Arzu Rəhimov və Elçin Quliyev Müdafiə Nazirliyinin
rəhbərliyini istefaya göndərmək istəyirlər

Hərbçi ekspert Üzeyir Cəfərov:
“Bu adamlar ordu ətrafında ajiotaj yaranmasına maraq göstərirlər”

Son aylar orduda baş verən əsgər ölümləri mətbuatın əsas diqqət mərkəzindədir. Orduda əsgər qətllərinə etiraz olaraq yanvar və mart aylarında izdihamlı xalq mitinqləri keçirilib. Ölkənin protest elektoratı müxalifətin, liderlərin iştirakı və qərarı olmadan meydanlara çıxıb orduda baş verənlərə etiraz edirlər. Hakimiyyət prosesin genişləndiyini və aksiyaçıların günbəgün artdığını görür və daha sərt tədbirlərə əl atır.
Bununla belə, əsgər ölümlərinin ardı-arası kəsilmir, müəmmalı şəkildə əsgər ölümləri qeydə alınır. Deputatlar, hüquq müdafiəçiləri və hərbi ekspertlər çıxış yollarını göstərir, təkliflər irəli sürür. Proseslər göstərir ki, hakimiyyət və aidiyyatı qurumlar qətiyyən tədbir görmək, orduda nizam-intizam yaratmaq istəmir. Belə olsaydı ən azı 12 yanvar aksiyasından sonra əsgər qətllərinə son qoyulardı. Ancaq hələ də əsgər meyitləri ailələrinə göndərilir. Onların istintaqı düzgün aparılmır, kiçik rütbəli şəxslər cəzalandırılır. Bir çox hallarda isə əsgərin qanı batırılır, onun ya düşmən gülləsindən öldüyü, ya da intihar etdiyi rəsmi şəkildə açıqlanır. Bu cür davam etdikcə mitinqlərin miqyası genişlənəcək və Müdafiə Nazirliyi üçün başağrısına çevriləcək.
Amma Müdafiə Nazirliyi ölümlərin ciddi şəkildə araşdırıldığını və ordunun inkişaf etdiyini iddia edir. Elə 10 mart aksiyasından sonra MN-nin mətbuat xidmətinin rəhbəri Eldar Sabiroğlu APA-ya açıqlamasında əsgər ölümlərinə qarşı etiraz aksiyası keçirənləri anaların göz yaşından istifadə etməkdə günahlandırıb.
E.Sabiroğlu Müdafiə Nazirliyinin ordudakı hər ölüm faktına görə ciddi araşdırma apardığını və günahkarların cəzalandırıldığını bildirib: “Bəzi qüvvələr yalan informasiyalarla cəmiyyətlə ordu arasında qarşıdurma yaratmaq istəyirlər. Bunu lənətləyirik. Bu aksiyanı keçirmək istəyənlər nə qazandılar, nə əldə etdilər? Bu gəncləri küçəyə çıxaranların niyyəti başqadır”.
Maraqlıdır ki, ölkənin bütün sahələrində problemlər var və yalnız orduda baş verənlərə etiraz olunur. Doğrudur, ordu həssas məsələdir, heç bir sektorda bu qədər ölüm-itim yoxdur və bu artıq dəhşətli vəziyyətə gətirib çıxarıb. Odur ki, aksiyaların davam etməsi təbii haldır.
Ancaq nədənsə baş verən hadisələrlə bağlı hərbçi ekspert Üzeyir Cəfərov “Reytinq” qəzetinə müsahibəsində deyib ki, əsgər ölümləri bəzi məmurların əlində vasitəyə çevrilib. Onun sözlərinə görə, bəzi məmurlar Müdafiə Nazirliyinin rəhbərliyini istefaya göndərmək istəyirlər. Ona görə də aksiyalar körüklənir, əsgər ölümləri gündəmdə saxlanır.
Ü.Cəfərov deyib ki, bu məsələdə Səfərbərlik və Hərbi Xidmətə Çağırış üzrə Dövlət Xidmətinin rəisi, general-leytenant Arzu Rəhimov, Dövlət Sərhəd Xidmətinin rəisi, general - leytenant Elçin Quliyev kimi məmurların xüsusi marağı var: “Bəzi hallarda bu adamlar ordu ətrafında ajiotaj yaranmasına maraq göstərirlər”.
Ü.Cəfərov bildirib ki, dünyasını dəyişən əsgərlər yalnız orduda xidmət etməyiblər: “Onlardan daxili qoşunlarda, sərhəd xidmətində, FHN-də xidmət edənləri də olub. Amma hədəfə yalnız Müdafiə Nazirliyi alınır. Düşünürəm ki, burada məqsəd hər il Müdafiə Nazirliyinə ayrılan iri vəsaitlərə nəzarəti ələ almaqdır. Bu nəzarəti ələ almaq uğrunda isə Səfərbərlik və Hərbi Xidmətə Çağırış üzrə Dövlət Xidməti, Dövlət Sərhəd Xidməti və Fövqəladə Hallar Nazirliyi mübarizə aparır”.
Yürüdülən kampaniya ilə Müdafiə Nazirliyinin rəhbərliyinin istefaya gedəcəyinə inanmayan Ü.Cəfərov vurğulayıb ki, Azərbaycanda belə bir mədəniyyət formalaşmayıb: “Düşünürəm ki, əsgər ölümünə son qoymaq üçün ciddi islahatlar aparılmalıdır. Bu həm qanunvericilik sahəsini, həm də ordunun özünün daxili strukturunu əhatə etməlidir. Çünki Azərbaycana ən məhşur generalı gətirib nazir təyin etsən belə, əsgər ölümü yenə davam edəcək”.
Ü.Cəfərovun açıqlamalarında ciddi arqumentlər var. Lakin bunu da nəzərə almaq lazımdır ki, istər daxili qoşunlar, istərsə də sərhəd xidmətində əsgərlik keçən olsun, yenə də ordu olaraq məsuliyyət daşıyırlar. Üstəlik, sərhəd xidmətində və daxili qoşunlarda əsgər ölümü Müdafiə Nazirliyi ilə müqayisədə çox azdır. Bundan əlavə, cəmiyyətdə ordu və hərbi xidmət deyiləndə ağıla gələn ilk fikir Səfər Əbiyev və onun rəhbəri olduğu nazirlikdir.
Odur ki, bu hadisələrdən məmurların sui-istifadə etməsi, baş verənləri kəskinləşdirməsi cəhdləri ola bilər. Ancaq bu haqq vermir ki, Müdafiə Nazirliyinin hər ay və ya həftə əsgərinin meyiti ailəsinə göndərilə. Hətta S.Əbiyev özünə qarşı kompromat savaşı başlandığını görürsə ən azından əsgər valideynlərini sakitləşdirmək üçün addımlar atsın. Orduda qayda-qanun yaratsın və ona qarşı olan qüvvələrin əlinə arqument verməsin. Ona qalsa hakimiyyət daxilində həmişə çəkişmə olub, nazirlər biri-birini “vurublar”, mətbuatda kompromat savaşına start veriblər. Bu baxımdan S.Əbiyevin başı üzərində “qara buludların” olmasında hər iki məmurun barmağı ola bilər. Bu vəziyyətdən çıxış üçün müdafiə naziri bütün imkanlarını səfərbər edib qarşı tərəfi susdurmalı və əsgər ölümlərinin səngiməsinə çalışmalıdır. Əks halda əsgər qətlləri artacaq, aksiyalar böyüyəcək və bu situasiyadan adıçəkilən məmurlar istifadə edəcəklər.

Aslan