Həbsdəki sabiq nazirlərlə görüşən mübhəm məmur bilindi; Milli Şuranın Cəmil Həsənlini özünə vahid namizəd seçib seytnotdan çıxması iqtidarı hərəkətə keçirib; prezidentin ən sadiq adamı olan cənab Əsədov türmədə Fərhad Əliyevlə anlaşıb...
Sabiq iqtisadi inkişaf naziri Fərhad Əliyevin ötən həftəsonu türmədən verdiyi bəyanat hələ də mediada və siyasi çevrələrdə müzakirə olunur. Sabiq nazirin bu bəyanatı verməsi ciddi şəkildə dartışılır. F.Əliyevi bu addıma vadar edən səbəblər araşdırılır, onun bu bəyanatı cəmiyyətə ötürməklə iqtidara hansı mesajları vermək istədiyi təhlil edilir.
“Yeni Müsavat” qəzeti və musavat.com saytı ilk gündən keçmiş nazirin sözügedən mesajını şərh etməyə başladı. Bu bəyanatın “dərin”lərini aşkara çıxarmağa çalışdı. Keçmiş nazirin onu müdafiə edən bir komitənin rəhbəri olan Cəmil Həsənlidən az qala imtina anlamına gələn bu bəyanatının arxasında dayanan məcburiyyətləri və ehtiyacları gün işığına çıxarmağa cəhdlər etdik.
F.Əliyev avqustun 24-də türmədən vəkili Elton Quliyev vasitəsilə mətbuata göndərdiyi həmin bəyanatında bildirir: “Bu gün mənə məlum oldu ki, professor Cəmil Həsənli qarşıdan gələn prezident seçkisində Milli Şuranın namizədi olub. Cəmil Həsənli mənim həmyerlim, uzaq qohumumdur və eyni zamanda hüquqlarımı müdafiə komitəsinin sədridir. Ona çox böyük hörmətim var, mənim üçün çəkdiyi əziyyətlərinə görə ona minnətdaram.
Bununla belə, Azərbaycan prezidenti seçkisində yaxından tanıdığım, uzun illər birgə çalışdığım, səriştəsinə, bilik və bacarığına yaxından bələd olduğum, Azərbaycanın iqtisadi dirçəlişini təmin edən, dünyaya tanıdan, uzaqgörən siyasəti ilə beynəlxalq nüfuza malik olan cənab İlham Əliyevə inanıram və onu dəstəkləyirəm. Bu səbəblərə görə də prezident seçkisində cənab İlham Əliyevə səs verəcəyəm. Yaxınlarımın da mənimlə eyni mövqedə durduğuna inanıram".
Ötən sayımızda bu mövzuda hazırladığımız manşet yazısında bəyanatın ortaya çıxma səbəbləri haqda bəzi arqumentlər irəli sürmüş, versiyalar yazmışdıq. Bildirmişdik ki, Fərhad Əliyevin tələsməsinin iki səbəbi ola bilər:
1. Bu müraciəti ondan iqtidardakılar tələb ediblər; təhdid ediblər ki, ortaya mövqe qoysun, yoxsa yaxın çevrəsinə və s. problemlər yaradılacaq.
2. Bu, onun öz təşəbbüsüdür, narahat olub ki, hakimiyyətdəkilər Cəmil Həsənliyə hər cür dəstək verəcəyini, onunla birlikdə hərəkət edəcəyini düşünər, müxalifəti maliyyələşdirməsi barədə şübhəyə düşərlər. Özünün də dediyi kimi, Cəmil Həsənli ilə qohumluq əlaqələri var, professorun öz üzərindəki zəhmətini, haqqını tanıyır və s.
Bu yazıdan sonra redaksiyamıza bəzi məlumatlar daxil olub. Həmin məlumatlarda bildirilir ki, Fərhad Əliyevin sözügedən bəyanatının ortaya çıxması həqiqətən də təsadüf olmayıb. Nəinki təsadüf və sabiq nazirin özfəaliyyəti deyil, hətta mənbə iddia edir ki, bu sənədin yayılmasının arxasında bilavasitə iqtidarın təşəbbüsü və təklifi olub.
Xəbər qaynağımızın iddiasına görə, F.Əliyevə bu bəyanatın yazılmasının vacibliyini prezidentin iqtisadi məsələlər üzrə köməkçisi, Prezident Administrasiyası rəhbərinin müavini Əli Əsədov çatdırıb. Hakimiyyət Milli Şuranın Cəmil Həsənli gedişindən sonra ciddi şəkildə narahatlıq keçirməyə başlayıb. Dövlətin təpəsində avqustun 21-dən, yəni MŞ rəhbərliyinin sessiyanın zamanını qabağa çəkməsindən sonra işi ciddiyə alıblar. Proseslərin professor C.Həsənlini Milli Şuranın vahid namizədi etməyə doğru getdiyini həmin gündən başlayaraq saytlar və qəzetlər manşetlərinə daşıdılar. Artıq hər kəs bilirdi, iqtidara da əyan idi ki, 23 avqust sessiyasında Milli Şura özünə yeni vahid namizəd seçəcək və bu da C. Həsənli olacaq. Hakimiyyətin əlində başqa vasitələr də var - o, Milli Şuranı yönləndirənlərin və xüsusilə də Rüstəm İbrahimbəyovla Bakıdan danışıq aparanların hər birini dinləyə və izləyə bilir. Bütün bunlar iqtidarda hələ 21 avqust axşamından belə bir əminlik yarada bilərdi ki, bu dəfə müxalifətin real namizədi ilə qarşı-qarşıya dayanacaq.
Buna qədər isə R.İbrahimbəyovun MŞ-nin vahid namizədi kimi seçkiyə qatıla bilməməsi üzündən müxalifətin bu böyük birliyində fikir ayrılıqlarının, narazılıqların, qarşılıqlı ittihamların yaranması hakimiyyəti xeyli arxayın etmişdi. Vəziyyətin qəfildən dəyişməsi və müxalifətin seçkiyə həbsdəki sabiq nazirlərdən birinin ən yaxın adamı ilə getməsi iqtidarın sinir ocaqlarını və özünüqoruma refleksini tam gücü ilə işə salıb. Və bu instinkt Əli Əsədovu yenidən həbsxanaya - Fərhad Əliyevlə görüşə (sözün birbaşa və dolayı mənasında) getməyə vadar edib. Ötən yazımızda da qeyd etdiyimiz kimi, bu bəyanatın bədəli Əliyev qardaşlarının seçkidən sonra azadlığa çıxması ola bilər. Mənbəmiz bildirir ki, Ə.Əsədov türmədə F.Əliyevə bu barədə çox yüksək səviyyədə söz verib...

Qısa arayış və xatırlatma...

Həbsdəki və bayırdakı sabiq hakimiyyət nümayəndələri ilə, keçmiş alovlu əliyevçilərlə işləmək, əlaqə saxlamaq, vaxtaşırı onlarla görüşmək, vurulmuş və içəri atılmış bu ekslərin təklifini dinləmək, hakimiyyətin təkliflərini onlara çatdırmaq məsələlərinə hörmətli Əli Əsədovun məsul olduğuna dair məlumatlar var. Bu məlumatı bizə vaxtı ilə Əli müəllimlə təmasları olmuş bir sabiq əliyevçinin özü deyib. Həmin şəxsin bildirdiyinə görə, Ə.Əsədov ölkə başçısının adından həmin sabiqlərlə görüşür, onları dinləyir, təkliflərini, etirazlarını dəyərləndirir, bəzi hallarda isə iqtidarın bir sıra tapşırıq və ya xahişini həmin adamlara çatdırır. Bu cür sabiqlərdən biri də deyilənə görə, Fərhad Əliyevdir.

***

Daha bir vacib detal

Bir neçə il öncə F.Əliyevin vəkillərindən biri sabiq nazirin Avropa İnsan Haqları Məhkəməsinə ünvanladığı bir müraciəti səhvən mətbuata ötürmüşdü. Həmin müraciətdə F.Əliyev həbsxanada onunla bir iqtidar yetkilisinin bir neçə dəfə görüşdüyünü, onun dövlət rəhbərliyi adından bəzi təkliflər səsləndirdiyini, tələblərdə bulunduğunu yazmışdı.

***

Bu işin cənab Əsədova həvalə edilməsi də səbəbsiz deyil: Hakimiyyətə yaxın çevrələrin arayışına və həmçinin ortada olan bəzi faktlara əsasən deyə bilərik ki, Əli Əsədov hazırda prezidentin ən etibar etdiyi, güvəndiyi üç-beş məmurdan biridir. Ə.Əsədovun iç məlumatlara çıxış əldə etməsi, prezidentin ən yaxın çevrəsində mövqe tutması onun ölkə başçısı yanında hörmət və etibar qazanması ilə bağlıdır. Hakimiyyətə yaxınlığı mənbələr deyir ki, Ə.Əsədov ölkənin 1-ci şəxsinə, onun ailəsinə həddən artıq sadiq məmurdur. Bu yaxınlıq və onun bu cür güvən qazanması yaxın gələcəkdə vəzifə pillələrində daha da yüksələcəyi haqda məlumatların yayılmasına rəvac verir. Bunun seçkidən sonra baş tutacağı haqda bilgilərimiz olsa da, bu bilgilər hazırkı yazının mövzusuna uymadığı üçün bunu bir başqa yazılarda istifadə etməyi düşünürük. İndi isə mövzumuza qayıdaq.
Mənbə bildirir ki, Əli Əsədovla yanaşı F.Əliyevlə bir başqa məmur da işləməyə görəvləndirilib. Bu, Əmlak Məsələləri Dövlət Komitəsinin sədri Kərəm Həsənovdur. K.Həsənov F.Əliyevin kadrı olub. Həmyerlidirlər. Hər ikisi Cəlilabad rayonundandır. Onu vəzifəyə məhz F. Əliyev irəli çəkib. F.Əliyev həbs edildikdən sonra çoxları K.Həsənovun da işdən çıxarılacağını və tutulacağını gözləsə də tam əks proses baş verdi. Onun rəhbərlik etdiyi qurumun səlahiyyətlərini bir qədər də artırdılar. Bir neçə dövlət idarəsini də Əmlak Komitəsinə tabe etdirdilər, qardaşı deputat seçildi və s.
Mənbənin bildirdiyinə görə, K.Həsənov F.Əliyevin qohumları, yaxın çevrəsi ilə işləməyə təhkim edilib. K.Həsənov Əliyev qardaşlarının bayırdakı yaxınlarının Milli Şuraya səs, ən əsası isə pul vermələrinə əngəl olmalıdır. Qaynağımız bildirir ki, burada təhdid, hədə tonundan daha çox vədlər dövriyyədədir. Görünür, vaxtilə külli miqdarda pula, mülkə nəzarət etmiş Əliyev qardaşlarının maddi baxımdan tam iflas olmalarına iqtidar sahibləri inanmır. Mümkündür ki, bu səbəbdən də hakimiyyət tez-tələsik türmədən Fərhad Əliyevin məlum bəyanatını səsləndirməsinə ehtiyac duyub.
Amma siyasi prosesləri heç cür proqnozlaşdırmaq, önləmək olmur. Bəzən 15 günün içində ölkədə proseslər o dərəcədə sürətlə dəyişir ki, müxalifətin, narazı elektoratın Fərhad Əliyevin (ya da başqasının) qəpik-quruşuna ehtiyacı da qalmır. Bir də görürsən qapı elə yerdən açılır ki, Fərhad Əliyevdən də imkanlı, nüfuzlu, səlahiyyətli adamlar müxalifətə və xalqa xidmət göstərmək üçün növbəyə düzülürlər.