Tərtərdə tabel silahını necə itirən polis
rəsinin vəzifədən getməsinin gizlinləri

Gəncədə uzun müddət idi ki, nisbi sakitlik hökm sürürdü… Daha doğrusu, məlum qruplaşmalar arasında uzun müddət idi davam edən intriqaların ardınca nəhayət, ötən il atəşkəs elan olunmuşdu. Amma neçə gün əvvəl bu “atəşkəs” pozuldu. Ölkə mətbuatının yazdığına görə, “atəşkəs”i Gəncənin RİH başçısı Elmar Vəliyevlə Gəncə ŞPİ-nin rəisi pozdular.

Polis rəisi niyə işdən gedib?

Mətbuatın yerli sakinlərə və Gəncə ziyalılarına istinadən verdiyi məlumatlara görə, 20 Yanvar faciəsinin ildönümü ilə bağlı keçirilən tədbirdə Gəncənin şəhərinin icra başçısı Elmar Vəliyev şəhərin bir sıra rəhbər şəxslərini hədələyib və onlara təhqiramiz münasibət göstərib. Prosesin gedişində ŞİH başçısı tərəfindən Azərbaycan Texnologiya Universitetinin rektoru Telman Məlikov iclasda ağır şəkildə təhqir edilib. Daha sonra icra başçısı “Gəncənin axundu da mənim barəmdə öz imzası ilə şikayət edib” deyə Gəncə ruhanisi haqda təhqiramiz ifadələr işlədib. İclasda iştirak edən mənbənin iddiasına görə, E.Vəliyevin axund adlandırdığı şəxs Qafqaz Müsəlmanları İdarəsinin Gəncəbasar bölgəsi üzrə nümayəndəsi, qazı Hacı Tahir Abbasovdur. Mətbuatın yazdığına görə, təhqir olunan hər iki şəxs, yəni Gəncənin axundu Seyid Tahir və Texnologiya Universitetinin rektoru polis rəisi Rasim Musayevə müraciət edərək ondan kömək istəyiblər. Rəis bu müraciətdən sonra E.Vəliyevlə görüşüb. Bu zaman bir müddətdir araları soyuq olan rəislə başçı arasında mübahisə düşüb. Mübahisə inkişaf edib və hər iki məmur əlbəyaxa davaya başlayıblar… Sonra yazılanlara görə, guya Rasim Musayev icra başçısının kabinetində Elmar Vəliyevə kəllə zərbəsi vurub və onu yerə sərib… Və guya sonradan məsələyə Gəncənin prokuroru Adil Vəliyev qarışıb… Bütün bunlardan sonra isə guya Gəncədə işləyə bilməyəcəyini bildirən Rasim Musayev öz ərizəsi ilə vəzifəsindən istefa verib…

Ağla batmayan versiyalar, bir də Elmar Vəliyevin döyülməsi…

Bütün deyilən şayiə və ya mülahizələrə rəğmən, bir məsələni bilmək lazımdır ki, hər bir icra başçısı Prezidentin yerlərdəki səlahiyyətli və etibarlı nümayəndəsi, rəis isə daxili işlər nazirinin səlahiyyətli və etimadlı nümayəndəsidir. Və bir halda ki, rəis nazirə, nazir də Prezidentə tabedir, nə qədər ərköyün olmasından asılı olmayaraq heç bir rəis başçıya kəllə atmaz!!! Nəinki kəllə atmaz, həm də onu kəllə ilə vurub yerə sərməz… Bilənlər bilir ki, icra başçısı istənilən halda rayondakı bütün hüquq mühafizə orqanı rəhbərlərini, həmçinin digər təyinatlı nazirliklərin yerlərdəki idarə rəislərini Prezident Administrasiyasının rəhbəri R.Mehdiyevə birbaşa məruzə edərək raport verib işdən çıxartdıra bilir. Bu, aksiomadır və hətta icra hakimiyyətləri haqqında “Əsasnamə”də RİH başçısının səlahiyyətləri ətraflı təsbit olunub.
Təsəvvür edin, hüquqşünas təhsili olan, az-çox dünyagörüşü olan hansı rəis və ya prokuror, məhkəmə sədri, təhsil şöbəsinin müdiri və s. İcra başçısının kəskin iradlarına kəllə ilə cavab verər? Bir halda ki, həmin rəisin öz nazirinə şikayət etmək, gileylənmək və s. kimi imkanları var, niyə bunu etmədən başçıya kəllə atıb hələ sonradan da özünü həbs edilmək təhlükəsi ilə üz-üzə qoysun? Bütün bunlarla biz heç də Gəncə ŞİH başçısının kabinetində atılan kəllənin təsir dairəsini azaltmaq istəmirik… Amma indi ortaya başqa maraqlı faktlar çıxır…

Rasim Musayev 1992-ci ildə Tərtərdə tabel silahını necə “itirib” və sonra necə özününküləşdirib?

R.Musayevin Gəncə Şəhər Pİ-nin rəisi vəzifəsindən kənarlaşdırılmasının üstündən hətta bəzi mülahizələr ortaya çıxdı ki, guya onu Nizami RPİ-yə rəis təyin edəcəklər və s. Halbuki general rütbəli bir keçmiş rəisin adi bir rayona rəis təyinatı mümkünsüzdür… Onu yaxşı halda DİN-də hansısa vəzifə gözləyir, ya da pesiyaya çıxıb yüksək təqüdlə başını saxlamaq… Amma baş verənlərlə bağlı “Təzadlar” şok məlumatlar dərc edib. Qəzetin elektron poçtuna Ş. Həsənov imzalı müəllif tərəfindən daxil məktubda deyilir: “Söhbət son günlər adı qalmaqallarda hallanan Gəncənin keçmiş rəisi Rasim Musayev barədədir. Mən R.Musayevi hələ 1992-ci ildə Tərtərdə və sonra Bərdədə işləyən vaxtdan tanıyıram… Həmin vaxt məni də Bakıdan cəbhədəki müharibə vəziyyəti ilə bağlı Tərtərə ezam etmişdilər. Bakı Polisində işləyirdim. Həmin vaxt Rasim Musayev Tərtərdə sahə inspektoru (“uçastkovı”) işləyirdi… Polis işçilərindən ibarət bir rota düzəldilmişdi, rəhbəri də Kəlbəcərdən olan Şükür adlı şəxs idi. Şükür bir müddət Laçın RPŞ-də işlədi, hazırda təqaüdə çıxdığını bilirəm… Rotada 70-80 nəfər idik. Əsasən, Marquşavan istiqamətində olan hücumların qarşısını alırdıq. Tərtərin rəisi isə Ağdamdan olan Ələsgər Əliyev idi… Bir gün Rasim Musayev bizə dedi ki, tabel silahımı özümə götürəcəyəm. Biz inanmadıq. O, rota komandirinə raport yazdı ki, tabel silahımı itirmişəm, onun silinməsi üçün əmr verilsin (Lazım olsa, o vaxtkı şahidlərin hamısı sağdır, sizinlə görüşdürə bilərəm). Beləliklə, komandir Şükürün etirazına baxmayaraq Rasim Musayev tabel silahını “itirdi”, əvəzində başqa silah aldı. Həmin tabel silahının taleyini araşdırsalar, çox sirlər ortaya çıxar… Sonralar isə bilirəm ki, Tərtərə İsa Bağırov adlı rəis gəldi. O, sonralar Yasamalın rəisi oldu. İ.Bağırov Rasim Musayevi işdən çıxartdı. R.Musayev Bərdəyə təyinat aldı. Lakin Sərdar Həmidovun sayəsində İsgəndər Həmidov nazir olan kimi, xahiş etdirdi və təzədən Tərtərə qayıtdı… R.Musayev sonralar DİN-də də işlədi, amma nədənsə idarənin rəisi Ramiz Nağıyev onu burda da işdən kənarlaşdırdı… Sonralar Binəqədidə RPİ-nin rəis müavini olanda da sərəncama çıxartdılar. Bir müddət sonra onu DİN-nin İctimai Təhlükəsizlik İdarəsində işə apardılar… Hətta Nazim Nağıyev rəis olanda onu işdən çıxarmışdı, o isə Prezidentə nazir Usubovdan teleqramlar vurdu ki, mən “91-lər”dənəm, ölkəni dağıdaram… Yəni, mitinqlərdə H.Əliyevin hakimiyyətə qayıdışına səs vermişəm və s. Sonradan nə oldusa, nazir canının dərdindən onu Cəlilabada rəis göndərdi… Bir il işləyəndən sonra isə sehirli əl onun Gəncəyə rəis getməsinə, general rütbəsi almasına nail oldu… Yəni demək istəyirəm ki, Rasim müəllim çox maraqlı həyat yolu keçib. Onun Tərtərin o vaxtkı rəisi İsa Bağırovla olan bir məcarasını isə bu yazımı dərc etsəniz, sizə göndərəcəyəm. Həmçinin Binəqədidəki iki şok hadisə barədə…”
Rasim Musayevlə əlaqə saxlayıb əlavə məlumat ala bilmədik. Bütün hallarda bir sual açıq qalır: o boyda vəzifədən, özü də Azərbaycan gerçəkliyində kim öz ərizəsi ilə istefa verər?