Milli Şuranın daha iki qurucu üzvü bu birliyi tərk edib.
EL Hərəkatının İdarə Heyətinin iki üzvü -Köçəri Nağıbəyli (həm də EL sədrinin müavinidir) və Rahim Bağırov (EL-in təşkilat şöbəsinin müdiridir ) bu qurumdan istefa verdiklərini bildiriblər. K. Nağıbəyli musavat.com-un müxbirinə deyib ki, bunun səbəbləri var: “Mən bugünkü sessiyanın gedişindən razı qalmadım və oranı yarımçıq tərk etdim. Düşündüm ki, bundan sonra zamanımı EL hərəkatının təşkilatlanmasına həsr etsəm, daha faydalı iş görmüş olaram. Rahim bəy də EL hərəkatının təşkilat şöbəsinin müdiridir. O da hesab edir ki, EL-in problemləri və təşkilatlanması işinə daha çox diqqət ayırmalıdır”.

Beləliklə, özünü toparlama və Müsavat Partiyasına qarşı bir növ revanş göstərmə sessiyası olan 16 yanvar toplantısı da Milli Şuranı istefalardan qoruya bilmədi. Hətta Rüstəm İbrahimbəyovun Milli Şuranın yenidən başında qalması da bu qurumdan qopmaların qarşısını ala bilmir.



* * *19:19

Milli Şuranın 16 yanvar sessiyasında qurumun Koordinasiya Şurası seçilib.

KŞ-yə bu şəxslər daxildir:

Milli Şuranın sədri Cəmil Həsənli

Şuranın fəxri sədri Rüstəm İbrahimbəyov

AXCP sədri Əli Kərimli

KXCP sədri Mirmahmud Mirəlioğlu

Professor Kamil Vəli

EL Hərəkatından Eldar Namazov

EL Hərəkatından Nurəddin Mustafayev

EL Hərəkatından Eldəniz Quliyev

Vahid Azərbaycan Milli Birlik Partiyasının sədri Hacıbaba Əzimov

Vətəndaş Hərəkatı Partiyası Ali Məclisinin sədri Rafiq Manaflı

Yazıçı-publisist Mehriban Vəzir

Keçmiş deputat Gültəkin Hacıbəyli

Siyasətçi İbrahim İbrahimli

Hüquqşünas Vidadi Mirkamal

Hüquqşünas Fuad Ağayev

Hüquqşünas Namizəd Səfərov

Hüquq müdafiəçisi Leyla Yunus

Hüquq müdafiəçisi Mirvari Qəhrəmanlı

İslamçı Hacı Rövşən Əhmədli

“Turan” informasiya agentliyinin rəhbəri Mehman Əliyev

NİDA Vətəndaş Hərəkatından bir üzv.



* * *

Gərgin və uzun müzakirələrdən sonra Milli Şuranın Koordinasiya Şurasına (KŞ) üzvlər seçildi. Səsvermə açıq keçirildi.

Bu zaman da mübahisələrsiz ötüşmək mümkün olmadı. H.Əzimov əsəbi şəkildə sual etdi: “Nəyə görə Mehriban Vəzir səsvermədən keçmədi?”

H.Əzimova qarşı çıxanlar isə M.Vəzirin KŞ-yə seçilmədiyini bildirdilər. H.Əzimov yenə əsəbiləşdi: “Bunu siz etdiniz də. Düzgün səsvermə keçirilmədi. Nə var, nə var ki, Mehriban xanım bir dəfə nəsə deyib. O, həmişə düz danışır, sözünü doğru deyən insandır. Elə etməyin ki, mən də gedim. Belə oyunlar olmaz. Bəsdirin”.

* * *

Hacıbaba Əzimovla dalaşan Mehdi Səfərov istefa verəcəyini bəyan edərək Milli Şuranı tərk etmək barədə düşündüyünü dedi. Söylədi ki, “mən artıq Milli Şuranın üzvü olmaq istəmirəm , bəyanat verib gedəcəyəm”.

* * *19:07

Milli Şuranın sessiyasında yenə gərginlik yaranıb, dava düşüb.

Milli Şuranın üzvü, “Azəri-Talış” Birliyinin sədri Mehdi Səfərov çıxış edərkən deyib ki, Hacıbaba Əzimov mətbuata açıqlamalarında etnik qruplarla bağlı çıxışlarında aranı qızışdırır. M.Səfərov onun Milli Şuradan çıxarılmasını istədi.



Hacıbaba Əzimov müdaxilə edərək ona boş-boş danışmamağı məsələhət gördü. Bu zaman tərəflər bir-birinə hücum edərkən Əli Kərimli araya girərək tərəfləri sakitləşdirdi. Əlbəyaxa davanın qarşısını AXCP sədri aldı.

Davanın səbəblərinə gəlincə isə Mehdi Səfərov Hacıbaba Əzimovun adının Koordinasiya Şurasında olmasına etiraz edib. O deyib ki, Hacıbaba Əzimovun adı oradan çıxarılmalıdır: “Milli-etnik münaqişə yaradan adam burada olmamalıdır. Hacıbaba Əzimov Milli Şurada olan şəxslərdən xarici kəşfiyyata işləyənlərin olduğunu deyib”.

VAMBP sədri Hacıbaba Əzimov isə bundan bərk qəzəblənib. Hacıbaba Əzimovu AXCP sədri Əli Kərimli sakitləşdirib.

* * *18:23

Rüstəm İbrahimbəyov yenidən Milli Şuranın fəxri sədri seçildi. R.İbrahimbəyovun fəxri sədrlikdən istefa verməsi haqda göndərdiyi mütaciət qəbul edilmədi.

İbrahimbəyovun fəxri sədr seçilməsi məsələsi sessiyada səsverməyə qoyuldu. 4 nəfər əleyhinə olsa da İbrahimbəyov Milli Şuranın fəxri sədri seçildi.

“Azadlıq” qəzetinin redaktoru Rahim Hacıyev çıxışında Müsavat Partiyasının Milli Şuranı tərk etməsindən sonra Müsavatı dəstəkləyənləri qınayaraq buna ehtiyac olmadığını söylədi.

Zalda əyləşən Mehriban Vəzir və Vidadi Mirkamal R.Hacıyevin bu sözləri ilə razı olmadıqlarını, hər kəsin öz fikirlərinin olduğunu bildirdilər.

Sessiyada çıxış edən Əli Kərimli bildirdi ki, biz birləşməliyik və bir araya gəlməliyik: “Bu, çox təəssüf doğuran haldır ki, biz mübarizəyə başladığımız dostlarımızla yolumuzu davam etdirə bilmirik. Bizimlə birgə yola çıxanlar hansısa səbəbdən bizi tərk ediblər. Bu, səbəb deyil ki, biz mübarizəmizdən geri çəkilək”.

Əli Kərimli Milli Şuranın sessiyalarında “biz iş görə bilmirik” fikirlərinin səsləndirilməsindən narazılığını diqqətə çatdırdı. O, qeyd etdi ki, bunun üçün Milli Şuranın sədrinə kifayət qədər şərait yaradılmır. AXCP sədri Milli Şuradan heç bir tələblərinin olmadığını, onların maraqlarının millətin maraqları ilə üst-üstə düşdüyünü bildirdi. Əli Kərimli Milli Şuranın vahid namizəd seçərək mübarizə apardığını və bu mübarizəni davam etdirmək lazım olduğunu diqqətə çatdıraraq bu mübarizədən ayrılanların geriyə addım atdıqlarını söylədi.

* * * 18:23

“Azadlıq” qəzetinin redaktoru Rahim Hacıyev çıxışında Müsavat Partiyasının Milli Şuranı tərk etməsindən sonra Müsavatı dəstəkləyənləri qınayaraq buna ehtiyac olmadığını söylədi.

Zalda əyləşən Mehriban Vəzir və Vidadi Mirkamal R.Hacıyevin bu sözləri ilə razı olmadıqlarını, hər kəsin öz fikirlərinin olduğunu bildirdilər.

Sessiyada çıxış edən Əli Kərimli bildirdi ki, biz birləşməliyik və bir araya gəlməliyik: “Bu, çox təəssüf doğuran haldır ki, biz mübarizəyə başladığımız dostlarımızla yolumuzu davam etdirə bilmirik. Bizimlə birgə yola çıxanlar hansısa səbəbdən bizi tərk ediblər. Bu, səbəb deyil ki, biz mübarizəmizdən geri çəkilək”.

Əli Kərimli Milli Şuranın sessiyalarında “biz iş görə bilmirik” fikirlərinin səsləndirilməsindən narazılığını diqqətə çatdırdı. O, qeyd etdi ki, bunun üçün Milli Şuranın sədrinə kifayət qədər şərait yaradılmır. AXCP sədri Milli Şuradan heç bir tələblərinin olmadığını, onların maraqlarının millətin maraqları ilə üst-üstə düşdüyünü bildirdi. Əli Kərimli Milli Şuranın vahid namizəd seçərək mübarizə apardığını və bu mübarizəni davam etdirmək lazım olduğunu diqqətə çatdıraraq bu mübarizədən ayrılanların geriyə addım atdıqlarını söylədi.

* * *17:36

Sessiyada çıxış edən AXCP sədrinin müavini Fuad Qəhərəmanlı bildirdi ki, Milli Şuradan gedənlər müxalifətçi kimi getmədilər: “Onlar sadəcə olaraq qurumu zəiflətmək üçün getdilər.

Amma bu da alınmadı. Milli Şuranın bugünkü sessiyası ötən sessiyalardan gaha fəal keçirilir”.

F.Qəhrəmanlı Milli Şuranın komissiyalarının fəaliyyətinin təmin olunmasının vacibliyini vurğulayaraq fəaliyyət planının hazırlanmasının vacib olduğunu qeyd etdi.

Milli Şuranın üzvü Vidadi Mirkamal daha sərt danışdı. O, ziyalıların qurumdan iyrəndiyini bildirdi: “Müxalifət son bir ay ərzində çox ciddi zərbələr aldı. Hakimiyyət qalıb kənarda, müxalifət bir-birini didir. Artıq bizdən iyrənirlər. Ziyalılarla söhbətimdə bunların şahidi oluram. Bu mübahisələr, təhqirlər dayandırılmalıdır. Fərqi yoxdur ki, mübahisəni kim yaradır. Bunlara son qoymalıyıq”.

* * * 16:46

C.Həsənli isə məsələyə müdaxilə edərək söylədi ki, biz sessiyalararası müddətdə Milli Şuranı tərk edən şəxslərin müraciətlərinə baxırıq və baxmalıyıq: “Ötən sessiyadan sonra Rüstəm İbrahimbəyovun Milli Şuraya müraciəti olub. Biz bunu nəzərə almalıyıq”.

C.Həsənli R.İbrahimbəyovun Milli Şuradan qurumun qərarı ilə yox, Müsavat Partiyasının narazılığından sonra getdiyini bildirdi. Dedi ki, İbrahimbəyovun liderlik məsələsinin yenidən gündəmə gətirilməsinə ehtiyac yoxdur: “Rüstəm İbrahimbəyovla bizim dostluğumuz var. Mən bunu heç bir zaman gizlətməmişəm. Amma indi açıq şəkildə bildirmək istəyirəm ki, İbrahimbəyovun liderlik məsələsinin gündəmə gətirilməsi doğru olmaz. Onsuz da hər kəs öz sahəsində liderdir”.

Eldəniz Quliyev isə buna etiraz etdi: “Məni düzgün başa düşmədiniz. Mən lider kimi qəbul etdiyimiz Rüstəm İbrahimbəyovun fəxri sədr seçilməsi məsələsinin yenidən gündəliyə salınmasını istədim”.

* * * 16:40

Sessiyada çıxış edən EL Hərəkatının üzvü Eldəniz Quliyev Rüstəm İbrahimbəyovun Milli Şura üçün etdiklərini nəzərə çatdıraraq onun fəxri sədr seçilməsi məsələsinin gündəliyə salınmasını və bu qərara yenidən baxılmasını istədi.

E.Quliyev son zamanlar Milli Şura daxilində, xüsusilə də AXCP və Müsavat arasında olan söz davasının dayandırılması üçün hər iki tərəfə müraciət edilməsini və bu qarşıdurmanın dayandırılması təklifini irəli sürdü.

Lakin qurumun üzvü Mehriban Vəzir bu təklifə qarşı çıxaraq bu məsələnin yenidən müzakirəyə çıxarılmasını istəmədi: “Biz qaldığımız yerdən davam etməliyik. Bu məsələni qaldırıb yenidən qarışıqlıq yaratmamalıyıq”.

***

Sessiyada çıxış edən Cəmil Həsənli deyib ki, Müsavat Partiyası və bir neçə fərdi üzv Milli Şura sıralarını tərk etdikdən sonra qurumun 91 üzvü qalıb.

O bildirdi ki, 91 nəfərdən 6-sı hazırda həbsdədir, 8 nəfər isə xaricdədir. C.Həsənli bugünkü sessiyada 58 nəfərin iştirak etdiyini və bunun da yetərsay üçün kifayət etdiyini söyləyərək bunun xeyli dərəcədə aktivlik olduğunu qeyd etdi. C.Həsənli üç əsas məsələ - ictimai-siyasi vəziyyətin dəyərləndirilməsi, 2014-cü il üçün fəaliyyət planının müzakirə olunması və Milli Şuranın strukturlaşdırılmasının sessiyanın gündəliyinə salındığını söylədi.

* * * 16:14

Bu dəqiqələrdə Milli Şuranın növbəti sessiyası başlayıb. Sessiya AXC-nin qərargahında keçirilir.

Virtualaz.org saytının sessiyanın gedişini izləyən müxbiri xəbər verir ki, sessiyada Milli Şuranın sədri Cəmil Həsənli, KXCP sədri Mirmahmud Mirəlioğlu, ACP sədri Sülhəddin Əkbər, AXCP sədri Əli Kərimli, Gültəkin Hacıbəyli və qurumun digər üzvləri iştirak edir.

EL Hərəkatının sədri Eldar Namazov mərhum şahmatçı Vüqar Həşimovun cümə axşamı mərasimində iştirak etdiyindən sessiyaya qatılmayıb. Sessiyanın gedişatı ilə bağlı əlavə məlumat veriləcək.