İsa Qəmbər hakimiyyəti sərt tənqid etdi, mesajlarını verdi; Qazinin ölümünə görə Müsavatdakı bayram tədbiri ləğv edildi
Müsavat Partiyasının Məclisi öz işinə başlayıb. Məclis sədri Arzu Səmədbəyli deyib ki, gərgin və növbəti seçki saxtakarlığı ilə yadda qalan növbəti bir ilimizi yekunlaşdırırıq.

“İsmayıllıda xalq üsyanı ilə başlayan 2013-cü il yekunda Qarabağ qazisinin həlakı ilə başa çatan gərgin il oldu”, -deyən Məclis sədrinin giriş nitqindən sonra Müsavat Himni oxundu. Daha sonra faciəli şəkildə həlak olan Qarabağ qazisi Zaur Həsənov və bütün Qarabağ qazilərinin xatirəsi 1 dəqiqəlik sükutla yad edildi.

Məclisdə Müsavatın Gənclər təşkilatının sədri Əhliman Abbaslı və Qadınlar təşkilatının yeni sədri Ellada xanımın səlahiyyətlərinin və Məclis üzvü olaraq təsdiqlənməsi, Müsavat başqanı İsa Qəmbərin ictimai-siyasi vəziyyətlə bağlı məruzəsi, Müsavat Partiyası İcra Aparatının rəhbəri Arif Hacılının 2014-cü ilin fəaliyyət proqramı haqqında çıxışı nəzərdə tutulub.

2013-cü ilin yekunları və ictimai-siyasi vəziyyətlə bağlı çıxış edən Müsavat başqanı İsa Qəmbər dedi ki, mövcud hakimiyyət elə bir vəziyyət yaradıb ki, bayramlarda da insanlar bir-birini ürəkdən təbrik edə, sevinə bilmir. O, hakimiyyəti ən ağır epitetlərlə tənqid edərək, dedi: “ Biz planlaşdırmışdıq ki, bu gün saat 4-də Məclis üzvləri ilə yanaşı, ölkənin tanınmış siyasətçilərinin, ziyalıların iştirakı ilə Müsavatda bayram tədbiri keçirək. Ancaq Qarabağ qazisinin faciəli ölümü səbəbindən bayram tədbirini ləğv etməyi qərara aldıq və həmin tədbir olmayacaq”. Müsavat başqanı çıxışında Qarabağ qazisinin ölümü faktına xeyli yer ayırdı. İ.Qəmbər dedi ki, hakimiyyət, müəyyən qüvvələr Azərbaycan xalqına Qarabağı unutdurmağa çalır. Ancaq Qarabağ qazisinin faciəli ölümü Qarabağı növbəti dəfə bizə xatırladır. “2003-cü ildə İlham Əliyev hakimiyyətə gələndə demişdi ki, mən Qarabağ məsələsinin həllinə sıfırdan başlayacağam. 10 il sonra da danışıqların faydasız olduğunu etiraf etdi. Status-kovun saxlanması Ermənistanın və Azərbaycanın hakimiyyətinə sərf edir. Amma boş yerə cəhd göstərməsinlər, heç bir qüvvə ümummilli problemimizi bizə unutdura bilməz və Müsavat Partiyası olaraq buna imkan verməyəcəyik” -deyə, Müsavat başqanı bildirib.
İ.Qəmbər siyasi sürəclə bağlı keçirilən məhkəmə proseslərindən danışaraq hakimlərə xəbərdarlığını edib: “Hakimlər dərk etməlidirlər ki, cavab vermək məqamı gələndə bir neçə nəfərin cavabı olmayacaq: İlham Əliyevin, deputatların və hakimlərin, çünki onlar heç kimə tabe deyillər”.

“Vəziyyət həddindən artıq gərgindir, son həddədir, məmləkətimizdə hər gün hər bir hadisə baş verə bilər”-deyə, İ.Qəmbər bildirdi.