gundemxeber.az Son vaxtlar Rusiyanın Azərbaycan iqtidarına qarşı sərgilədiyi mövqe ölkəmizdə birmənalı qarşılanmır. Buna son 20 illik zülm və despot rejimindən xilas yolu olaraq baxanlar kimi, ölkəmizin yenidən rus boyunduruğuna düşəcəyindən ehtiyat edənlər də var. Etiraf edək ki, hər iki yanaşmada həqiqət payı az deyil.
Əlbəttə, Rusiyanın bizim iqtidara qarşı təzyiqləri Azərbaycan xalqının daha rahat və demokratik bir ölkədə yaşaması arzusundan irəli gəlmir və bu səbəbdən də, məlum təzyiqlərə zülmdən qurtuluş yolu kimi baxmaq doğru sayılmaz. Çünki bu təzyiqlərin əsas səbəbi Azərbaycan xalqına xoş gün ağlamaq deyil, ölkəmizin iqtisadi əlaqələrdən doğan zərurətin dolayısıyla getdikcə qərb dövlətlərinin təsiri altına düşməsidir. Məqsəd xüsusilə regional hərbi əməkdaşlıqda, Qərblə bərabər, hərəkət etməyə təşəbbüs göstərən rəsmi Bakını cəzalandırmaq niyyəti daşıyır. Qərbə müəyyən əlaqələr vasitəsilə bağlanan ölkə hakimiyyətinin üzünü yenidən Moskvaya tərəf yönləndirməsi, milli dövlətçilik maraqlarımız baxımından, həqiqətən də arzuolunmaz hal təsiri bağışlayır.
Bununla belə, rəsmi Moskvanın Azərbaycan iqtidarına qarşı yürütdüyü bu siyasətin milli dövlətçilik maraqlarımıza qətiyyən aifiyyatı yoxdur. Ən azı Azərbaycanda mövcud olan indiki hakimiyyətin özünün milli dövlətçiliyə heç bir aidiyyatının olmaması üzündən. Son 20 ildə öz kreslolarında möhkəmlənən bir neçə iri məmurun hədsiz iştahalarının və sərhədsiz hakim gücə çevrilmək istəyinin əsarətinə düşən ölkəmizin mövcud idarəetmə mexanizmini, nəinki milli, hətta hər hansı dövlətçilik ənənələrilə əlaqələndirmək belə mümkün deyil.
Rusiyanın Azərbaycan hakimiyyətinə qarşı mövqeyini milli dövlətçilik anlayışımızın qərbyönümlü xarakterinə zidd əməl kimi təqdim olunması da inandırıcı görünmür. Çünki mövcud iqtidarın Qərblə əlaqələrinin Qərblə inteqrasiya prosesinə aidiyyatı yoxdur. Ölkəmiz heç bir göstəricisinə görə Qərb dəyərlərinin daşıyıcısı olmayıb, olmayacaq da. Nə qədər ki bu hakimiyyət iş başındadır, nə zamansa ölkəmizin demokratik prinsiplərə sadiq ölkə kimi formalaşacağını düşünmək sadəlövhlükdən başqa bir şey ola bilməz. Ən azı o səbəbdən ki, nə sülaləçilik ənənələrinin hakim olduğu indiki Azərbaycan hakimiyyətinin bu dəyərləri mənimsəmək kimi bir həvəsi, nə də indi dilimizdə sevgimizdən qabar bağlamış qərbin bizə demokratik dövlətçilik ənənələri gətirmək istəyi var. Bütün xarici diplomatların və dövlət adamlarının çıxışına nəzər salsaq, onların ölkəmizlə qurulan əlaqələrdə prioritet olaraq qəbul etdikləri dəyərlər sistemini aydın şəkildə görə bilərik. Demək olar ki, bütün əcnəbi dövlət adamları Azərbaycanla bağlı siyasətlərində petrostrateji və hərbi əməkdaşlıq maraqlarının demokratik ənənələrdən öndə gəldiyini dilə gətirməkdən belə çəkinmirlər. Qərb ölkələrinin petrostrateji maraqların ön planda olduğu Səudiyyə Ərəbistanı da, Qətər də Qərbin strateji müttəfiqlərindən sayılır. Amma onlar da öz oliqarx hakimiyyətlərilə bizdən heç də seçilmir. Üstəlik, bizdən fərqli olaraq, həmin ölkələrdə demokratikləşmə qarşısında Rusiya, İran və s. bu kimi milli təhlükəsizlik bəhanələri də yoxdur.
Bütün bu deyilənlərdən çıxarılacaq bir nəticə var. Rusiyanın Azərbaycan hakimiyyətinə təziqlərinin olmayan milli dövlətçilik maraqlarımıza qarşı yönəldiyi haqda söylənənlər həqiqəti əks etdirmir. Əksinə, dünyanın söz haqqı uğrunda geopolitik maraqların qarşı-qarşıya gəlməsinin, bölgənin demokratikləşməsi baxımından, xeyirli tərəfləri də ola bilər və üz-üzə qaldığımız bu vəziyyətdən ölkəmizin gələcəyi naminə faydalanamaq lazımdır. Bunun yolu isə iqtidarın onsuz da həm öz hakimiyyətlərinin, həm də torpaq bütövlüyümüzün sonunu gətirəcək mənasız inadkarlıqda israr etməməsindən keçir. Mümkündür ki, bizimkilərin hədsiz hakimiyyət ehtirasları bölgədə marağı olan qüvvələrin etnik separatizm kartının ortaya atılmasına səbəb olsun və əsl təhlükəli olan da məhz elə budur. Vəziyyətdən çıxış yolu isə ölkənin bütün vətəndaşlarının yararlana biləcəyi demokratik sistem yaratmaq, təcili demokratik islahatlara getmək və xarici siyasət kursunda hansısa supergücün yox, yaşadığımız bütün coğrafiyanın maraqlarını nəzərə almaqdır.