Ölkə başçısının region səfərlərində korrupsiya həyəcanı; Dövlət başçısının əyalətlərə səfərləri zamanı ona nazirlər Şahin Mustafayevin, Fazil Məmmədovun və İsmət Abbasovun yerlərdə vətəndaşları incitmələri, korrupsiya əməliyyatları ilə bağlı xeyli sayda müraciətlər təqdim edilib; hər üç məmur haqda araşdırmalar başlayıb, onların yeni komandada yer almaması mümkündür
“Ölkə başçısı, YAP-ın prezidentliyə namizədi İlham Əliyevin seçki ərəfəsində regionlara etdiyi səfərlər zamanı bir sıra məmurların fəaliyyəti haqda ona xeyli materiallar təqdim olunub. Həmin sənədlərdə nazirlərin əyalətlərdə həyata keçirdikləri dəhşətli korrupsiya əməliyyatları əksini tapıb”.
Bu məlumatı əməkdaşımıza iqtidara yaxın olan bir mənbə verib. Qaynaq deyib ki, seçki ərəfəsində İlham Əliyevin səfərləri çərçivəsində Prezident Administrasiyasının məsul işçilərinə əyalətlərdə prezidentlə görüşmək istəyən şəxslərlə təmas yaradılması tapşırılıb: “Məqsəd də o olub ki, yerlərdə əhalinin daha çox narazılıq etdiyi qurumlar haqda müfəssəl bilgilər əldə edilsin. Regionlarda görüşlər zamanı Prezident Administrasiyasının əməkdaşlarına müxtəlif təmaslar zamanı yerli sahibkarlardan, kəndlilərdən, rayon sakinlərindən üst-üstə minlərlə müraciətlər təqdim edilib. Həmin şikayət məktubları araşdırılıb, bir sıra problemlərin həllinə dərhal göstəriş verilib. Ancaq bu məktublar təkcə vətəndaşların problemlərini həll etmək üçün araşdırılmayıb; həm də bu şikayətlərin daha çox hansı qurumlardan edildiyi, məsələnin mahiyyətinin nə olduğu təftiş edilib. Bu araşdırmaların yekun nəticəsi haqda ölkə başçısına operativ olaraq yazılı və şifahi məlumatlar təqdim olunub. Verilən təqdimat ondan ibarətdir ki, yerlərdə insanları narazı salan, dövlət büdcəsindən ayrılan vəsaitləri açıq şəkildə talan edənlər sırasında üç nazirlik ”liderdir". Kənd Təsərrüfatı, Vergilər və İqtisadi İnkişaf nazirliklərinin bölgələrdə həyata keçirdikləri maxinasiyalar, insanların, xüsusilə iş adamlarının başına gətirdikləri müsibətlər ölkə başçısına konkret faktlar əsasında təqdim olunub. Üzə çıxan fakt bundan ibarətdir ki, dövlət başçısının xüsusi diqqət yetirdiyi Regionların Sosial-İqtisadi İnkişafı Proqramı üzrə ayrılan vəsaitlərin Kənd Təsərrüfatı və İqtisadi İnkişaf nazirliklərinin xətti ilə xərclənən hissəsi gözgörəsi talan edilib. Fermerlər, əkin-biçinlə məşğul olan kəndlilər üçün ayrılan subsidiyalar mənimsənilib, yeni kənd təsərrüfatı texnikaları adı altında alınan maşınların çoxu köhnədir, gübrə alınması üçün ayrılan pullar da kəndlilərə çatmayıb. Həmçinin İqtisadi İnkişaf Nazirliyinin regionların inkişafı ilə bağlı üzərinə düşən işləri formal olaraq həyata keçirdiyi, nəzarət funksiyasını rüşvət mexanizmi ilə idarə etdiyi birinci şəxsə təqdim olunub. Vergilər Nazirliyinin isə yerlərdə sahibkarlara qan uddurması, onları “aylığa oturtmaları” haqda yüzlərlə müraciət daxil olub. Həmçinin bələdiyyələrin, icra başçılarının da bu proseslərdə dövlət vəsaitlərinin müəyyən faizini mənimsədikləri, vətəndaşları ciddi şəkildə narazı saldıqları vətəndaşların müraciətləri əsasında faktlarla təsbit olunub. Təbii ki, bu yeyintilərin, korrupsiyanın - Fazil Məmmədov, İsmət Abbasov və Şahin Mustafayevdən xəbərsiz həyata keçirilməsi mümkünsüzdür".
Mənbəmiz qeyd edib ki, İlham Əliyev yenidən prezident seçiləcəyi təqdirdə, yeni komandasında kimləri saxlayacağına həm də bu araşdırmaların nəticəsi olaraq qərar verəcək: “İstisna deyil ki, bu nazirlərin barəsində cinayət işi də başlayacaq. Həmçinin xeyli sayda icra başçısı da işdən çıxarılacaq, bəziləri məsuliyyətə cəlb ediləcək. Bu, həm də ölkə başçısının yeni komanda formalaşdırması üçün köhnələrlə vidalaşmasına stimul ola bilər”.