Qohumları “Dəmir Yolları” şefini ifşa etməyə başladı
Böyük yeyintiyə görə tutulan Rahib Hüseynovun anası özünü öldürmək istəyib; QSC sədrinin baldızı oğlunun Əsgərovlar tərəfindən aldadılaraq həbsə göndərildiyi iddia edilir; məmur-oliqarxın mülklərinin kiçik siyahısı açıqlandı
“Azərbaycan Dövlət Dəmir Yolları” QSC-nin sədri Arif Əsgərovun yaxın qohumu Rahib Hüseynovun 48 milyon manatlıq yeyintiyə görə həbs olunması ilə bağlı qalmaqal davam edir. “Yeni Müsavat”a bu barədə gələn xəbərlərdə bildirilir ki, bu məsələyə görə həm aldadılan sahibkarlarla, həm də hüquq-mühafizə orqanları ilə problem yaşayan A.Əsgərov indi də qohumlarının ittihamları və tələbləri ilə üzləşib.

Qeyd edək ki, həbs olunan Rahib Hüseynov A.Əsgərovun baldızı oğludu və “Azərbaycan Dövlət Dəmir Yolları” QSC-nın marketinq şöbəsində çalışıb, sədrin iş otağı yerləşən mərtəbədə oturub. Bundan əvvəl aldığımız məlumatlara əsasən A.Əsgərovun R.Hüseynovun bütün əməllərindən xəbərdar olduğunu yazmışdıq. Bunu A.Əsgərova yaxın çevrələrdən redaksiyamıza daxil olan məlumatlarda göstərilənlər də sübut edir.
Həmin məlumatlarda bir daha bildirilir ki, R.Hüseynovun sahibkarları aldadaraq onların pullarını mənimsəməsi birbaşa A.Əsgərova bağlı olan məsələdi. R.Hüseynovun əməllərinin üstü açılandan sonra o Gürcüstana qaçmaq istəyib. Lakin Baş Mütəşəkkil Cinayətkarlıqla Mübarizə İdarəsinin əməkdaşları tərəfindən həbs olunub. Bundan sonra isə A.Əsgərovun əmrilə köhnə tarixə işdən çıxarılıb. Amma faktiki olaraq o həbs edildiyi günədək rəsmi şəkildə bu idarənin işçisi olub. Aldığımız yeni məlumatlarda o da deyilir ki, R.Hüseynovun sahibkarlardan aldığı 48 milyon manat (bəzi məlumatlarda bu məbləğin 70 milyon manat olduğu göstərilir - T.H.) kredit şəklində Arif Əsgərovun oğlu Elnar Əsgərovun rəhbəri olduğu şirkətə verilib.



Yeyinti faktının üstü açılanda A.Əsgərovun və oğlunun təkidi ilə R.Hüseynov işi öz üzərinə götürməli olub. Onun “Azərbaycan Dövlət Dəmir Yolları” QSC-nın təchizat idarəsində işləyən qardaşı Emin Hüseynov isə problem ortaya çıxandan sonra ölkədən qaçmağı bacarıb.

R.Hüseynovun yaxınlarından gələn məlumatlara görə, neçə vaxtdı A.Əsgərovla oğlu E.Əsgərov onlara verdikləri vədləri yerinə yetirmirlər. Onlar R.Hüseynova həm sahibkarların pullarını qaytaracaqlarını, həm də onun həbsdən çıxarılacağını deyiblərmiş. İndi isə bu məsələnin onlara aidiyyətinin olmadığını və R.Hüseynovun öz günahı ucbatından həbs olunduğunu iddia edirlər. Bu isə R.Hüseynovun ailəsinin ciddi narahatlığına və etirazlarına səbəb olub. Məlumatda bildirilir ki, buna görə də, hazırda A.Əsgərovla qohumları arasında əməlli-başlı savaş gedir. A.Əsgərovla adamları R.Hüseynovun valideynlərini susdurmağa çalışırlar. Bu məqsədlə də müxtəlif təzyiq vasitələrindən istifadə edirlər.



Məlumatda bildirilir ki, oğlunun tutdurulmasına və bütün işlərin onun üzərinə atılmasına etiraz edən R.Hüseynovun anası Lətifə Hüseynova bir neçə dəfə özünə qəsd edib. L.Hüseynova A.Əsgərov və onun oğlunu ifşa edən faktların əks olunduğu məktublar yazıb qoyaraq özünü öldürmək istəyib. Ancaq yaxınlarının səyi nəticəsində bunun qarşısı alınıb. Xəbərdə R.Hüseynovun atası İsmayıl Hüseynovun da davamlı təzyiqlərə məruz qaldığı, artıq ailənin bundan bezdiyi və hər şeyi ictimaiyyətə açıqlayaraq Əsgərovları ifşa etməyə hazırlaşdıqları bildirilir: “Rahib Hüseynovun həbsindən bir neçə gün əvvəl Arif Əsgərovun həyat yoldaşı olan xalası Xatın xanım hər zaman Rahibin özü ilə gəzdirdiyi noutbuku onun əlindən alıb. Rahib Hüseynov Əsgərovların göstərişi ilə gördüyü bütün qara işlərlə bağlı məlumatları həmin kompüterdə saxlayırmış. Xalası isə həbsindən bir neçə gün əvvəl onu yanına çağırıb və kompüteri Rahibdən alıb. Bundan sonra Rahib Hüseynov başa düşüb ki, onu qurban verəcəklər. Ancaq Elnar Əsgərov onu inandırıb ki, bütün məsələləri öz üzərinə götürsə, çox yaxın zamanlarda həbsdən buraxdıracaqlar və daha böyük işlər quracaq. Amma indi onun həbsdən çıxması üçün heç bir iş görmürlər, əksinə, ortaya çıxan bütün qara işləri üzərinə götürməsi üçün ona və ailəsinə təzyiq edirlər. Rahib Hüseynovun anası kənddə müəllimə, atası isə fermada işləyir.



Qorxutmaqla gücləri çatmayanda pul gücünə onların ağzını yummaq istəyirlər. Amma Rahib Hüseynovun valideynləri onlara baş əymirlər və oğlanlarının azadlığa çıxması üçün Əsgərovları tam ifşa etməyə hazırdılar. Buna görə də, Arif Əsgərovu çox yaxın vaxtlarda qara günlər gözləyir. Elə məlumatlar açıqlanacaq ki, bunlar bomba kimi partlayacaq və Arif Əsgərov bunların altından çıxa bilməyəcək”.

Məlumatda o da bildirilir ki, A.Əsgərov son baş verənlərdən bərk narahatdı: “Arif Əsgərovun nəvəsindən tutmuş bütün ailə üzvləri 3-4 cangüdənlə gəzir. Hətta onun Londonda olan Azər adlı kiçik oğlu da orda cangüdənlə gəzir. Əgər düz adamlardırlarsa, nədən qorxurlar?”

Məlumatı redaksiyamıza verən şəxslər A.Əsgərovun mal-mülkü barədə də bildiklərini bizimlə bölüşüblər.



Həmin məlumatları da təqdim edirik: “Arif Əsgərovun Novxanıda hərəsinin dəyəri milyon dollarla ölçülən 3 bağ evi, "Vorovski"də 4 villası (onun özünün və qohum-əqrəbasının villaları bu qəsəbədə bütöv bir küçəni əhatə edir), şəhərin mərkəzində yeni tikilmiş binalarda 6 evi, Londonda, İstanbulda mülkləri, Azərbaycanın müxtəlif rayonlarında rezidensiyaları var. Amma bu hələ Arif Əsgərovun mülklərinin, sərvətinin tam siyahısı deyil. Onların digər əməlləri ifşa olunarkən bu siyahı da tam şəkildə açıqlanacaq".
Onu da qeyd edək ki, A.Əsgərovun adının əsas adam kimi keçdiyi böyük yeyinti işində 43 sahibkarın zərər çəkdiyi bildirilir. Son məlumatlara görə, onlardan bəzilərinin pullarının bir hissəsinin qaytarılmasına başlanılıb. Amma zərərçəkənlərin əksəriyyəti hələ də pullarını ala bilmirlər.

Mövzu ilə bağlı redaksiyamıza yeni-yeni məlumatlar gəlməkdədi. Onları dərc etməklə yanaşı qarşı tərəfin mövqeyini dərc etməyə hazır olduğumuzu da bildiririk.