Nazirin həkimlərin işə qəbulu ilə bağlı imtahan siyasəti nəyə hesablanıb?

Əliİnsanov adı yəqin ki, çoxlarınıza tanışdır. Azərbaycanın səhiyyə sistemini iflic edən və hazırda mövcud olan problemlərin banisi. Məhz onun özbaşına əməlləri və səhiyyədə rüşvəti təbliğ etməsindən sonra ölkənin ən vacib sahələrindən biri xoşagəlməz hallarla üzləşib.
Dövlət büdcəsindən səhiyyə sektorunun inkişaf etdirilməsi üçün ayrılan pulları mənimsəyərək özünə mal-mülk yığan sabiq nazir qanunsuz işlərini sona qədər davam etdirə bilmədi. Keçmiş səhiyyə nazirinin gördüyü bütün gizli işlərin üstü açıldı və ictimaiyyətə təqdim olundu. Qəfil yoxlamalar nəticəsində nazir vəzifəsindən azad olunaraq həbs edildi. Ölkə başçısı rüşvətə bulaşmış səhiyyəmizi səhmana salmaq üçün Oqtay Şirəliyevə etimad göstərdi. Nazir vəzifəsinin icrasına başladığı ilk vaxtlarda özünü yaxşı cəhətdən göstərsə də, sonradan o, da sələfinin yolunu tutdu. İdarəçilik işlərindəki təcrübəsizliyi respublika səhiyyəsindəki köhnə problemləri yenidən diriltdi. Səhiyyə sistemindəki çoxsaylı problemlərdən biri də kadr məsələsi ilə bağlıdır. Ölkə başçısı demək olar ki, hər açıqlamasında bildirir ki, həkimlərin bilik səviyyəsi və peşəkarlığı artırılmalıdır. Təəssüf ki, bu tapşırıqlara əməl olunmur. Xəstəxana və poliklinikalarda çalışan həkimlərin yetərli bir hissəsi normal savada malik deyil.
O.Şirəliyevin təyinatı ilə xəstəxanalara və digər tibb müəssisələrinə rəhbərlik edən şəxslər öz bildikləri üsullarla həkimləri işə qəbul edirlər. Bu sahədəki özbaşınalığa son qoymaq üçün guya nazirlik yeni üsul işləyib hazırlayıb. Belə ki, bundan sonra həkimlər yalnız Səhiyyə Nazirliyinin (SN) mərkəzləşdirilmiş şəkildə işə qəbulla bağlı müsabiqələrdə iştirak edərək işə qəbul oluna bilərlər. Dövlət tibb müəssisələrinin rəhbərlərinin nazirliyin işə qəbul üçün keçirdiyi müsabiqələrdə iştirak etməyən və uğur qazanmayan namizədlərin işə qəbul edilməsi qanunsuz hal sayılacaq və etibarsız hesab ediləcək. Belə halları törədənlərə qarşı da ciddi tədbirlər görüləcək. Bu barədə nazirliyin rəsmiləri açıqlama verib. Bildirilib ki, tibb işçilərinin mərkəzləşdirilmiş qaydada işə qəbulu prosesinə fevralın 18-dən başlanıb. Müsabiqənin belə formada keçirilməsi korrupsiyaya qarşı mübarizə tədbirlərindən biridir.
Martın 18-də həkimlərin işə qəbulu üzrə ilk imtahan keçiriləcək. Müsabiqənin ilk mərhələsində test imtahanı zamanı namizədlər ümumilikdə 50 suala cavab verəcəklər. Həmin sualların 40-ı sırf ixtisasla, 10-u isə müvafiq qanunvericiliklə bağlı olacaq. Test imtahanı SN tərəfindən keçiriləcək. İmtahanda uğur qazanacaq namizədlər müsahibə mərhələsinə buraxılacaqlar. Bu mərhələ də SN-nin işə qəbulla bağlı yaradılan 7 nəfərlik komissiyası tərəfindən həyata keçiriləcək. Amma biz inanmırıq ki, qeyd olunan imtahanlar zamanı şəffaflıq prinsipinə əməl edilsin. "İmtahan siyasəti" ancaq və ancaq nazirin özünə sərf edə bilər. Bu, nəinki səhiyyədəki korrupsiyanı zəiflədəcək, əksinə daha böyük problemlərə yol açacaq. Görünür, nazir imtahanları öz əlinə keçirməklə qazanc mənbəyini genişləndirmək niyyətindədir.
Qeyd edək ki, digər dövlət qurumlarında işə test üsulu ilə qəbulu Tələbə Qəbulu üzrə Dövlət Komissiyası (TQDK) həyata keçirir. Təklif edirik ki, SN-in imtahanları da TQDK-ya keçirilsin. Nazirliyin kortəbii şəraitdə keçirəcəyi imtahanlardan kimsənin pulla, tanışla keçməyəcəyinə zəmanət verilmir. Fikrimizcə, dövlət rəsmiləri bu məsələyə diqqət ayırmalıdır.

Samir