Oqtay Gülalıyev: “Digər günahsız insanların da azadlığa çıxması üçün çalışacağıq”

gundemxeber.az Dekabrın 26-da prezident İlham Əliyev 87 nəfərin əfvi barədə fərman imzalayıb. Onların 79-u həbsdən, 4-ü islah işlərindən, daha 4 nəfər cərimədən azad edilib. Əfv edilənlərin sırasında iki «vicdan məhbusu» var - hüquq müdafiəçisi Vidadi İsgəndərli və AXCP fəalı Şahin Həsənli. Bundan başqa yerli hüquq müdafiəçilərinin siyahısı və AŞPA məruzəçisi Kristofer Ştrasserin hesabatından daha 11 nəfər əfv olunub. Bunlar Şəmsi Abdullayev (XTPD), İran televiziyasının jurnalisti Anar Bayramlı, «Xural» qəzetinin regional müxbiri Aydın Canıyev, gəncəli iki ruhani - Azər Cəbiyev və Fəxri İlyasov (2011-ci ilin əvvəlində həbs olunublar), hüquq müdafiəçisi Taleh Xasməmmədov, Ceyhun Fərzullayev (Nemət Pənahlı ilə birlikdə həbs olunub), Məmmədəli Əliyev (Abşeron Polis İdarəsinin sabiq rəisi, 1990-cı illərdə ağır cinayətlərdə, o cümlədən dövlət çevrilişinə cəhddə ittiham olunaraq barəsində axtarış elan edilib, 2008-cı ildə həbs olunub və 13 il azadlıqdan məhrumetmə cəzasına məhkum edilib), eləcə də «hicab məhbusları» Məmməd Əsgərov, Zaur İsgəndərov və İlqar Musayevdir.
“Əfv fərmanı ilə günahsız adamların bir qisminin azadlığa çıxması təqdir edilir, fərmanda 13 siyasi məhbusun adının olması müsbət qarşılanır. Amma, bu əfv fərmanı da əvvəlkilər kimi AŞPA-nın tənqidlərini yumşaltmağa yönəlib” - bunu “Siyasi Məhbuslarsız Azərbaycan” Alyansının rəhbəri Oqtay Gülalıyev prezidentin son əfv fərmanına münasibət bildirərkən deyib. O qeyd edib ki, digər siyasi məhbusların azadlığlığa buraxılması istiqamətində səylərini artıracaqlar: “Günahsız həbs olunmuş vicdan məhbusları, dostlarımız Vidadi İsgəndərli, Şahin Həsənli, Taleh Xasməmmədov, Aydın Canıyev, Anar Bayramlı və digərlərinin azadlığa buraxılması haqqında qərar gec də olsa müsbət addımdır. Amma bu addım ölkədə siyasi məhbus problemini həll etmir, əksinə problemin mövcudluğunu bir daha göstərir. Qanunsuz həbsdə olan Nemət Pənahlı, İlham Əmiraslanov, Əvəz Zeynallı, Nigar Yaqublu, Elnur Seyidov, Hilal Məmmədov, Səid Dadəşbəyli dəstəsinin üzvləri, Fuad Hüseynov, çoxlu sayda dindar qardaşlarımız və digərlərinin azadlığı uğrunda mübarizəmiz davam edir. Azadlığa çıxanlara, onların yaxınlarına, silahdaşlarına gözləriniz aydın, həbsdə qalanlara qəzanız mübarək olsun deyirik! Bu əfv fərmanı hökumətin ictimai-siyasi fəaliyyətinə görə həbs olunan şəxsləri uzun müddət həbsdə saxlamaq imkanında olmadığını, ictimai müdafiənin və beynəlxalq dəstəyin öz nəticəsini verdiyini göstərir. Mübarizəmiz davam edir. Digər günahsız insanların da azadlığa çıxması üçün çalışacağıq.”.
2013-cü ilin yanvarında AŞPA-da Azərbaycanda siyasi məhbus probleminin növbəti dəfə müzakirəyə çıxarılaraq AŞPA-nın siyasi məhbuslar üzrə məruzəçisi Kristofer Ştrasserin hazırladığı Azərbaycanla bağlı sənədin müzakirə olunacağı xatırladılır. Həmin sənəddə 60-dan çox şəxsin adı siyasi məhbus kimi keçir. Son fərmanla isə cəmi 13 nəfər siyasi məhbus əfv edilib. Halbuki, jurnalist Əvəz Zeynallı və Elnur Seyidov xaric qalanlarını əfv etmək olardı. Oqtay Gülalıyev bildirdi ki, «Siyasi məhbusların hamısını azad etməməklə iqtidar siyasi məhbus probleminin həllində maraqlı olmadığını göstərir, beynəlxalq tənqidləri yumşaltmaq üçün bu addımı atır».