“Şərq bazarı”nın sahibi icra başçısının istəyi
ilə həyata keçirilən layihənin icrasını dayandırıb

Eldar Əzizov icra hakimiyyəti başçısı kimi Gəncədən Sumqayıta gəldiyi ilk aylarda yerli sakinlərin də iştirak etdiyi toplantılarda müxtəlif sahələr üzrə problemlərin ciddi müzakirə olunduğu görüntüsü yaranırdı. Başçı hətta camaatın yanında ayrı-ayrı məmurların ünvanına sərt tənqidlər səsləndirməkdən çəkinmirdi.
Əslində Sumqayıt kimi bir şəhərdə işləməkdən ötrü bu taktika səmərəlidir. Çünki burada uzun illər formalaşan və müxtəlif proseslərə təsir göstərmək gücünə malik qüvvələrin öhdəsindən onların üzərinə yerimədən gəlmək mümkün deyil. Xatırlayırsınızsa, mərhum dövlət başçısı Heydər Əliyev 2003-cü ilin mart ayında Sumqayıtda keçirilən müşavirədə həmin klanların başında duranların adlarını çəkərək yeni başçı Vaqif Əliyevin, necə deyərlər, əl-ayağına dolaşmamağı tapşırmışdı. O zamandan bəri bu qüvvələrin bəziləri yenə belə demək mümkünsə, qınlarına çəkildilər. Sumqayıtda ən yetərli gücə malik hesab olunan “Azərkimya” Dövlət Şirkətinin keçmiş rəhbəri Fikrət Sadıqov isə 2005-ci il parlament seçkiləri ərəfəsi dövlət çevrilişinə cəhd ittihamı ilə həbs olunub sonradan azadlığa buraxılmaqla zərərsizləşdirildi. Bununla belə, Mərkəzi Univermağın özəlləşdirilməsi prosesində saysız-hesabsız qanunsuzluqlara yol verən Zaman İsgəndərovun dəstəsi ayaqda qalmışdı. Ancaq Eldar Əzizovun gəlişi ilə onun da təsir dairəsi kifayət qədər daralıb. Bunun başlıca səbəbi yeni başçının ətrafına demək olar ki, tamamilə yeni komanda yığması ilə bağlıdır. Yeri gəlmişkən, Eldar Əzizov Sumqayıta gələnə qədər şəhər bələdiyyəsinin sədri Əbülfəz Babayev də atını istədiyi kimi çapırdı. Yeni başçı artıq onu da tamamilə küncə sıxışdırıb. Nəticədə bələdiyyə tamamilə səlahiyyətsiz bir quruma çevrilib. Təbii ki, bütün bu oyunların başında Eldar Əzizovun daha çox, həm də kimsənin maneçilik törətmədən pul qazanmaq niyyətləri dayanır. Məlum olduğu kimi, Gəncədən gələndən bəri Sumqayıtda istədiyi hər bir ssenarini uğurla reallaşdıra bilib. Bir sözlə, indi Eldar Əzizovun qarşısında heç bir maneə olmadığını düşünmək olar. Amma...
Bu günlər məlum olub ki, icra başçısının işləri heç də rəvan getmir. Bunun səbəbkarı isə “Şərq bazarı” kimi tanınan ticarət mərkəzinin sahiblərindən biri Rəşid Babayevdir.

Ötən yazılarımızdan birində xəbər verdiyimiz kimi ötən ilin noyabr ayında həmin ticarət mərkəzinin həndəvərindəki 66 nəfər kiçik sahibkara məxsus mağazanışəhər Sanitar Epidemioloji Stansiyanın işçiləri Arxitektura, Memarlıq və Şəhərsalma İdarəsinin rəis müavini Hacı Kamil Məmmədovun sifarişi ilə möhürləmişdilər. Bəhanə isə guya həmin mağazaların müasir standartlara cavab verməməsi göstərilirdi. Ancaq əsl səbəb bu deyildi. Məlum olduğu kimi, Hacı Kamil Eldar Əzizovun bu şəhərdə ən inanilmış pul yığanıdır. O vaxt da əvvəlcə hər sahibkardan 5 min manat tələb olunsa da, sonradan bu məbləğ 3 minə endirilmişdi. 66 sahibkardan yığılan həmin pul Hacı Kamilə çatandan bir müddət sonra mağazaların yenidən fəaliyyətinə razılıq verildi, hətta mağazaların qarşına alkopon üzlüklər çəkilməsi prosesinə başlanıldı. Fotolarda da gördüyünüz kimi xeyli tikinti işləri aparılıb. Lakin xeyli müddətdir proses dayanıb. Apardığımız araşdırma zamanı məlum olub ki, prosesə mane olan Rəşid Babayevdir. Əlbəttə, özünü bu ərazinin ağası hesab edən Babayev bunu elə-belə etməyib. Etibarlı mənbənin bildirdiyinə görə, onun Sumqayıt İnzibati-İqtisadi Məhkəməsinin hakimi İsmayıl Quliyevə verdiyi rüşvət müqabilində Arxitektura, Memarlıq və Şəhərsalma İdarəsinin layihəsini ləğv etdirmək üçün qərar çıxarılmasına nail olub.Qeyd etdiyimiz kimi adıçəkilən idarə əslində icra başçısının məhz alkopon üzlük siyasətini həyata keçirməklə pul yığır. Deməli, 66 sahibkarın mağazasının ətrafında aparılan iş həm də birbaşa Sumqayıt şəhər İcra hakimiyyətinin qərarı idi. Rəşid Babayev isə heç nədən çəkinmədən başçıya qarşı çıxır. Daha doğrusu, Eldar Əzizova meydan oxuyur.

Onu da qeyd edək ki, əslində həmin 66 mağazanın Rəşib Babayevin sahibi olduğu “Şərq bazarı”nın ərazisinə heç bir dəxli yoxdur. Bu səbəbdən sual yaranır: Rəşid niyə belə edir? Onunkeçmiş baş prokuror Eldar Həsənovun bacısı Afət Həsənova ilə həqiqətən ortaq olduğu RTŞ şirkəti-əvvəl “Şərq bazarı” adlanırdı- var. Ancaq 66 mağazanın bu şirkətin ərazisinə daxil deyil. Bunu sübut edəcək sənədlər də var. Hətta Apelyasiya Məhkəməsi, Ali Məhkəmə, nəhayət Ali Məhkəmənin Plenumu birmənalı olaraq ədalətli qərar çıxararaq mağazaların sahibkarlara məxsus olduğunu təsdiqləyib. Buna baxmayaraq RTŞ-nin ortaqları olan cütlük dəfələrlə həmin sahibkarların mağazalarını ələ keçirməyə cəhd ediblər. Hətta sahibkarlardan bəziləri səfir Eldar Həsənova müraciət edərək bacısının onun nüfuzundan istifadə edərək sahibkarlara qarşı qanunsuz davranışlarına son qoyulmasına yardım istəyiblər. Eldar Həsənov isə bu işdə adının hallandırılmasını istəmədiyini bildirib.

İndi daha bir sual ortaya çıxır: Sumqayıt İnzibati-İqtisadi Məhkəmənin hakimi bu ərazidə araşdırma aparmadan, 66 sahibkarın rəyini nəzərə almadan, Arxitektura, Memarlıq və Şəhərsalma İdarəsinin və İcra Hakimiyyətinin hüquqi nümayəndəsinin rəyi olmadan necə qanunsuz qərar çıxarıb? Rəşid Babayev kimə arxayındır? Eldar Əzizovun təbirincə desək, Sumqayıtda aparılan abadlıq, yenidənqurma prosesinin ona dəxli yoxdurmu?
Kimsə razılaşmayıb iddia edə bilər ki, Hacı Kamilin 66 sahibkardan mağazaların qarşısına alkopon üzlüklər vurulması məqsədilə layihə üçün 200 min manatı həqiqətən veriblərmi? Mənbəmiz isə iddia edir ki, həmin məbləğ Hacı Kamilin sağ əli kimi tanınan Zaur vasitəsilə ona çatdırılıb. Biz bir jurnalist kimi araşdırma apardıq və maraqlı bir məsələ ortaya çıxdı. Məlum oldu ki, bunca pul verilməsinə baxmayaraq görüləcək işlə bağlı heç bir layihə yoxdur. Məhz Rəşid Babayevin də əsas bəhanəsi budur ki, işlər layihəsiz görülür. O, bununla həm də Hacı Kamilə və Zaura anladır ki, sizin pul alıb razılıq verdiyiniz tikinti işinin layihəsi yoxdur. Onun fikrincə, həmin cütlük ciddi qanunsuzluq edirlər. Əslində isə Rəşid Babayev bununla Eldar Əzizova da ciddi ismarış yollayır. Bu, başçıya meydan oxumaq deyilmi? Rəşid Babayevin iddiasına görə, əgər burada görüləcək işlə bağlı layihə olsaydı, Zaur həmin sənədi ortalığa çıxarardı. Rəşid Babayev üstünə gediləcəyi halda bu faktla bağlıRespublika Prokurorluğu yanında Korrupsiyaya qarşı mübarizə idarəsinə müraciət edəcəyini də istisna etmir. Biz ərazidə bir neçə gün müşahidə apardıq. Tikinti prosesi tamamilə dayandırılıb. Rəşid Babayev isə əmindir ki, Eldar Əzizovun adamları onun üstünə gələ bilməyəcəklər. O hətta yaxın ətrafına deyib ki, tikintini dayandırması ortada heç bir layihənin olmadığını bir daha təsdiqləyir.

Rəşid Babayevin başçıya meydan oxumasının digər səbəbi də var. Çünki Eldar Əzizovun istəyi ilə aparılan abadlıq işləri tezliklə “Şərq bazarı”nın sərhədinə çatacaq. Bu zaman Babayevdən külli miqdarda pul istəniləcək. Əslində Babayev və Həsənovaya məxsus olan bazar ərazisi tamamilə bərbad vəziyyətdədir. Fotodan da göründüyü kimi, o boyda binada yalnız Babayevin kabineti təmir olunub. Qalan ərazi uçulub-tökülür, ətraf çox vaxt zibillə dolu olur.
Rəşid Babayevin Eldar Əzizova meydan oxuması davam edir. Bu oyunda kimin qalib gələcəyi bəlli deyil. Əzizov şübhəsiz ki, yeni ssenari hazırlayır. Əgər həmin ssenari reallaşsa Babayev əlli-ayaqlı gedəcək. Mövzuya qayıdacağıq.

P.S. Dünən günün sonunda aldığımız məlumata görə, ərazidə tikinti işlərinin davam etdirilməsi üçün ən yüksək səviyyədə göstəriş verilib və hüquq-mühafizə orqanlarına prosesə heç kəsin maneçilik törətməsinə imkan verilməməsi tapşırılıb.

HÜSEYN ABBASOĞLU