Şahrza Əliyevin həbsinə hazırlıq görülür

gundemxeber.az Bir müddət əvvəl şair Əli Kərimin oğlu Orxan Kərimovun azadlığa buraxılması Təhsil Nazirliyi ətrafındakı gərginliklə bağlı yeni situasiya yaradıb. Qeyd edək ki, Orxan Kərimovun vəkilləri onun barəsində həbs-qətimkan tədbirinin dəyişdirilməsi barədə vəsatət qaldırmışdılar. Hakim vəsatəti təmin etməmişdi. Lakin bundan bir qədər sonra hakim qərarını qəfildən dəyişmişdi və Orxan Kərimov azadlığa buraxılmışdı. Bu, yazıçı Anarla deputat Sabir Rüstəmxanlının prezident İlham Əliyevə müraciətilə izah edilsə də, əsl səbəb bu deyil. “Yuxarılar”da bu planın müzakirə edildiyi ərəfədə belə bir müraciətin olması barədə prezidentə məruzə ediləndə o, bu məsələnin də ciddi araşdırılmasını tapşırıb.
Xatırladaq ki, prezident İlham Əliyevin son müşavirələrdən birində uşaq bağçaları ilə bağlı tənqidi çıxış etmişdi. O, həmin çıxışında konkret hədəf göstərməsə də Təhsil Nazirliyini yemək oğurluğunda ittiham etmişdi: “Mən çox narahatam və narahat idim ki, gələn siqnallar da onu göstərir, hətta uşaqlara heç o aşağı səviyyəli normativlər də verilmir. Uşaqlar ya ac qalır, ya da ki, evlərindən özü ilə yemək gətirirlər”.
Konkret olaraq uşaq bağçaları ilə bağlı məsələdə Təhsil Nazirliyinin məsul işçisi Şahrza Əliyevin başı dərddədir. Çünki iqtisadiyyat şöbəsinin müdiri kimi maliyyə məsələlələrinə məhz o nəzarət edir. Mənbənin bildirdiyinə görə, Ş.Əliyev idarə rəisi olsa da, nazirlikdə ən əhəmiyyətli fiqurdur. Bir çox hallarda o, heç nazir müavinləri ilə da hesablaşmır. Dövlət büdcəsinin təxminən 18-20 faizi təhsil sektoruna ayrılır. Bu, ildə 2-3 milyard manat vəsait deməkdir. Bu vəsaitləri isə Ş.Əliyev idarə edir, yəni hara və nə qədər xərclənməsi barədə qərarı o verir.
Xatırladaq ki, həbsdən azad edilən Orxan Kərimov da məhz Şahrza Əliyevin müavini idi. Bəllidir ki, Orxan Kərimov qondarma ittihamlara, qanunsuz köçürmələrə görə həbs edilmişdi. O, saxta diplom məsələsində və qanunsuz tələbə köçürmələrində günahkar bilinir. Mənbə deyir ki, əslində MTN-in hazırladığı bu əməliyyatın hədəfi Şahrza Əliyev olmalı idi. Ancaq son anda Ş.Əliyev müavinini güdaza verməklə özünü qoruya bilib. Mənbə eyni zamanda O.Kərimovun həbsinə də aydınlıq gətirir - iqtisadiyyat idarəsinin rəis müavini statusuna görə heç bir halda tələbə köçürmələrində iştirak edə bilməz, bu aksiomadır. O.Kərimov, sadəcə, nazirlikdəki daxili intriqaların qurbanı olub.
Amma hər kəsə bəlli idi ki, bu prosesin arxasında O.Kərimov yox, daha yüksək çinli şəxslər durur. Məlumat üçün bildirək ki, köçürmə əməliyyatlarında əsas rolu nazirlik və rektorlar oynayır. Rektorların üzərinə az məsuliyyət düşür, çünki istənilən halda bu məsələ ilə bağlı son sözü Təhsil Nazirliyi deməlidir. Prosedur belədir: rektorlar hansısa tələbənin rəhbərlik etdikləri təhsil ocağına köçürülməsi ilə bağlı nazirliyə müraciət edir. Nazir məsələnin araşdırılmasını aparata tapşırır. Nəticə müsbətdirsə, nazirin imzası ilə məsələ həllini tapır. Onu da bildirək ki, Ş.Əliyev maddi imkanlarına görə istənilən nazirlə rəqabət apara biləcək bir şəxsdir. O, bir müddət öncə O.Kərimovu güdaza versə də, başı üzərindən təhlükə hələ sovuşmayıb. Onun hətta həbs olunma təhlükəsi də var. Hələliksə onun maddi imkanlarının səviyyəsi öyrənilir. Onun həbsi antikorrupsiya şousunun yaxşı reklam kliplərindən biri ola bilər.
Redaksiyamıza daxil olan məlumatlara görə Ş.Əliyev Bakıda fəaliyyət göstərən ticarət şəbəkələrinin, eyni zamanda çoxsaylı ticarət obyektlərinin sahibidir. Mənbə birmənalı şəkildə onu Azərbaycanın üzdə olmayan iri oliqarxlarından biri kimi xarakterizə edir - onun geniş maliyyə imkanları, potensial rəqiblərini sıradan çıxartmaq məharəti, istənilən situasiyanı öz xeyrinə dəyişmək bacarığı var. Bütün bunlara görə də uzun müddət siyasi hakimiyyətin diqqətindən kənarda qalmağı bacarıb. Ancaq maliyyə imkanları getdikcə genişlənən Ş.Əliyev təbii olaraq siyasi hakimiyyətin diqqətini cəlb etməliydi.
Mənbə onu da bildirir ki, Ş.Əliyevin taleyi tezliklə həll olunacaq. Baş Prokurorluq yanında Korrupsiyaya Qarşı Mübarizə İdarəsi Ş.Əliyevin korrupsiya əməlləri ilə bağlı təkzibolunmaz sübutlar toplaya bilib. Məsələn, məktəblərin təmir-tikintisi ilə bağlı tenderlər demək olar ki, keçirilməyib, bəzi hallarda isə formal xarakter daşıyıb, dövlət sifarişləri ancaq özlərinə yaxın şirkətlərə verilib. Bütün bunlara birbaşa Ş.Əliyev rəhbərlik edib. Bu, çoxsaylı faktlardan yalnız biridir.
Mövzunu diqqətdə saxlayacağıq. Bizi izləyin...

Tural