Rusiya FTX Aydın Bəşirovu necə ələ verdi; Dövlət Xəzər Dəniz Gəmiçilik İdarəsinin rəisi oğurluq xam neft biznesinin güdazına gedib; onun ölkə başçısının qəzəbinə gəldiyi və seçkidən sonra vəzifədən qovulacağı iddia edilir
Seçkidən sonra hakim komandada dəyişikliklər olacağı haqda mətbuatda indiyədək xeyli məlumatlar dərc olunub. İlham Əliyevin üçüncü dəfə prezident postunu qoruya biləcəyi təqdirdə öz komandasına əl gəzdirəcəyi, xeyli köhnə kadrları yeniləri ilə əvəzləyəcəyi iddia olunur. Hətta bu yaxınlarda mətbuatda seçkidən sonra vəzifədən çıxarılacaq yüksək çinli məmurların təxmini siyahısı da çap olunub.
“Yeni Müsavat” da bu mövzuya vaxtaşırı müraciət edən KİV-lərdəndir. Xəbər qaynaqlarımız dövlətin yuxarısında baş verən proseslər haqda ara-sıra bizə bilgi uçurdur. Belə bilgilərdən biri də bugünlərdə əlimizə çatıb.
İqtidara yaxın mənbələrdən ötürülən xəbərə görə, seçkidən sonra vəzifəsini itirəcək məmurlardan biri də Dövlət Xəzər Dəniz Gəmiçilik İdarəsinin rəisi (DXDGİ - CASPAR) Aydın Bəşirovdur. A.Bəşirovun prezident İlham Əliyevin qəzəbinə gəldiyi deyilir. Məlumatı bizə verən mənbə A.Bəşirovun konkret nəyə görə ölkə başçısının qəzəbinə gəldiyini demədi. Amma bəzi ip ucları verdi...
Mənbənin dediklərindən: “Aydın Bəşirov əyləncəyə, eyş-işrətə həddən artıq meylli adamdır. Düzdür, bu hakimiyyətdə əksər məmurlar ekzotik əyləncəyə həvəslidirlər və bunu tez-tez edirlər. Amma Aydın müəllim bu məsələdə ilk beşliyə düşür. Yaşının bu vaxtında kefindən, əyləncəsindən qalmır”.
Mənbə iddia edir ki. A. Bəşirov həftədə ən azı iki-üç gününü yaxta ilə dəniz gəzintisinə ayırır: “O, bu gəzintilərdə əsla tək olmur. Onu mütləq bir neçə gənc və gözəl xanımlar müşayiət edir. Baş gəmiçi Xəzər dənizində gəzməyi, əylənməyi çox sevir. Bu da onun peşəkar dənizçi olmasıyla bağlıdır. O, vaxtilə müğənni Xədicə Abbasovanın ifasında oxunan və dövrünün hitinə çevrilmiş ”Gəmini sür, gəmiçi qardaş" mahnısının sədaları altında dəniz gəzintisini çox xoşlayır".

***

Mənbə bildirir ki, A. Bəşirovun böyük biznes imperiyası var. Onun “ilişməsinə” bu amil də ciddi təkan ola bilər.
Zatən bu hakimiyyətdə təmsil olunan ən xırda məmur belə özündən deyən biznesmeni pul çuvalında boğar. O ki ola 19 ildir ki, Dövlət Xəzər Dəniz Gəmiçilik İdarəsinin rəisi işləyən Aydın Bəşirov. Həqiqətən də 20 ilə yaxın bir müddətdə ən gəlirli sahələrdən birinə rəhbərlik edən məmurun pulunun, biznesinin sayı-sanbalı, sınırı-sərhədi olmaz təbii ki. Aydın Bəşirov bina tikintisindən, turizmdən, neft alverindən, ticarət obyektlərindən tutmuş, gözəllik salonlarına qədər, ən müxtəlif profilli biznesə malik məmurdur.
Xəbər qaynağımız deyir ki, A.Bəşirovu prezidentin gözündən salan əsasən iki məqam olub: birinci, onun həddən artıq əyləncəyə meyllənməsi, ikinci də... ümumi dövriyyədən saxladığı külli miqdarda paraları... Yəni gizli biznesi, özəl kassası.
Amma hələlik birinci səbəb üzərində bir balaca gəzişmə edək.
Bu, səbəb olaraq əsas olmasa da, hər halda, gözardı ediləcək qədər əhəmiyyətsiz də deyil. Söhbət A.Bəşirovun qadın düşkünü olmasından, özünü əyləncəyə qapdırmasından gedir. Mənbəmiz iddia edir ki, ölkənin baş gəmiçisi bu mövzuda bütün hədləri o qədər aşıb ki, axırda prezidentə məruzə ediblər. Ölkə başçısına təqdim edilən video və fotofaktlar Bəşirovun karyerasına son verilməsi haqda qərar qəbul edilməsində ciddi rol oynayıb.
Yəqin hər kəs prezident İlham Əliyevin ən ali kürsüdən məmurlara əyləncə qadağası etdiyini bilir, xatırlayır. İ.Əliyev son illər bir neçə dəfə müşavirələrdə bu hallara yol verən məmurlara ümumi şəkildə xəbərdarlıq edib, onları ad çəkmədən danlayıb. Son belə xəbərdarlıq bu il fevralın 12-də keçirilən müşavirədə edilib. Ona görə də ölkə başçısının əyləncəyə həddən artıq həvəs göstərən məmurlara qıcıq olduğu aydındır. Amma bu, Aydın Bəşirov kimi sadiq və köklü bir məmurun gözdən düşməsinə, sıradışı edilməsinə səbəb ola bilməz. Olsa-olsa buna görə Bəşirov prezident tərəfindən ciddi şəkildə danlanar, xəbərdarlıq alar.
Bu hakimiyyətdə məmurlar əsasən maliyyə fırıldaqlarına görə çıxdaş edilirlər. Ümumi “qazan”dan gizlədilən pullara görə indiyədək çox kəllələr gedib. Məsələn, Rza İbadov, Fərhad Əliyev və xeyli adını çəkmədiyimiz məmurlar məhz yuxarılara “atdıqları” üçün “vurulublar”.
Mənbə deyir ki, Dövlət Xəzər Dəniz Gəmiçilik İdarəsinin rəisini Rusiya Federal Təhlükəsizlik Xidməti ələ verib. Necə? Gəlin təxminən iki ay əvvələ qayıdaq.
Avqust ayının əvvəllərində Rusiyanın Federal Təhlükəsizlik Xidməti Xəzər dənizinin Dağıstan akvatoriyasında Azərbaycan bayrağı altında üzən “Naftalan” gəmisini saxlamışdı. Bu xəbəri “Rossiyskaya qazeta” yaymışdı. Qəzetin iddiasına görə, Mahaçqaladan Səngəçal terminalına istiqamət alan gəmidə qaçaqmalçılıq yolu ilə əldə olunmuş “LUKoyl”a məxsus bir neçə min ton xam neft olub.
Məlumatda bildirilirdi ki, Həştərxan şelfindən çıxarılan neftin Bakı-Novorossiysk kəməri ilə nəql olunması nəzərdə tutulubmuş. Həmin vaxt o da qeyd olunurdu ki, bu fakta görə Rusiya Cinayət Məcəlləsinin “strateji resursların qaçaqmalçılığı” maddəsi ilə cinayət işi başlanıb.
Rusiya mənbələri tankerin Azərbaycanın Dövlət Neft Şirkətinə məxsus olduğu barədə məlumat yaysa da şirkətin mətbuat xidməti bunu təkzib etmişdi. ARDNŞ-dən bu adda gəmilərinin olmadığı bildirilmişdi.
AzadlıqRadiosu isə Xəzər Dəniz Gəmiçiliyi İdarəsinin internet saytında verilən tanker siyahısında 1983-cü ildə istehsal olunan “Naftalan” tankerinin adının yer aldığını aşkarlamışdı.
Radionun həmin vaxt araşdırma yazısında bildirilirdi ki, “Naftalan” tankeri “General Şıxlinski” tipi üzrə 21 gəmidən biridir.
Rusiya tərəfinin saxladığı bu tankerin məhz həmin tanker olması barədə radionun müxbirinin suallarına Xəzər Dəniz Gəmiçiliyi İdarəsindən hər hansı məlumat verilməmişdi.
Sonradan bu haqda “Yeni Müsavat”a məlumatlar daxil olmuşdu. Həmin məlumatda bildirilirdi ki, saxlanılan tankerin kapitanı və onun köməkçisi hələ də Rusiya FTX tərəfindən saxlanılırlar. Yeri gəlmişkən, “Naftalan”ın kapitanı və köməkçisi üstündən 2 aydan çox keçsə də hələ azad edilməyib. Onların və tankerin azad olunması müqabilində Rusiya tərəfinin 5 milyon dollar istədiyi haqda sentyabrın 20-də işıq üzü görən sayda məlumat vermişdik.
Məsələ burasındadır ki, iki aydan çoxdur ki, saxlanan tankerin yükünün sahibi hələ üzə çıxmayıb. 30 milyonluq xam neftin kimə, hansı təşkilata, şirkətə məxsus olduğuna dair rəsmi açıqlama da yoxdur. Mənbə deyir ki, bu yükün CASPAR şefi A.Bəşirova aid olduğu bilinsə də hələlik ictimaiyyətə rəsmi bilgi verilmir. Yəni əslində Aydın Bəşirov Rusiya FTX-nin keçirdiyi əməliyyat nəticəsində ifşa olunub. Onun gizli oğurluq neft biznesi faş edilib. Düzdür, başqa bir mənbə deyir ki, bu həcmdə oğurluq neft təkcə A.Bəşirovun ola bilməz, onun bu əməliyyatından “yuxarılar”ın mütləq məlumatı olub. Amma bu cür sensasion ifşadan sonra Aydın Bəşirovun şərikləri heç vaxt ortaya çıxmaz. Onu mütləq tək qoyar və... gəmi qarışıq batırarlar.
Mənbə deyir ki, məhz “Naftalan” tankerinin saxlanmasından, orada 30 milyon dollarlıq oğurluq neftin olması bilinəndən sonra A.Bəşirovun haqqında qərar qəbul edilib. Seçkidən sonra formalaşacaq kabinetdə Bəşirovu başqa bir adamın əvəzləyəcəyi istisna edilmir.