Arif Əliyev: “Jurnalistləri bu dəfə xəstəxanalardan və təcridxanalardan toplamırıq”
Daha bir seçkini geridə qoyduğumuz bu günlərdə diqqət həm də medianın üzərindədir. Çap və elektron KİV-lərin budəfəki seçkilərdə necə davranması, peşəkarlıq meyarlarına riayət edib-etməməsi müzakirə mövzusudur. Müxalifət cameəsi üçün seçkinin uğursuz nəticələnməsində həm də ölkə KİV-lərinin böyük rolu oldu. Telekanalların seçkini tamamən iqnor etməsi, çap mediasının böyük qisminin isə susdurulması onları, eləcə də cəmiyyəti seçki prosesindən uzaqlaşdırdı. Bəs media peşəkarları bu barədə nə düşünür: media seçki sınağından üzüağ çıxa bildimi?
“Yeni Nəsil” Jurnalistlər Birliyinin sədri Arif Əliyev son illər dünyanın müxtəlif ölkələrində medianın seçkiləri izləməsi monitorinqləri ilə tanış olduğunu yada saldı. Onun fikrincə, bu il Azərbaycan mediasının seçkilərdə iştirakı, oradakı fəallığı Avropa ölkələri sırasında medianın ən zəif iştirakıdır: “Media bütövlükdə götürəndə bu tələbi yerinə yetirə bilmədi. Televiziyalar seçkidən demək olar ki, imtina etdilər. İTV-nin ödənişsiz təşviqatı formaca uğursuz, məzmunca qarışıq bir prosesə çevrildi. Qəzetlərin böyük əksəriyyəti kiminsə tərəfdaşı kimi çıxış edirdilər. Maarifləndirmə əvvəlki seçkilərdən zəif oldu”.
Müsahibimizdən builki seçkilərdə pozuntuların ictimailəşməsi, sosial şəbəkələrdə bunların yayılması baxımdan media nümayəndələrinin rolunu soruşduq. Məlum, bu il xüsusən də facebook-un gücü özünü seçkilərdə göstərdi. Jurnalistlərə ötürülən və ya onların qeydə aldıqları pozuntu faktları sosial şəbəkədə qısa bir zamanda, sürətlə yayıldı. A.Əliyev bu məsələdə də mətbuatın uğuru olduğuna inanmır: “Biz sosial medianın inkişafından danışırıqsa, bu, texnoloji inkişafın göstəricisidir. Bu, Azərbaycan jurnalistikasının hünəri deyil. Əksinə, verilən müəyyən imkanlardan maksimum istifadə olunması demək olar buna”.
A.Əliyev bildirdi ki, ölkədə fəaliyyət göstərən KİV-lərdən heç biri real debat keçirmədi. Müsahibimizin sözlərinə görə, təkcə “Azadlıq” radiosu buna cəhd göstərdi, MSK bunun qarşısını “müvəffəqiyyətlə” aldı: “Bu baxımdan da mən budəfəki seçkilərdə media baxımdan iki nüansı qeyd etmək istəyirəm: medianın seçki prosesində öz öhdəliklərindən imtina etməsi, lazımi səviyyədə yerinə yetirməməsi və seçki günündə jurnalistlərə təzyiqin ən az olduğu seçkinin keçirilməsi. Xatırlayırsızsa, daha öncəki seçkilərdə bir gündə 70-80 jurnalistin döyülməsi, iş fəaliyyətinə kobud şəkildə müdaxilənin edilməsi müşahidə olunurdu. Bu dəfə bunlar qeydə alınmadı”.
Müsahibimizdən “sizcə, jurnalistlərə seçki günündə təzyiqin olmaması nəyin göstəricisidir: onların fəaliyyətinə əvvəlki qədər əhəmiyyət verilmir, yoxsa onlar əvvəlki kimi fəal deyillər” deyə soruşduq. O dedi ki, ümumiyyətlə, həyatda heç bir dəyişiklik bir variantın təsiri altında ola bilməz: “Səbəblər müxtəlifdir: jurnalistlərin daha ehtiyatlı davranışı, medianın özünün müəyyən anlarda geri çəkilməsi, jurnalistlərə davranış qaydalarına bu dəfə əlaqədar orqanların daha çox diqqət yetirməsi. Başqa bir tərəfdən, bu dəfə televiziyalar faktiki olaraq prosesdən kənara çəkilmişdilər. Medianın daha zəif iştirakı müşahidə olunurdu. Bu səbəblərin hamısı özünü burda göstərir. Altından xətt cızanda biz əvvəlki seçkilərdə olduğu kimi, budəfəki seçkilərdən sonra jurnalistlərimizi xəstəxanalardan, ya da təcridxanalardan toplamırıq”.