Gəncənin icra başçısına qarşı narazıların koalisiyası yarana bilər

Gəncənin icra başçısı işini itirə bilər. Məlumatlara əsasən icra başçısı şəhərdəki məmurlarla işləyə bilmir. Onun yerli məmurlarla olan pis münasibətləri artıq pik həddə çatıb. Gəncə şəhər İcra Hakimiyyətinin başçısı Elmar Vəliyevin işdən çıxarılması məsələsi Prezident Administrasiyasında müzakirə edilir.
Bu barədə bizi bilgiləndirən mənbənin dediyinə görə, artıq E.Vəliyevin vəzifəsindən götürüləcəyi ilə bağlı hakimiyyətin üst qatında başlayan müzakirələr intensiv xarakter almağa başlayıb. Bizə çatan məlumatlarda bildirilir ki, Gəncə əhalisi icra başçısının fəaliyyətindən çox narazıdır. İsmayıllı olaylarından sonra ölkənin ikinci böyük şəhərinin əhalisinin narazılığı siyasi hakimiyyəti ciddi narahat edir. Ən azı ona görə ki, İsmayıllıda olduğu kimi Gəncədə də eyni problemlər yaşanır -söyüşcül icra başçısı, sakinlərin sosial və mülkiyyət hüququnun tapdalanması və s.
Mənbə bildirir ki, Elmar Vəliyevin işdən çıxarılması hələ İsmayıllı hadisələrindən öncə - Gəncənin polis rəisi, general Rasim Musayevlə aralarında olan davadan sonra gündəmə gəlib. Prezident Administrasiyasında belə hesab edirlər ki, icra başçısı ilə polis rəisi arasında münasibətlər belə dözülməz olubsa, onda icra başçısı ilə başqa məmurlar arasındakı münasibətlər daha pisdir. Çünki polis rəisi daxili işlər nazirinin əmri ilə bu posta təyin və azad edilir. Yəni icra başçısının bu təyinata müdaxilə imkanları sıfırdır. Ancaq başqa dövlət məmurları ya icra başçısının əmri ilə, ya da təqdimatı ilə (məsələn, təhsil və yaxud səhiyyə şöbəsinin müdiri) təyinat alırlar. Ona görə də icra başçısı tabeçiliyində olanlarla daha sərt və kobud davranır. Yerli sakinlərlə normal davranışdan danışmaq isə ümumiyyətlə yersizdir. Gəncədə sadə insanların təhqir edilməsi, mülkiyyətinin zorla əlindən alınması artıq ənənə halını alıb. Ona görə də Rasim Musayevlə insidentdən sonra E.Vəliyevin işdən çıxarılması gündəmə gəlib. İsmayıllı hadisələrindən sonra isə məsələ daha da aktuallaşıb.
Məlumatlara əsasən icra başçısının hətta Gəncə şəhər YAP-ın sədri Naqif Həmzəyevlə də münasibətləri gərgindir. Bu ilin yazında N.Həmzəyev YAP-a sədr təyin edildikdən sonra icra başçısı ilə aralarında münasibətlərin gərgin olması barədə informasiyalar yayıldı. Gənc bir oğlanın böyük bir şəhərə həm də Elmar Vəliyevin xəbəri olamadan mühim bir siyasi posta təyin edilməsini başçı anlayışla qəbul edə bilmirdi. Yerli mediada yayılan məlumatlara əsasən YAP-ın gənc sədri hələ də Gəncədə icra başçısının qeyri-rəsmi tapşırığı ilə problemlərlə qarşılaşdırılır. Hətta bu barədə bilgi verən mənbə iddia edir ki, Naqif Həmzəyev YAP-ın şəhər təşkilatının kommunal problemlərini belə həll etmək iqtidarında deyil. Ona icra başçısı tərəfindən ciddi problemlərin yaradıldığı söylənilir.
Yada salaq ki, Gəncənin icra başçısı Elmar Vəliyevin şəhid anasını təhqir etməsi və bu səbəbdən də polis rəisi ilə mübahisələrinin düşməsi ilə bağlı ölkə mətbuatında çoxsaylı məlumatlar getmişdi. Həmin məlumatda bildirilirdi ki, icra başçısı E.Vəliyev şəhid anasının etiraz çıxışından qəzəblənib ətrafdakı məmurların üstünə bağırıb. R.Musayev isə onun kobud davranışını həzm edə bilməyib. Nəticədə onların arasında mübahisə yaranıb. Sonra general İH başçısının kabinetinə gedib orada onu kəllə ilə yerə sərib.
Gəncədə sosial təlatümlər baş verərsə, bu avtomatik bir milyona yaxın əhalinin məskunlaşdığı Gəncəbasar zonasını əhatə edə bilər. Ötən əsirin 80-ci illərinin sonunda başlanan xalq hərəkatının əsas hərəkatverici qüvvəsi olan Gəncə yenidən barıt çəlləyini xatırladır. Siyasi hakimiyyəti ən çox narahat edən də məhz bu amildir.
Yada salaq ki, E.Vəliyev 2011-ci ilin fevralında Gəncə şəhər İcra Hakimiyyətinin başçısı postunda Eldar Əzizovu əvəzləyib. Həmin andan başlayaraq o, köhnə başçıdan qalan hər şeyə - sahibkarlara, məmurlara və sakinlərə müharibə elan edib. Gəncədəki qanunsuzluqlarla bağlı mütəmadi olaraq KİV-lərdə məlumatlar dərc edilir - özəl obyektlərin “abadlıq” adı ilə sökülməsi, dindarların və siyasi fəalların təqib edilməsi, yüksək postlarda çalışan təcrübəli kadrların elliklə təcrübəsiz və rüşvətxor kadrlarla əvəzlənməsi və s. Görünür, siyasi hakimiyyət barıt çəlləyini xatırladan Gəncəni sosial təlatümlərdən qorumaq üçün hərəkətə keçməyə başlayıb. Ancaq illərdir üst-üstə yığılan problemlərin icra başçısının işdən çıxarılması ilə həllini tapacağını da düşünmək sadəlövhlük olardı. Bu, ən yaxşı halda indiki gərginliyin nisbətən azalmasına xidmət edə bilər.
Sadiq