İcra başçısı gəncə şəhərinə ayrılan vəsaiti şəxsi hesabina yatırıb

Redaksiyamıza Gəncənin icra başçısı Elmar Vəliyevlə bağlı ilginc faktlar daxil olub. Bilgili qaynağın iddia etdiklərinə görə, son günlər «vurulacağı» haqda məlumatları yayılan Gəncənin icra başçısının mövqeləri həddindən artıq zədələnib ki, hətta qardaşı Xanlar Vəliyev belə ona sahib çıxacaq durumda deyil.
Mötəbər mənbə bildirib ki, bir neçə gün əvvəl Rasim Musayevi Gəncədən uzaqlaşdıran və onunla işləmək istəmədiyini bildirən Elmar Vəliyevə qarşı hərəkətə keçən əks-cinah onun hər addımının təqib edilməsi barədə göstəriş verib: «Və Elmar Vəliyevdən qisas almaq istəyən qüvvələr çox gözləməli olmayıblar. İcra başçısı ilə bağlı aparılan araşdırmalar zamanı onun karyerasına birdəfəlik olaraq son qoya biləcək kompromat xarakterli faktlar aşkarlanıb».
Mənbəmizin söylədiyinə görə, söhbət külli miqdarda yeyinti faktından gedir: «Elmar Vəliyevin prezident tərəfindən ayrılan vəsaitin tamamını öz şəxsi hesabına köçürməsi faktı aşkarlanıb. Sonradan görülməli olan işlər isə başqa qaynaqlar - erli idarə və müəssisə rəhbərlərinin, sahibkarların hesabına həyata keçirilib. Burada təbii ki, qeyri-adi heç nə yoxdur. Yəni bütün rayonlarda icra başçıları büdcə pullarını mənimsəyir. Amma bu məsələdə diqqətçəkəni odur ki, Gəncənin icra başçısı ayrılan vəsaitin tamamını birbaşa olaraq xarici bankların birində şəxsən öz adına olan hesaba köçürtdürüb».
Məhz bu faktla əlaqədar Elmar Vəliyevin başının ciddi şəkildə ağrıyacağını bildirən mənbəmiz onu da əlavə etdi ki, artıq maliyyə nazirliyinin ekspertləri icra başçısının fəaliyyətini araşdırma yönündə təlimatlandırılıblar.
Ramil