PKK ilə bağlı olduğu deyilən məmur daha bir qanuna əngəl yaradır

gundemxeber.az “Azərbaycan hökuməti diffomasiya qanunu hazırlayaraq Avropa Şurasının Venesiya Komissiyasına göndərib. İndi Venesiya Komissiyasının cavabını gözləyirik”. Milli Məclis Aparatının rəhbəri Səfa Mirzəyev dekabrın 24-də “Media forum” saytına belə deyib.
Səfa Mirzəyev qeyd edib ki, o, diffomasiya qanunu ilə bağlı əvvəlki mövqeyində qalır: “Nəinki Azərbaycan, heç bir normal cəmiyyət bu qanunu qəbul etməməlidir. Avropa ölkələrinin əksəriyyəti bu qanunu qəbul etməyib. İndi bunu bizə calayıblar və iddia edirlər ki, mədəniyyət yoxdur və tənqidi sözə dözümlülük mədəniyyəti olana qədər proseslər qanunla tənzimlənsin. Hesab edirəm ki, əksinə, gərək mətbuatın mədəniyyəti yüksəlsin ki, diffomasiya qanununu qəbul edə bilək. Belə olan halda bu qanunun dəyəri ola bilər. İndiki halda bu qanunu qəbul etsək, mətbuatda savadsız yazıların sayı artacaq.
Nəzərə almaq lazımdır ki, biz Azərbaycan xalqıyıq. Bir var problemi hüquqi yolla həll edəsən və bunun üçün məhkəməyə müraciət edəsən, bir də var “razborka” aparasan. Diffomasiya qanununun qəbulundan sonra “razborkalar” başlayacaq. Bu da lap pis. Əgər məhkəmə yolu yoxdursa, məni təhqir edənlə məsələni özüm həll edəcəyəm. Sən bu materialı niyə yazmısan, haradan götürmüsən, niyə belə yazmısan… İndi bu suallara məhkəmə vasitəsi ilə cavab verilir. Diffomasiya haqqında qanun qəbul ediləndən sonra isə bu, fərdi “razborkaya” çevriləcək”.
Səfa Mirzəyevin bu açıqlaması açıq-aşkar parlamentin gözlənilən qanunu qəbul etməsinə əngəllər yaradılacağını göstərir. Özü də bunu kim deyir? Səfa Mirzəyev. O Səfa Mirzəyev ki, onunla bağlı çox ciddi ittihamlar mövcuddur. İstiqlalçı millət vəkili Hacıbaba Əzimov deyir: “PKK-nı Azərbaycan rəsmən tanımayıb, heç bir qərar da qəbul olunmayıb. Ancaq PKK-çılara yaxın adamlar indi Milli Məclisdə at oynadır. Millətimizə, dövlətimizə ziyanlı hərəkətlərinə davam edirlər. Dövlət Müstəqilliyi gününün iş günü olması haqqında qərarın qəbul olunması da onların “xidmətləridir”. Onlar fəaldırlar, xaricdən də möhkəm himayə olunurlar. Amma təəssüf ki, onlara qarşı müqavimət çox zəifdir. Bəzən bizim siyasətçilər bu barədə danışır, ancaq konkret ad çəkməyə çəkinirlər. Dəfələrlə demişəm ki, Səfa Mirzəyev Öcalanın yaxın dostudur, PKK-çıdır. Hadı Rəcəbli Əlikram Hümbətovun yaxın adamı olub. Bunlar antimilli qüvvələr siyahısında olan adamlardır. Mafioz qruplaşmanın öncüllərindəndir. Kişilikləri varsa, versinlər məni məhkəməyə, bunu sübut da edim. Nə məhkəməyə veriblər, nə də təkzib ediblər. Tələb etməliyik ki, bunlar hakimiyyətdən təcrid olunsunlar. Bəzən belə adamların fəaliyyətlərini ifşa etməkdən çəkinirik. Hamı bunu deməlidir, onların deputat kürsüsündən kənarlaşdırılmasına nail olmalıyıq.”
Məlumatlara görə, Türkiyə millətçiləri Azərbaycanın Milli Məclisinin bu günə qədər PKK-nı terror təşkilatı kimi tanımamasını da anlamadıqlarını və bu məsələdə konkret bir məmurumuzun əməlli-başlı sipər rolunu oynadığını ifadə ediblər: «Türkiyə millətçiləri bəyan ediblər ki, bu işdə Azərbaycanın Milli Məclis Aparatının rəhbəri Səfa Mirzəyev birbaşa olaraq maraqlı tərəfdir». İttihamlarda bildirilir ki, Səfa Mirzəyev iki dəfə Azərbaycanın müxalif deputatları tərəfindən PKK-nın terror təşkilatı kimi tanınması məsələsinin müzakirəyə çıxarılmasını əngəlləyib.
Onu da xatırladaq ki, Azərbaycanın bəzi məmurlarının adları ilk dəfə deyil ki, PKK ilə qoşa çəkilir. Hətta bir ara mətbuatda belə bir xəbərlər də yayıldı ki, Bakıya səfəri zamanı Türkiyənin ədliyyə naziri PKK ilə ilişgiləri səbəbindən dörd yüksək çinli məmurumuzun sorğuya alınması üçün rəsmi Bakıdan icazə istəyib, amma buna izin verilməyib. Bəlkə elə, Səfa müəllimi narahat edən də özü ilə bağlı faktların mətbuata yol açacağıdır və bu səbəbdən diffomasiya haqqında qanuna problemlər yaradılır?

Elçin Əmirov