“Ayna” və “Zerkalo” qəzetinin redaksiyasında yanvarın 25-də qəzet rəhbərləri və yayım firmalarının nümayəndələri Bakı şəhər Ticarət Departamentinin səyyar qəzet və jurnal satışına qadağa qoyması və yaranmış vəziyyətdən çıxış yolunu müzakirə etdilər.
Toplantıda Bakı şəhər Ticarət Departamentinin qərarı ilə qəzetlərin satışına ciddi zərər dəydiyi qeyd olundu.

“Vəziyyət həddindən artıq kritikdir”

“Yayım” Assosiasiyasının sədri Yaşar Zeynalov bildirdi ki, toplantıda qəzet redaktorları və əl yayım firmalarının təmsilçilərinin iştirakı ilə yaranmış problemdən çıxış yolları birgə müzakirə olunacaq: “Kommersiya direktorlarının və yayımçıları kimi redaktorların da bu toplantıda iştirakı olduqca vacibdir. Ötən toplantıda qərar vermişdik ki, müraciət qəbul edib, tədbir keçirəcəyik. İndi şans yaranıb və hər kəsən öz təkliflərini səsləndirə bilər”.
“Gündəm Xəbər” qəzetinin direktoru Şirin Cəfərli yaradılan əngəllərdən
çıxış yollarından birinin də piketlərin keçirilməsi olduğunu söylədi. Veriləcək qərarı gecikdirmək olmadığını deyən Şirin Cəfərli oxuculara da müraciət etməyi təkilf etdi: “Oxucularımıza da müraciət etməliyik. Vəziyyət həddindən artıq kritikdir. Çıxış yolumuz yoxdur. Qəzeti dayandırmaq məcburiyyətində qalmışıq. Ona görə də, bu gün burda səsləndiriləcək və bizim xeyrimizə olan bütün proseslərdə iştirak edəcəyik”.
Yayımla məşğul olan sahibkar Nadir Əmirov satışa yaradılan əngəllərin acısını yaşadıqlarını söylədi.

“Əli Həsənovun bir zəngi kifayət edir ki, məsələ öz yoluna qoyulsun”

“Qaya” Mətbuat Yayımı Firmasının direktoru Xanhüseyn Əliyev əl yayımı olmayacaqsa qəzet çap etməyə ehtiyac olmayacağını dedi: “Yayım olmayacaqsa qəzet olmayacaq. Qəzet olmayacaqsa Mətbuat Şurası olmayacaq. Mətbuat Şurası da olamayacaqsa Mətbuat dəstək fondu da olmayacaq. Birinci “Qaya”nı vurdular. Sonra “Qasid”i məhv etdilər. Metrostansiyalarda qəzet satışına qadağa qoyuldu. Buna görə də “Metroservis” fəaliyyətini dayandırmalı oldu. İndi də əl yayımına keçiblər. Deyirlər yeni köşklərdə satılır. Ancaq bu yalandır. Vəziyyəti müzakirə edib, addım atmalıyıq. Hacıbala Abutalıbovluq heç nə yoxdur. Əflatun Amaşovla görüşək, o da Əli Həsənovla danışsın. Əli Həsənovun bir zəngi kifayət edir ki, məsələ öz yoluna qoyulsun. Məndə olan məlumata görə yeni köşklər “Qasid”ə veriləcək. “Qasid”də də Əli Həsənovun adamı oturacaq. O da oranı özəlləşdirəcək. O da özəlləşəndən sonra yayım bir əldə olacaq. O deməyəcək ki, satmıram. Götürəcək qəzetləri aşağıda saxlayacaq. Satış üçün verilən qəzetin 90 faizi geri qayıdandan sonra siz nə edəcəksiniz? Təklif edirəm ki, “Kaspi”ninq arşısında aksiya keçirək. Prezident Administrasiyasına getməkdənsə “Kaspi”nin önünə toplaşaq. Prezident Administrasiyasında o bir məmur, “Kaspi”də isə sahibkardır”.
Xanhüseyn Əliyev yayım firmalarının təmsilçirinə müraciət edərək bildirid ki, qəzet firmaları lisenziyadan azaddırlar: “Nazirlər kabinetinin sərəncamı var. Siz lisenziya, kassa aparatından azadsınız. Təkcə icarədarla yer haqqında müqavilə bağlamalısınız. Fiziki şəxs kimi qeydiyyatdan keçməlisiniz. Əgər başqa tələblər irəli sürülürsə bu qanunsuzdur”

“Toplu şəkildə məhkəməyə müraciət edək”

“Novoe Vremya” qəzetinin kommersiya direktoru Məzahir Məmmədlinin sözlərinə görə, tədbirin ümumi qeydləri olmalı, sistem qurulmalıdır. O bildirdi ki, səyyar satışla bağlı yekun qərar verilməlidir.
“Yeni Müsavat” qəzetinin baş redatoru Rauf Arifoğlu isə toplantında təkliflərini səsləndirdi: “Bakı Şəhər İcra Hakimiyəti qarşısında piket keçirək. İcazə üçün müraciət edək, əgər icazə verilməsə yenə keçirək.
Toplu şəkildə məhkəməyə müraciət edək. Artıq “Yeni Müsavat” olaraq biz məhkəməyə müraciət etmişik. Ticarət Departamenti qərar verməyib, veribsə belə əllərində hüquqi sənədləri yoxdur. Bunun özü bəs eləyir ki, biz məhkəməyə üz tutaq. Kritik məqamdır. Prezidentdən tutmuş Mətbuat Şurasının sədri Əflatun Amaşova kimi müraciət etməliyik”.
Rauf Arifoğlu eyni zamanda qəzet redaktorlarına təklif verdi ki, qəzetlərin qiyməti qaldırılsın: “Yayım firmaları qəzet satmağa maraqlı olmalıdır. Yəqin ki, yadınızdadır, ən pis vaxtlarda qəzeti satmağa, oxumağa icazə vermirdilər. Ancaq partizan kimi qəzet satdırıdınız. Çünki, satıcıya yaxşı pul qalırdı. Ona görə təklif edirəm ki, qiyməti daha 10 qəpik artıraq. Satışdan heç nə əldə edə bilmirik. Gələn aydan qəzeti bağlamaq qərarını vermişəm. Bu zarafat deyil, ciddi bir siqnaldır”.

“Biz geri çəkilməməliyik, piketlər davamlı olmalıdır”

“Azadlıq” qəzetinin baş redaktorunun birinci müavini Rahim Hacıyev bildirdi ki, piket məsələsinə xüsusi diqqət verilməlidir: “Biz tez bir zamanda və böyük tərkiblə piket keçirməliyik. Problem həll olunana kimi biz geri çəkilməməliyik. Piketlər davamlı olmalıdır. Bundan başqa müxətlif etiraz formalarıyla diqqəti bu məsələyə yönəltməliyik”.
“Zerkalo” qəzetinin baş redaktoru Elçin Şıxlı etiraz əlaməti olaraq redaksiyaların tətil etməsi təklifini irəli sürdü: “Rəhbəri olduğum qəzet olduqca acınacaqlı durumdadır. 24 ildir bu qəzetləri buraxıram. Biz Elçibəy zamanında ümummilli tətil etmişdik. Bir gün müəyyən edək və bu tətili gerçəkləşdirək. Bu çox böyük hay-küyə səbəb olmaqla yanaşı diqqəti əsas məsələyə yönəldəcək”.
Rahim Hacıyev Elçin Şıxlının tətil məsələsinə münasibət bildirirək qeyd etdi ki, bu təklifi də dəyərləndirmək lazımdır: “İctimaiyyət də görsün ki, hansı problemlərlə üz-üzə qalmışıq”.
“Yeni Müsavat” qəzetinin yayım direktoru Ələsgər Süleymanov qeyd etdi ki, yayım biznesi cəlbedici biznesə çevirilməlidir: “Nə qədər ki, yayım biznesini cəlbedici biznesə çevirməmişik, bura heç kimi cəlb etmək olmayacaq, olanlar da çıxıb gedəcək. Bu biznesi elə vəziyyətə gətirməliyik ki, bura axın olsun. Təklif edirəm ki, qiyməti elə həddə qaldıraq ki, yayımçıya da qəzet satana da redaksiyaya da normal pul qalsın. Bir maşının parkovkası saatına bir manatdır. Bu məbləği hamı da verir və heç kim də etiraz etmir. Biz də qəzetləri bir manat etsək, bu pulun 20 faizi yayım firmasına, 20 faizi satıcıya, 60 faizi də redaksiyaya qalsa bura çox adam gələcək. Satıcı çalışacaq ki, çox qəzet götürüb çox satsın. Bu barədə fikirləşin. Gec-tez biz bu məsələyə qayıtmalı olacağıq”.

***

Tədbirin yekununda gələn həftənin birinci günü – yanvarın 27-də Bakının mərkəzindəki Sabir bağında piket keçirilməsi ilə bağlı meriyaya müraciət edilməsi qərara alındı. Eyni zamanda həftənin dördünücü günü – yanvarın 30-da Beynəlxalq Mətbuat Mərkəzində qəzet rəhbərlərinin, əl yayımının işçilərinin, siyasətçilərin, deputatların, eləcə də oxucuların iştirakı ilə geniş toplantı keçirilməsi barədə razılıq əldə olundu.
Həmçinin 7 media orqanı bir günlük tətil keçirilməsi xəbərdarməsi ilə bağlı qərar qəbul etdi.