cəmil Həsənlinin namizədliyinin üzərindən heç bir sutka keçmədən yaymaq lazım olub. İş həftəsini gözləmək istəməyib; yaxnlarına xəbər sallayıb; vəkil gedib, o da yazıb; sonuncu abzasdakı cümlələrin mürəkkəb quruluşundan da göründüyü kimi, redaktəsini, ya da yeni redaksiyasını Elton Quliyev həyata keçirib. Onun müvəkkili olmuş siyasi dustaqlardan biri iddia edir ki, vəkil bu cür cümlələr qurmağı çox sevir.
Fərhad Əliyevin tələsməsinin iki səbəbi ola bilər:
1. Bu müraciəti ondan iqtidardakılar tələb ediblər; təhdid ediblər ki, ortaya mövqe qoysun, yoxsa yaxın çevrəsinə və s problemlər yaradılacaq...
2. Bu, onun öz təşəbbüsüdür, narahat olub ki, hakimiyyətdəkilər Cəmil Həsənliyə hər cür dəstək verəcəyini, onunla birlikdə hərəkət edəcəyini düşünər, müxalifəti maliyyələşdirməsi barədə şübhəyə düşərlər. Özünün də dediyi kimi, Cəmil Həsənli ilə qohumluq əlaqələri var, professorun öz üzərindəki zəhmətini, haqqını tanıyır və s.
Bizə görə ikincidir, lakin birinci varsayımı da inkar etmirik. Əslində, müəyyən maliyyə imkanlarının qaldığı hələ də iddia edilən sabiq nazir əndişəsində haqlıdır. Cəmil Həsənli böyük fədakarlıq edərək, Milli Şuranın vahid namizədi olmağa razılaşması ilə özünü bu iqtidarın bir saylı hədəfinə çevirdi. İndi təbii ki, ona yaxın olan hər kəsi araşdıracaq, sıxışdıracaq, ələkdən keçirəcək, neytrallaşdırmağa qalxacaqlar. Bu yaxınlar sırasında Fərhad Əliyevin adı hər halda sonuncu deyil; yəqin ki, birincidir.
Bu səbədən də Fərhad Əliyev artıq vəziyyətini, qohum-qardaşının onsuz da gərgin olan həyatını daha da gərginləşdirməmək, bu seçkidən sonra özü və qardaşı üçün ümid etdiyi əfvə ümidini itirməmək üçün bu cür açıqlama verə bilərdi.
Sosial şəbəkələrdə və musavat.com-un şərhlərində onu qınayırlar. Lakin unudurlar ki, bu adam 8 ildir həbsdədir; bayırda ailəsi var; özünün, ya da qardaşının bu il çıxmaq şansı qalır; ən pis halda 2 il sonra azadlığına qovuşacaq. Düşünə bilər ki, adı siyasi müxalifətlə birgəlikdə hallansa, təbii ki, onu yaxşı perspektivlər gözləməyəcək.
Lakin professor Həsənlinin, demokratik düşərgənin bu seçkini qazanmaq şansı da var. Bu gündən baxanda, çox deyil, nəzəridir; lakin bu şans mövcuddur. 5-10, hətta 20 gün sonra nə olacağını isə kimsə proqnozlaşdra bilməz.
O zaman inanırıq ki, Cəmil Həsənli, bu detalı nəzərə almadan prezident kimi ilk işi müdafiəsindəki sabiq naziri açıb buraxmaq olacaq.