Ölkədə təbii biçənək və örüş sahələri kəndlilərin əllərindən alınıb

Əkin sahələri oliqarx-məmurlara verilib.

Çıxış yolu tapa bilməyən kəndlilər isə uzun müddət damazlıq və təkrar istehsal məqsədi ilə bəslədikləri inəkləri kəsimə veriblər. İndi də heyvanların baş sayı azalmaqla yanaşı ölkədə ət, süd istehsalı kəskin şəkildə azalıb. Artıq nəticə göz qabağındadır.

Ötən ilin 6 ayı ərzində ət idxalı 61 faiz, kərə yağı idxalı isə 27 faiz artıb. Təəssüflər olsun ki, 2017-ci ildə vəziyyət daha da pisləşib.

Belə ki, heyvandarlıq məhsulları istehsalı azalıb, idxalı isə kəskin şəkildə artıb. Bu ilin altı ayı ərzində əvvəlki ilin eyni dövrü ilə müqayisədə ət idxalı 2,5 dəfə, süd məhsulları idxalı isə 70 faiz artıb.

Hökumət əhalinin ət və süd məhsullarına olan ehtiyacının ödənilməsini idxaldan aslı vəziyyətə salıb.

Onu da qeyd edək ki, ölkənin ərzaq buğdasına, çaya, şəkərə, bitki yağlarına olan təlabatı tam idxal məhsullarının hesabına ödənilir.

Azərbaycanda əkinə yararlı iri torpaq sahələrini zəbt edən məmurların siyahısı hazırlanır.

Belə məlum olur ki, əksəriyyəti yüksək vəzifəli şəxslər olmaqla, əkin sahələrini ələ keçirib orada dəbdəbəli villalar ucaldan xeyli şəxs var.

Hazırda yüzminlərlə hektar əkinə yararlı torpaq faktiki olaraq ya təyinatı üzrə tamamilə istifadəsizdir, ya da orada şəxsi mülklər, imarətlər inşa olunub.

Qeyd edək ki, bu torpaq sahələri ilə bağlı məsələyə son vaxtlar ölkə başçısı İlham Əliyevin çıxışlarında da tez-tez toxunulur. Ölkə başçısı qeyd edib ki, məsələ ilə bağlı bu il çox ciddi təftiş aparılır.

İllərdir əkinə yararlı böyük torpaq sahələrini ələ keçirmiş, onu əkin məqsədilə istifadəsiz saxlamışlar.

Bu da azmış kimi, həmin torpaqlardan başqa məqsədlər, məsələn, şəxsi imarətlər, villalar tikmək üçün yararlanmış belə məmurların sərt cəzalandırılması mümkündür.

Həmin torpaqların onların əlindən alınacağı dəqiqdir, amma onlar yalnız bu torpaqları deyil, vəzifələrini də itirə bilərlər./ulus.az