Uzun müddətdir ki, satış və reklam gəlirlərinin azlığından əziyyət çəkən ənənəvi medianın durumu çap xərcləri və qəzet kağızının bahalaşması ilə bir qədər də çətinləşib. Gün keçdikcə hansısa çap mediası bağlanmaq təhlükəsi ilə üzləşdiyi halda, demək olar ki, hər ötən gündə yeni bir onlayn media yaranır. Yeni “Media Haqqında” Qanunda da elektron KİV-ə xüsusi diqqət çəkilib.

Bəs görəsən, bundan sonra bu qanunun çap mediasına təsiri necə olacaq? Doğrudanmı çap mediası süquta doğru irəliləyir?
GundemXeber.Az bildirir ki, "Bakı-xəbər" qəzetinin baş redaktoru Aydın Quliyev Moderator.az-a açıqlamasında Yeni “Media Haqqında” Qanun layihəsinin çap medianın gələcəyi haqında narahatlıqları nəinki artırmadığını, əksinə indiyə qədər mövcud olmuş və bəzi hallarda qızışan narahatlıq meyillərini xeyli dərəcə sakitləşdirdiyini, aydınlıq gətirdiyini bildirdi:
“Əslində, medianın nə olduğunu, onun bütün seqmentlərini, hansı əhəmiyyət daşıdığını və mövcud seqmentlərin nə dərəcədə bir-birini tamamladığına lazımi səviyyədə bələd olan adamlar yaxşı bilirlər ki, medianın hər hansı bir seqmentini kənara tullamaq olduqca yersiz haldır. Məsələ burasındadır ki, çap mediasının indiyə qədərki taleyi barədə çox mübahisələr aparılıb. Amma yeni qanun barəsində həm media seqmentlərinin aydın təsnifatının verilməsi, təsnifatın içərisində çap medianın xüsusi qeyd edilməsi onun gələcəyi barədə narahatlıq hisslərinin əsassız olduğuna əsas verir. Dünyanın bütün ölkələrində çap media dövlətin himayəsində olub. O cümlədən, Azrbaycanda da çap mediasının dövlətdən başqa kənar himayədə yaşamağı təcrübə olaraq da mümkünsüzdür. Ona görə də media seqmentlərinin bu gün inkişaf etməsi onların fəaliyyətinin qanunla tənzimlənməsi çap mediasının hər hansı birinin rolunu azaltmır. Çap medianın taleyini bu gün ayrı-ayrı insanların, dövlət məmurlarının fikirləri deyil, ümumən çap mediasının cəmiyyətə və dövlətçilik sisteminə lazımlılıq ideyasının özü həll edir. Dərindən düşünəndə çap mediasının əhəmiyyəti nəinki enməyib, indiki şəraitdə bu rola daha böyük ehtiyac var. Gündəlik tarixi xronikanın etibarlı formada yazılması, normal jurnalistika ənənələrinin yaşadılması, normal yaradıclıq üslublarının formalaşdırılması, ədəbi dilin qrammatik qaydalarının qorunması, rəsmi dilin qorunması, ictimai danışıq dilinin əsaslarının qorunub saxlanılmasında çap medianın özünməxuss rolu var. Hətta əvəzedilməz dərəcədə rolu var.
Razılaşaq ki, həm informasiyaların etibarlılığı baxımdan, həm də gündəlik xronikanın yazılması, dilin qaydalarının, jurnalistika qaydalarının qorunub saxlanılmasında çap medianın rolu əvəzsizdir. Çap medianın gələcəyi barədə yeni qanun qəbul olunması baş qaldıran müəyyən narahatlıqların əsassız olduğunu deməyə əsas verir. Çap medianın təsir dairəsi başqa media seqmentləri ilə müqayisədə məhdud olsa da, onun oynadığı rol əvəzsizdir”.

GundemXeber.Az