Müğənninin konsert üçün alacağı məbləğ isə sir kimi saxlanılır

Şou-biznes Türkiyənin məşhur mega-starı Tarkanın Azərbaycanda 1 milyon manat qonarar alaraq konsert verəcəyi barədə xəbərlər sürətlə yayılmaqdadır. Mediada yer alan informasiyalarda bildirilir ki, Tarkan bu məbləğin müqabilində Qubada fəaliyyət göstərən otellərin birində yeni il gecəsində oxuyacaq.

Düzdür dünya şöhrətli müğənnilərin ölkəmizdə konsert vermə ənənəsi son illər müşahidə olunan haldır. Lakin bu məhşurların gətirilməsi üçün çəkilən xərclərə sərf olunan vəsaitlərin haradan qaynaqlanması da kifayət qədər maraqlı və sual doğuran məqamlardandır.

Uzaqa getməyək, 150 min əhalisi olan Quba rayonuna dövlətdən ayrılan bir illik büdcə təxminən 26 milyon manat təşkil edir. 1 milyon manat isə orta aylıq əmək haqqısı 450 manat olan Azərbaycan vətəndaşı üçün çox yüksək məbləğ, hətta fantastik görünəcək qədər böyük rəqəmdir.

1 milyon manatı bir gecədə qazanacaq müğənniyə bu pulu xərcləyəcək varlı kimdir bəs? Məsələ ilə bağlı ANS- in Şimal bürosu araşdırma apardı və Tarkanın konsert verəcək məkanı axtarıb tapdı. Otelin meneceri məbləğin şişirdildiyini deyir.

“Onu kim söylədi bilmirəm. Amma bizim belə bir büdcəmiz yoxdur. Ona deyilən qədər pul verməyəcəyik. Bizim onunla xüsusi bir anlaşmamız var. Amma rəqəmlər yoxdur” – deyə Otelin baş meneceri Hamit Topaloqlu bildirir.

Razılaşmanın detallarında nələrin olduğu isə hələlik açıqlanmır. Bir sözlə, məlum olan odur ki, Tarkan yeni il gecəsi-dekabrın 31-də Azərbaycanda, özü də Qubada olacaq. Konsertdə təxminən 1500 tamaşaçı olacaq. Biletlərin qiyməti isə 350 və 1000 manat arasında dəyişir.