Regional İnsan Hüquqlarının Monitorinq Mərkəzi İctimai Birliyinin sədri Ruslan Əhmədov Azərbaycanda gənclərin üzləşdiyi problemlərdən “Gündəm Xəbər”ə danışdı

Ruslan müəllim, Azərbaycan gəncliyinin hazırki vəziyyətini necə qiymətləndirmək olar?

Bu gün Azərbaycan gəncliyinin vəziyyəti əslində heç də ürəkaçan deyil. Yeni texnologiyaların, kreativ düşüncələrin, bir sözlə virtual aləmin hakim olduğu bir dövrdə Azərbaycan gənclərinin xeyli problemləri vardır. İlk növbədə Azərbaycan gəncliyi sosialist dönəmindən qalmış və o psixologiyayla siyasi hakimiyyətdə oturuşmuş bir qrup korrupsioner məmur ordusu ilə üz-üzədir. Bundan savayı çağdaş gəncliyimiz işsizlik, sosial-iqtisadi sıxıntı, elementar tələbatlarını ödəyə bilməyərək zərərli vərdişlərə meylliliklə gündəmdədir. Bu gənclərin elm, savad əldə edə bilməməsi Azərbaycanın gələcəyinin kimlər tərəfindən idarə olunmasını şərtləndirir. Bu mənada demək olar ki, gəncliyimiz olduqca ağır durumdadır və təəssüf ki, hələlik bu tendensiyanın sonu görünmür.

Ruslan müəllim, Azərbaycan Universitetlərində təhsil alan, işlə təmin olunmaq üçün müsabiqədən keçən, xaricdə təhsil alan gənclərimiz də var?

Bu sadəcə barmaqla sayıla biləcək rəqəmlərdir. Sovet dövründə deyirdilər ki, hüquq fakültəsinə vəzifəli adamların övladları sənəd verə bilməz. Amma həmin hüquq fakültəsində elə katiblərin və rəislərin uşaqları təhsil alırdı. Azərbaycan Universitetlərində təhsil alan tələbələrin 50%-dən çoxu 200 bal toplaya bilmir. Bu bilik səviyyəsinin 30%-i həcmində də deyil. Digər fikrinizə münasibətdə bildirim ki, həmin işə qəbul üçün imtahandan keçən gənclərin 80%-i neçə illərdir ki, vakansiya gözləyir. Çünki, 70-80 yaşlı bürokratlar və onların himayə etdikləri adamlar həmin vəzifələrdədirlər. Yuxarıda qeyd etdiyim fikirə qayıdaraq deyim ki, sovet dövründə də iki nəfər fəhlə uşağı hüquq fakültəsində oxuyurdu. Bir nəfərin Harvard Universitetində təhsil alması təhsil göstəricisi deyil. Qəbul Komissiyasının sədri Məleykə Abbaszadənin qeyd etdiyi statistik rəqəmlər isə artıq göstəricidir. AzTv-də də sonsuz uğurlarımız barədə minlərlə kadr göstərilir. Amma bunlar cəmiyyətdə gördüklərimizlə tərs mütənasibdir.

O zaman, Azərbaycan gəncliyinin gələcəyi necə görünür?

Bu suala birbaşa cavab vermək bir az düzgün olmazdı. Səhər hökumətimiz çox ciddi islahatlara əl atsa, bir neçə ilə bu mənfi tendensiya aradan qalxar. O başqa məsələdir ki, belə davam edərsə Azərbaycanın gələcəyi savadsız, korrupsiyalaşmış bir nəslin əlində ola bilər. Həm də bu hakimiyyətin hər hansı islahatlar aparmaq niyyəti yoxdur. Əgər belə bir fikir olsaydı bu gün neqativ halları göstərən və tənqid edən gənclər narkotika istifadəçisi adıyla həbsə atılmazdı. Halbuki, o gənclər cəmiyyətin müxtəlif sahələrində ictimai inkişafa töhfə verə bilərlər və bu kimi halları görən digər gənclər artıq tənqidi fikir söyləməkdən çəkinirlər.