Sumqayıtda 66 sahibkardan 200 min rüşvət tələb olunur

gundemxeber.az Eldar Əzizov Sumqayıta gəldiyi ilk günlərdə yığıncaqlarda Allahdan qorxduğunu deyirdi. Allaha inanan başçı ötən müddətdə şeytana güvənirmiş kimi sumqayıtlıları talamaqda özünün tayı-bərabəri olmadığını sübut edib. Təbii ki, Əzizovun abadlıq sahəsində gördüyü işləri danmaq olmaz, amma bu işlər hansı tərzdə görülür, kimlər bu prosesə cəlb olunub, necə pullar yığılır, məsələnin əsas tərəfi budur.
Sumqayıtda müasir formada yeni layihə adı altında obyekt sahiblərindən külli miqdarda pul yığılması prosesi E.Əzizovun ayağı bu şəhərə dəyəndən az sonra başlayıb və artıq şəhəri başdan-başa bürüyüb. İndi hətta şəhərin ən ucqar səmtində mağazası, yeməkxanası, hətta balaca bir köşkü olan düşünür ki, Əzizov bəlası onun başı üstünü nə zaman kəsdirəcək. İcra başçısının və onun komandasının soyğunçuluğu bu gün “Şərq bazarı”nda tüğyan edir.
Pul yığan və ev yıxanlardan ibarət komanda
İcra başçısının niyyətini gerçəkləşdirən isə həmişəki kimi Arxitektura,Memarlıq və Şəhərsalma İdarəsidir. Eldar Əzizov məlum olduğu kimi, Sumqayıta gələndən sonra burada tamamilə özünün pul yığanlarından, ev yıxanlarından ibarət komandasını formalaşdırıb. Onların əksəriyyəti Gəncədən gətirilib. Amma aralarında biri var ki, daha amansızdır. Bu Eldar Əzizovla vaxtilə Nizami rayonunda bir yerdə işləyən Kamil Məmmədovdur. Məkkədə müqəddəs torpaqları ziyarət edib hacı titulunu qazanan K.Məmmədov Nizami rayonunda torpaq alveri üstündə həbs olunub. Bu təcrübəli torpaq alverçisi o vaxt tutulanda Əzizovu satmadığı üçün özünə güvən qazandırıb. Bunun sayəsində E.Əzizov onun həbsxanadan çıxmasına yardımçı olub və Gəncədən Sumqayıta gələndən sonra hacı Kamili bu şəhərin Arxitektura, Memarlıq və Şəhərsalma İdarəsinin müdir müavini vəzifəsinə təyin edib.

1 kvadratmetr torpaq sahəsi üçün 1200 manat haqq

Hacı Kamilin yerinin səhv düşüb-düşmədiyini deyə bilmərik, amma fakt budur ki, o, Sumqayıtı Bakı ilə səhv salıb. Burada hər qarış torpaq az qala paytaxtdakı məzənnələrə uyğun satılır. Məsələn, şəhərin mərkəzi hissəsində 1 kvadratmetr torpaq sahəsi üçün Əzizovun adamları 1200 manat haqq qoyublar. Şəhərin qıraq hissəsində, məsələn, 16-17-ci mikrorayonlarda bu 600 manat dəyərindədir. Sumqayıtda imkanlı adamların sayı çox deyil. Hətta belələri varsa belə onlar artıq özlərinə kifayət edəcək qədər mülkiyyətə sahibdirlər. Digər tərəfdən, indi ortalığa çıxıb imkanlı olduqları səbəbindən özlərini hədəf vermək niyyətində deyillər.

İsgəndərovlar klanı Əzizovun qarşısında geri çəkilib

Bu şəhərin ən imkanlı klanı İsgəndərovlar sayılır. Klanın başçısı Zaman İsgəndərovla bundan əvvəlki bütün icra başçıları yola gediblər, əlbəttə, əvəzində öz haqlarını da alıblar. Amma Əzizov ilk baxışda heç bir klanındiqtəsini qəbul edəcək başçı olmadığını sübut etmədiyini sübut edib. İsgəndərovlar bir müddət onun qarşısında duruş gətirə biləcək gücdə olduqlarınınümayiş etdirdilər. Məlumatlarda bildirilirdi ki, Əzizov İsgəndərovlara məxsus “Cavid” Ticarət Mərkəzinin fasadının şüşə ilə əvəzlənməsi üçün 100 min manat istəsə də, rədd cavabı alıb. Əzizov ticarət mərkəzini sökdürəcəyi ilə bağlı hədə-qorxu gəlib. Əslində o başçı kimi bir neçə restoranı, ticarət mərkəzini, hətta məcburi köçkünlərin çörəkpulu qazancı yeri olan kiçik köşkləriu yerlə-yeksan etdirib. Nəticədə neçə adam infarkt olub, çörək qazancı yeri əliondən çıxıb. Bütün bunlar ona görə edilib ki, həmin şəxslər başçının tələb etdiyi pulu verməyiblər. Qeyd edək ki, İsgəndərovlar artıq Əzizovun qarşısından geri çəkiliblər. Xeyli vaxtdır “Cavid” Ticarət Mərkəzinin divarları başçının tələblərinə uyğöun olaraq alkopon şüşə ilə örtülür.

Özəlləşdirmə sənədi olan obyektlərdə yerlə yeksan edilir

E.Əzizov və onun komandası özlərini əsl alverçi kimi aparırlar. Bu alverdə onun əsas qoruyucusu polisdir. Harada obyekt sahibinə hədə-qorxu gəlməklə pul qopartmaq lazımdırsa, ora bəzən yüzlərlə polis əməkdaşı cəlb olunur. Məhz polisin hesabına hətta özəlləşdirmə sənədləri olan obyektləri yerlə-yeksan etdirib. Etiraz edənləri isə polisin vasitəsilə qorxudub, bəzən hətta inzibati məsuliyyətə cəlb edilmələrinə nail olub. İcra hakimiyyəti binasının qarşısına da 3-5 nəfər şikayətçi yığışan kimi post-patrul xidmətinin onlarla əməkdaşı onların başının üstünü kəsdirir, tələblərinin haqlı olub-olmamasına baxmayaraq onların etirazlarını kiməsə çatdırılmasına imkan verilmir.

3 min manat rüşvət verməyən mağazaların qapıları möhürlənib

Qeyd etdik ki, E.Əzizovun sahibkarlara qan uddurmaq kampaniyası “Şərq bazarı”ndakı obyektlərə çatıb. Həmin bazarda mağazası olanlardan birinin verdiyi məlumata görə, üç həftə əvvəl onlaraın yanına gələn elçilər buradakı 66 obyektin hər birinin sahibindən 5 min manat verməli olduğunu bildirib. Mağaza sahibləri razılaşmayıblar. Sonra əraziyə Sumqayıt şəhər icra hakimiyyəti başçısının müavini Akif Quliyev, Sanitar Epidomioloji Stansiyanın rəisi Rafiq Həsənov, Arxitektura, Memarlıq və Şəhərsalma İdarəsinin müdir müavini Kamil Məmmədov, şəhər Ticarət İdarəsinin müdiri Firudin Həsənov 20-yə yaxın polis əməkdaşı ilə gəliblər. Başçının müavini gələnlərin arasında olsa da, mağaza sahiblərindən pul yığma kampaniyasına yenə hacı Kamil başçılıq edir. Akif Quliyevə gəldikdə, o sadəcə rüşvət istəyinə haqq qazandırmaq üçün bazara gəlibmiş. Mənbənin dediyinə görə, başçının müavini pul istənilən mağaza sahiblərini bir yerə toplayaraq soruşub: “Sizdən nə qədər pul istəyirlər?” “5 min manat” eşidəndə heç nə olmamış kimi, daha doğrusu, rüşvətə haqq qazandırırmış kimi, “yaxşı məbləğdir, ödəyin problem birdəfəlik həll olunsun”, - deyib. Bu “ağıllı” məsləhətə baxmayaraq, mağaza sahibləri 5 min ödəməyəcəklərinə israr ediblər. Aradan bir neçə gün keçib, rüşvətyığma komandasından gələn elçilər bu dəfə hərədən 3 min manat tələb ediblər. Ancaq yenə mağaza sahibləri məbləğin çox olduğunu iddia ediblər. İki həftə öncə isə polislərin müşayiəti ilə əraziyə gələn K.Məmmədov və onun adamları 66 mağazanın hamısının qapısını möhürləyərək fəaliyyətlərini qadağan ediblər. Diqqət edin, bu prosesə başçılıq edən müqəddəs torpaqlara gedən bir hacıdır. Hacı titulu daşımaq hara, cammatın cibinə girmək hara? Görəsən, beləsinə hacı demək olarmı? Görəsən, min bir əziyyətlə pul qazanan insandan zorla pul tələb edən bir kəsə hacı demək olarmı? Görəsən, torpaq satmaq üstündə tutulan belə adam Həccə hansı üzlə gedib?
Yeri gəlişkən, hacı titullu K.Məmmədov öz müdirinə qarşı da pislik etməkdən çəkinmir. Etibarlı mənbənin bildirdiyinə görə, K.Məmmədov başçıya yaxınlığından sui-istifadə edərək idarənin müdiri Həsən Həsənovu tamamilə küncə sıxışdırıb. O, sadəcə idarəyə gəlib-gedir və heç bir prosesə müdaxilə edə bilmir. Hacı titullu K.Məmmədov isə özünə yeni kabinet ayırıb, deyilənə görə, otağına nəzarət qurğuları quraşdırılıb, hər kəsə nəzarət olunur. Bundan başqa, heç kimə binaya, xüsusilə K.Məmmədovun kabinetinə mobil telefonla girməyə icazə verilmir. Səbəbinə gəldikdə, bu fəaliyyəti dayandırılan Azərbaycan Beynəlxalq Universitetinin keçmiş rektoru Elşad Abdullayevinkeçmiş deputat Gülər Əhmədova ilə deputat seçilməsi üçün apardığı bazarlıq barədə çəkilən videonu yayımlaması ilə izah olunur. Hacı Kamil də çox adama pislik etdiyindən kiminsə onunla söhbəti yazdırmasından ehtiyatlanır.
Artıq iki həftədir mağaza sahibləri çarəsiz vəziyyətdə çıxış yoli arayırlar. Bəs bu pul nə üçün tələb olunur? Təbii ki, bütün şəhər boyu davam edən bütün ticarət və qeyri-ticarət obyektlərinin alkopon bayır hissəsinin alkopon şüşələrlə örtülməsi burada da tələb olunur. Qeyd edək ki, alınan məbləğlər sonuncu deyil. Belə ki, əgər kimsədən obyektinə görə, 3-5, hətta 10-15 min manat alınırsa, sonra orada görüləcək işlərin də haqıını həmin obyekt sahibi ödəyir. Bu isə ikiqat, bəzən üçqat soyğunçuluq deməkdir. Ən qəribəsi budur ki, sahibkarlardan alınan həmin pullar heç zaman qanuni yolla sənədləşdirilmir. Bu cinayətin üstünün açılmaması üçün E.Əzizov və onun dəstəsi xüsusi üsullardan istifadə edirlər. Təbii ki, özlərinə sərf edən bu üsul belə qanunsuzdur.

Rüşvət verməyənlərsən demə “sanitar epidomoloji tələblərə əməl etmir”

Xatırladaq ki, “Şərq bazarı”ndakı sahibkarlardan pul tələbininm arxasında daha bir hiyləgər niyyət dayanır. Pul tələb edənlərin fikrincə, ərazidə sanitar epidomoloji tələblərə də əməl olunmur. Onların ilkin tələbinə görə, sahəsi 9 kvadratmetrdən çox olan obyektin ərazisində ayaqyolu, soyunub-geyinmə otağı olmalıdır. Amma ən qəribəsi budur ki, tələb olunan 3 min manat verilərsə, bu tələbdən vaz keçiləcək.
Mağaza sahibləri çıxılmaz durumda, elə pul tələb edənlər də. Çünki tələb olunan məbləği hacı Kamilə çatdılrılmasındavasitəçilik edəcək Zaur adlı birisi demək olar hər gün əraziyə gəlib mağaza sahiblərinin “insafa” gələcəyini gözləyir. Bu həmin Zaurdur ki, onu da E.Əzizov Gəncədən Sumqayıta gətirib.
Antisanitariyay gəldikdə, həmin mağazaların bir-iki addımlığında meyvə-tərəvəz satılan piştaxtalar qurulub və sözün həqiqi mənasında hər addımlıq zir-zibillikdir. Hətta bir az yağış yağanda ərazidən palçıq və həmin piştaxtalardan ətrafa atılan tullantı əlindən hərəkət etrmək mümkün olmur.
Bundan başqa “Şərq bazarı”nın direktoru Rəşid Babayevin oturduğu bina bayırdan baxanda xarabalığı xatırladır. Görünür, Babayev işləridə özünə babat kabinet düzəltdirib və ona hər şeydən öncə mağaza sahiblərindən gündəlik haqq daha çox maraqlandırır... və lazımi ünvanlara tələb olunan haqqı vaxtlı-vaxtında çatdlırır. Özü zibilə düşməmək üçün. Amma bu gün sözün həqiqi mənasında zibilə düşən 66 sahibkar çıxılmaz vəziyyətdədir. Əslində E.Əzizovun gəlişi ilə bütün Sumqayıt zibilə düşüb...
HÜSEYN ABBASOĞLU