Ölkələr borca düşür, fərdlər milyarder olur!

gundemxeber.az Bu günlərdə Wealth-X adlı təşkilat dünyada ən çox milyarderi olan 10 dövlətin siyahısını açıqlayıb. Məlumatdan görünür ki, mövcud qlobal qeyri-müəyyənliyin, avrozonada və ABŞ-da borc böhranının, Asiya qitəsində iqtisadi artım ahənginin aşığı düşdüyü bir vaxtda milyarderlər hələ də qalmaqdadır. Maraqlıdır ki, bu «nadir fərd»lər ilbəil varlanmaqda davam edirlər.
Məlumata görə, il ərzində dünya milyarderlərinin sərvəti 14,0 faiz (760 milyard dollar) artaraq, fantastik rəqəmə (6,19 trilyon) çatmışdır. Dünyada onların sayı da artmaqda davam edir və hesabat dövründə 9,4 faiz qalxaraq, 2 min 160 nəfərə çatıb. Bəs, bu insanlar haralarda yaşayırlar və hansı ölkələrdə onların sayı daha çoxdur?
Sözügedən təşkilat bu suala cavab vermək istiqamətində araşdırmalar apararkən milyarderlərin ən çox olduğu 10 dövlətin siyahısını hazırlayıb. Həmin siyahını oxucuların diqqətinə çatdırırıq:
Sırada 10-cu yerdə Kanada qərar tutub. Bu ölkədə rəsmi qeydiyyata alınmış milyarderlərin sayı 40 nəfərdir. Onlar öz aralarında ümumi məbləği 105 milyard dollar təşkil edən sərvəti «bölüşdürürlər».
Bundan başqa, Kanada həm də sayına görə 8-ci yeri tutan ultravarlı diasporun vətəni sayılır. Onlardan hər birinin aktivləri 30,0 milyon dolları aşır və aralarında milyarderlərin çəkisi 0,8 faiz təşkil edir. Məhz onlar ölkədəki varlı insanların əlində olan sərvətin (595,0 milyard dollar) 18,0 faizinə sahibdirlər.
9-cu pillədə Braziliya dayanır. Bu ölkə, ümumi sərvəti 300,0 milyard dollar qiymətləndirilən 49 milyarderin vətəni sayılır. Həm də Braziliya, bu 10-luğa daxil olan yeganə Latın Amerikası ölkəsidir.
Ötən il braziliyalı milyarderlərin sərvəti 3,5 faiz artıb. Ümumilikdə isə, bu ölkədə 30,0 milyon dollardan yuxarı sərvəti olan 4 min 640 nəfər ultravarlı fərd qeydə alınıb. Belələrinin sərvəti 865,0 milyard dollar həcmində qiymətləndirilir.
8-ci məqamda İsveçrə dayanır. Bu da təsadüfi deyil. Belə ki, uzun dövrdən bəri İsveçrə həm bank ölkəsi, həm də iqtisadiyyatı stabil olan (son qlobal iqtisadi böhrana qədər) bölgə kimi tanınır. Bu ölkədə 57 milyarderin yaşadığı bildirilir ki, onların da ümumi sərvəti 125,0 milyard dollar həcmində qiymətləndirilir. Buradan görünür ki, hər bir İsveçrəli milyarder öz sandığında orta hesabla, 2,2 milyard dollar «gizlədir».
Yeddinci yerdə Honkonq dayanıb. Yalnız formal qaydada kontinental Çindən asılı olan Honkonqda 64 milyarderin yaşadığı bildirilir. Onların sərvətinin ümumi həcmi 190,0 milyard dollar həcmində qiymətləndirilir. Honkonq Asiyanın ən başlıca maliyyə mərkəzlərindən biri sayılır.
Sırada 6-cı pilləni qonşu Rusiya tutur. Milyarderlərin sayına görə, bu ölkə 5-ci yerdədir.
Bu ölkədə milyarderlərin sayının 97 nəfər, sərvətinin ümumi həcminin isə 380,0 milyard dollar təşkil etdiyi bildirilir. Son bir ildə rusiyada milyarderlərin sayı 17 nəfər artıb. Amma maraqlıdır ki, hesabat dövründə Rusiya milyarderlərinin ümumi sərvətinin həcmi 29,0 faiz aşağı düşüb. 30,0 milyondan yuxarı sərvətə malik fərdlərin ümumi sərvətinin həcmi isə bu qonşu ölkədə 605,0 milyard dollar təşkil edir.
İlk beşliyin sırasını Hindistan açır. Bu ölkədəki milyarderlərin sayı 109 nəfər, ümumi sərvətlərinin sayı isə 190,0 milyard dollar təşkil edir. İqtisadi gücünə görə, Hindistan Asiya qitəsi iqtisadiyyatı daxilində, Yaponiya və Çindən sonra, 3-cü yerdə dayanır. Bu lkədə orta hesabla, hər bir milyarderin payına 1,7 milyard dollar düşür.
Bu yarışda 4-cü mövqe Almaniyanın əlindədir. Bu ölkədə miyarderlərin sayı 137 nəfər, sərvətlərinin ümumi həcmi isə 550,0 milyard dollardır. Almaniya, avrozonada bu siyahıya düşən yeganə dövlətdir.
Yarışda, bürünc medalı Böyük Britaniya alıb. Məlumata görə, Birləşmiş Krallıqda milyarderlərin sayı 140 nəfər, sərvətlərinin ümumi sayı isə 430,0 milyard dollar təşkil edir. Həm də milyarderlərin sayına görə, Britaniya Avropada birinci sırada dayanır. Amma milyarderlərinin sərvətinin həcminə görə, britaniyalılar Almaniyadan 120,0 milyard dollar geri qalır.
İkinci yerdə Çin dayanır. Bu ölkədə 147 milyarderin yaşadığı bildirlir. Onların sərvətinin ümumi həcmi isə 380,0 milyard dollar təşkil edir. Orta hesabla, hər bir çinli milyarder 2,6 milyard dollar sərvət üzərində sərəncam verir.
Nəhayət, gözlənildiyi kimi, sırada birinci pilləni ABŞ tutur. Bu ölkədə 380 milyarderin yaşadığı bildirilir. Onların ümumi sərvəti isə 2,05 trilyon dollar həcmində qiymətləndirilir. Yaşanan iqtisadi çətinliklərə baxmayaraq, otən ilə ABŞ-da milyarderlərin sayı 25 nəfər, sərvətlərinin ümumi həcmi isə 8,0 faiz artıb.
«Vestifinance.ru» saytının təqdim etdiyi bu məlumatlara yalnız onu əlavə etmək olar ki, Azərbaycanda da milyarderlərin sayı ilbəil artmaqdadır. Amma adını sadaladığımız ölkələrdən fərqli olaraq bizdə sürətlə varlanan adamlar iş adamları yox, oliqarxlaşmış dövlət məmurları, siyasi hakimiyyət rəhbərləridir. Məsələn, heç bir şübhə yoxdur ki, Azərbaycanda ən bir neçə şəxsin - Heydərovların, Məmmədovların, Mehdiyevlərin və başqalarının varidatı milyard manatlarla qiymətləndirilir. Amma onların adı heç vaxt rəsmi siyahılarda olmur, bəlli səbəblərdən.

Vaqif Nəsibov