“Ofisdə partlayış olsun deyə qazı açıq qoymuşdular...”

Bakı Ağır Cinayətlər Məhkəməsində hakim Novruz Kərimovun sədrliyi ilə Türkiyə vətəndaşının qətlində təqsirli bilinən Rasim Məmmədovun məhkəmə istintaqı başlayıb.

Virtualaz.org saytının prosesdə iştirak edən müxbiri xəbər verir ki, istintaqın gəldiyi nəticəyə görə, Rasim Məmmədov ötən il iyunun 5-də, saat 19:00 radələrində Azərbaycan prospektindəki 23 saylı binanın 21-ci mənzilində yerləşən ofisdə “Göyçay Kərpicsan” Məhdud Məsuliyyətli Cəmiyyətinin icraçı direktoru, Türkiyə vətəndaşı Mehmet Alimi bıçaqlayaraq öldürüb.

Rasim Məmmədov cinayəti törədəndən sonra isə Mehmet Alimin mobil telefonunu və 3200 manat pulunu götürüb. İzi itirmək məqsədilə mətbəxdə qazı açıq qoyub ki, ofisdə partlayış baş versin. Hüquq-mühafizə orqanlarının əməkdaşları hadisə yerinə gəldiklərindən partlayışın qarşısı alınıb.

Məhkəmədə ifadə verən Rasim Məmmədov ona elan olunmuş ittihamla özünü qismən təqsirli bilib.

Zərərçəkmiş şəxs qismində dindirilən Nuru Alim (mərhumun qardaşı) ifadəsində qardaşının bir neçə nəfər tərəfindən öldürüldüyünü göstərib: “Mən hadisə yerinə gələndə ofisdə polis və prokurorluq əməkdaşlarının olduğunu gördüm. Mənə qardaşımın öldürüldüyünü dedilər. Mən bu şəxsi əvvəllər tanımamışam. O, mənim qardaşımı təkbaşına öldürə bilməzdi. Bir nəfərin bu cür qəddar cinayəti tək törətməsi inandırıcı deyil. Mənim qardaşım güclü idi. Güman edirəm ki, qardaşımın ölümündə bir neçə nəfər iştirak edib. Vicdanlı olmaq lazımdır. Mərhum qardaşımın azyaşlı uşaqları qalıb”.

Zərərçəkmişin sözlərinə görə, qardaşı 1998-ci ildən etibarən Bakıda yaşayıb: “Özü burada olsa da ailəsi Türkiyədə yaşayırdı. Hadisədən bir gün əvvəl Türkiyəyə getmək üçün bilet də almışdı. Qardaşım Göyçay rayonunda yerləşən kərpic zavodunun direktoru idi. Üstündə həmişə pulu olurdu. Qardaşımı pula görə öldürüblər. Həmin gün ofisdə şirkətin külli miqdarda pulu ola bilərdi. Ofisdə şirkətə məxsus müştərilərdən yığılan iki-üç jünlük pul saxlanılırdı. Həmin pulun miqdarı 50-100 min manat olurdu. Ofisdən nə qədər pulun oğurlandığını bilmirik”.

Şahid qismində dindirilən mərhumun həyat yoldaşı Tuba Alim ifadəsində övladları ilə birgə Türkiyədə yaşadığını göstərib: “İki övladım var. Ərim 15 gün Azərbaycanda, 15 gün Türkiyədə qalırdı. Hadisə baş verən ərəfədə uşaqlarla Mehmetin yolunu gözləyirdik. Özü gələcəkdi, ölüm xəbərini aldıq. Mehmet hər adamla münasibət saxlayan deyildi. İnanmıram ki, onun Rasim Məmmədovla biznes əlaqəsi olsun. İstintaq zamanı Rasim 50 dəfə ifadəsini dəyişib. O, hər şeyi yalan danışır. Ərimin onu təhdid etdiyini də yalan deyir. Mehmet yolda görüşdüyü hər şəxslə münasibət quran adam deyildi. Düşünmürəm ki, ərim Rasim Məmmədovu ofisə dəvət edib. Əgər bu insanın şərəfi varsa, həqiqəti danışsın. Mənim həyat yoldaşım vicdanlı adam olub. Rasim Məmmədov Mehmeti təkbaşına öldürə bilməzdi. Ona köməklik edənlər olub. Həm də Mehmet tanımadığı adama qapı açmazdı. Onu aldadıb qapını açdırıblar. Bu cinayət pulla bağlı ola bilər. Bununla bağlı dəqiq araşdırma aparılmasını tələb edirəm. Ərim fabrik sahibi idi. Belə bir şəxsin 300-500 manatlıq mübahisə etməsi mümkün deyil”.

“Göyçay Kərpicsan” MMC-də satış meneceri Elnur Xəlilov məhkəməyə verdiyi ifadəsində göstərib ki, hadisə baş verən gün ofisə gəlib: “Qapı açıq idi. İçəri baxanda qan izləri gördüm. Nazirlik yaxınlıqda olduğu üçün ora getdim və polislərə hadisə ilə bağlı məlumat verdim. Polislərlə birlikdə ofisə qayıtdım. Mehmet yerdə qan içində uzanmışdı. Mətbəxdən kəskin qaz iyi gəlirdi. Polislər dərhal bizi ofisdən kənarlaşdırdılar ki, birdən partlayış olar”.

Hakim Rasim Məmmədova sərbəst ifadə verməyi təklif etsə də o, səhhətində yaranan problemlə əlaqədar ifadə verə bilməyəcəyini dedi. O, ifadə verməsi üçün məhkəmənin təxirə salınmasını xahiş etdi. Məhkəmə prosesi fevralın 4-də saat 10:00-da davam etdiriləcək.